Sápmi |

Ohcejogasge leat gávdnan niranasa – Ballet niranasaid leavvat mearragáttis siseatnama beallai

Dálkkádaga liegganeame dihte maiddái davás sáhttet leavvat ođđalágan divrrit, mat leat giksin olbmo lassin earret eará bohccuide.

Koiran ihosta löytynyt punkki.
Gova niranas ii leat gávdnon davvin. Govva: Jyrki Lyytikkä / Yle

Muhtin niranasa leat juo gávdnan bussáin, bohccuin ja beatnagiin maiddái davimus Suomas. Ovdamearkka dihte okta niranas gávdnui ohcejohkalaš bussás dán gease ja diibmá Anáris divrri gávdne bohccos Gápmasa boazodutkangárddis.

Niranasat eai leat vuordimis dušše máttil, muhto maid davil meara bealde.

– Gal dat livčče ođđa giksi bohccuide. Ferte muitit, ahte niranasat ellet Norgga rittus gitta davás. Dás lea oanehis mátki ja muhtin niranasdáhpáhusat leatge dieđus. Juos dálkkádat lieggana ja vuolšattut šaddagohtet liiggás, niranasat lassánit ja bastet njoammudit váivves dávddaid bohccuide, čilge Helssega universitehta doseanta Sauli Laaksonen.

Helssega universitehta dosenta Sauli Laaksonen
Helssega universitehta doseanta Sauli Laaksonen atná divrriid vearrát áittan go hállet liegganeamis. Govva: Kirsti Länsman / Yle

Suoma bálgosiid searvvi, Bálgosiid ovttastusa doaimmajođiheaddji Anne Ollila ii goit vel suorgan dáid dieđuid. Su mielas bohcco guolga lea buorre suodji dakkár givssideaddjiid vuostá.

– In oainne niranasa vearrás áittan, danin go Norgga riddu lea juo niranasguovlu. In leat gullan, ahte dat livčče hehtten bohccuid. Bohccoshan lea nu suhkkes guolga, ahte dákkár parasihtat eai beasa guolgga čađa liikki rádjai.

Bálgosiis ovttastusa doaimmajođiheaddji Anne Ollila
Bálgosiid ovttastusa doaimmajođiheaddji Anne Ollila ii bala niranasa leavvamis. Govva: Anneli Lappalainen / Yle

Doseanta oaidná divrriid vearrás áittan go dálkkádat rievdá

Dálkkádaga liegganeami dihte davás goit leat vuordimis ođđalágan divrrit, mat sáhttet leat giksin boazodollui. Doseanta Sauli Laaksonen atnáge divrriid vearrás áittan aŋkke dál go hállet liegganeamis.

– Čoavjeoaččis ealli Setaria tundra -máhtu lea varra oahppáseamos. De lea ealgaealliid lymfasuonain ealli máhtu, rumenifilaria anderson, mii lea juo leavvan olles boazodoalloguvlui ja vuordimis ovdánit maid Norgii ja Ruŧŧii, muitala Laaksonen.

Buoremus dálkkas divrriid vuostá livčče dálvit doarvái guhkes buolašáigi vai dat jápmet.

Varrasamosat: Sápmi

Váldoođđasat

Varrasamosat

Muualla Yle.fi:ssä