Sápmi |

Ohcejohnjálmmi skuvlla gártet evakueret sisáibmováttisvuođaid dihte

Ohcejohnjálmmi skuvlla sisáibmováttisvuođat čuhcet skuvllavázzimii juo dán giđa. Oahpahusa sirdet gaskaboddasaš lanjaide loahppagiđđii juo dán vahkus.

Ohcejoga skuvlaguovddáš.
Ohcejoga skuvlaguovddáš. Govva: Vesa Toppari / Yle

Ohcejoga čuvgehushoavda-rektor Laura Arola dadjá, ahte Ohcejohnjálmmi skuvllas oahpahus sirdojuvvo jođánepmosit eret skuvlaguovddáža lanjain.

– Vuossárgga lea áššis mearriduvvon. Skuvlaguovddáža ortnega leat dán giđa dutkan ja dan oktavuođas leat gávnnahan, ahte áibmomolsunbohcciin lea lássaullu, masa olbmot reagerejit.

Laura Arola buktá ovdan, ahte skuvlaguovddáža dutkanbargguid áigge leat oahppit ja oahpaheaddjit reageregoahtán eanet go ovdal ja dan dihte gielddaráđđehus ja skuvlahálddahus leat mearridan sirdit oahpahusa eret skuvlaguovddážis juo dán vahkus.

– Leat mearridan, ahte bearjadaga skuvllalaččain lea olgobeaivi ja vuossárgga rájes skuvlaoahpahus ordnejuvvo gaskaboddasaš lanjain.

Ohcejohnjálmmi skuvla ii leat velá loahpalaččat mearridan, ahte gos guđege oahpahusjoavku vázzá skuvlla loahppagiđa. Vejolašvuođaid leat gárten ovttas teknihkkalašdoaimmain vuossárgga rájes.

– Moai letne huksendárkkisteaddjiin vuodján birra Ohcejoga ja dutkan, ahte gos leat guoros lanjat.

Ohcejoga čuvgehushoavda-rektor Laura Arola árvala, ahte oassi Ohcejohnjálmmi sámeluohkáin sáhtašii vázzit skuvlla Sirpmá skuvllas. Maiddái Áilegas-dálus ja searvegottedálus leat lanjat, main muhtin joavkkut sáhttet vázzit loahppagiđa skuvlla.

– Muhtin sámeluohkáid lea vejolaš sáddet Sirbmái. Áššis ii leat goittoge velá sohppojuvvon, muhto gaskavahko lea vánhemiid eahket, gos áššit leat ovdan, dadjá Arola.

Skuvllaguovddáža leat dutkan cuoŋománu rájes

Ohcejoga huksendárkisteaddji Markku Porsanger lea ovdal muitalan, ahte skuvlaguovddáža áigot dutkat dárkilit. Dutkanbargguin leat mannamin čađa áibmomolsunrusttegiid. Dárkkistemiid oktavuođas leat gaikon ulluid eret áibmomolsunrusttegiid birra amas lássaullogavjja bossut miehtá skuvlla.

– Láhttis gitta gáhtui ja geažis geahčái dutkat. Mii fertet dasto smiehttat, ahte mii lea dán skuvlla dilli čakčat ja dahkat dalle mearrádusaid ja plánaid ja maid mii áigut ovddidit, dajai Markku Porsanger gieskat.

Ohcejoga čuvgehushoavda-rektor ii máhte vel dadjat, ahte man guhkes áiggi Ohcejohnjálmmi skuvlla gártá leat gaskaboddasaš lanjain.

– Miessemánu loahpas bohtet bohtosat ja dan maŋŋá lea dieđus, mii lea skuvlla dilli ja mii dainna dáluin dahkkojuvvo, loahpaha Arola.

Guldal dás Laura Arola jearahallama Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä