Sápmi |

Ohcejotnjálmmi ođđa skuvla gárvána áigedávvalis boahtte čakčii – huksenfitnodat beaggá funet huksejuvvon skuvlavisttis máddin

Ohcejogas luhttet huksenfitnodat Lehto Group Oyj bargui fuones beaggimis fuolakeahttá.

Utsjoen uuden koulun rakennustyömaa.
Ohcejoga ođđa skuvlla huksejit dál dievas fárttain. Skuvlla siskkobeale barggut gárvvásmuvvet geassemánus ja olgobarggut borgemánus 2020. Govva: Anneli Lappalainen / Yle

Ohcejotnjálmmi boares skuvlavisttiid báldii lea ceagganan dánáigásaš skuvlavisti. Ođđa skuvlaguovddáš skuvlalaččaide ja mánáidgárdái galgá leat anus, go skuvlajahki álgá boahtte čavčča 2020.

Ohcejotnjálmmi ođđa skuvlla hukse Lehto Group -fitnodat, mii mannan vahkus beaggái Suomas funet huksejuvvon skuvlavisttis máddin Punkalaidun gielddas. Huksenfitnodat lea mieđihan, ahte máttasuopmelaš skuvllas dáhpáhuvve feaillat.

– Mii leat divvugoahtán feaillaid dien fidnus ja doaibmavugiidge iežamet proseassain. Mii leat oahppan dáin áššiin. Dát ovdánahttinbargu doarju min boahttevaš fidnuid lihkostuvvama, dadjá Ville Kettunen Lehto Group -fitnodagas.

Eandalii dálvit lea deaŧalaš suddjet bargoeatnama ja divvut váilevuođaid dalán, go daid fuomáša. Dát gullá buori huksendáhpái, ja daid maiddái Lehto Group -fitnodagas muitalit váldit vuhtii Ohcejoga skuvlla huksemis.

Utsjoen uuden koulun rakennustyömaa.
Ohcejotnjálmmi ođđa skuvlaguovddážii bohtet lanjat sihke skuvlavázzimii ja mánáidgárdái. Govva: Anneli Lappalainen / Yle

– Jiekŋuma, muohttaga, buollaša ja njáhcuma, dieđus maiddái čáhcuma, ferte váldit vuhtii bargoplánain. Mii maiddái gohcit dan, ahte suddjen lea ortnegis. Resurssain váldit vuhtii vejolaš lassibargguid, maid dálvi dagaha, čilge Ville Kettunen.

– Huksenbáikki eana ii galgga beassat jiekŋut iige eanadeavdinbargguid sáhte dahkat jikŋon eatnamiin. Dihto bargguid ferte heivehit jagiáiggiid mielde, olgomálema ja šilljobargguid ii dieđus sáhte dahkat dálvit, joatká Kettunen Lehto Group -fitnodagas.

Ohcejogas luhttet huksejeaddjái

Ohcejogas virgeolbmuin lea oalle hušša, go gildii huksejit ođđa visttiid nu, ahte veahčir beašká measta ijatbeaivvi.

Gieldda njunus virgeolmmoš, gielddahoavda Vuokko Tieva-Niittyvuopio luohttá dasa, ahte buot manná bures, go sii fal gulahallet álo áiggebále ja mielas ovddalgihtii huksejeaddjiin.

– Buot dain áššiin, main leat fuopmášahttán ja ohcan oktasaš čovdosa, de loahppaboađus leamašan buorre, muitala Tieva-Niittyvuopio.

Kunnanjohtaja Vuokko Tieva-Niittyvuopio ja rakennustarkastaja Markku Porsanger
Ohcejoga gieldda huksendárkkisteaddji Markku Porsanger ja gielddahoavda Vuokko Tieva-Niittyvuopio dutkaba skuvlatevnnegiid. Govva: Anneli Lappalainen / Yle

Gielddahoavda ii dovdda fuola das, mo sii lihkostuvvet huksenfidnuin.

– Gieldda ámmátolbmot gohcet huksema ja barget beaktilit ovttasbarggu huksenfitnodagain.

Huksendoaimma gohcci lea duđavaš

Dál, go ođđa viessu Ohcejotnjálmmis lea juo gáhtu vuolde, jáhkká Ohcejoga gieldda huksendárkkisteaddji Markku Porsanger dasa, ahte buot šiehtadusat ollašuvvet.

Son ii leat áican bargoeatnamis váilevuođaid ovdamearkan suddjemis.

– Bargu lea ovdánan hui jođánit ja leat áigetávvalis. Mii leat ráhkkanan dáidda áššiide bures ovddalgihtii, mii leat visot rávvagiid ja meannudanvugiid dahkan dan mielde, ahte dat eai boađe diekkár váttisvuođat, eaige leat boahtán, árvala Porsanger.

Ohcejoga gieldda ovddasteaddjin skuvlahuksemiid gohcá Insinööritoimisto Matti Salonen. Porsanger mielas dat leamaš buorre čoavddus.

– Das leamaš gildii stuorra ávki, ahte barggu gohcá olmmoš, guhte dovdá bures huksensuorggi, muitala huksendárkkisteaddji Markku Porsanger.

Markku Porsanger
Ohcejoga huksendárkkisteaddji Markku Porsanger lea duđavaš skuvlahuksema ovdáneapmái. Govva: Anneli Lappalainen / Yle

Ohcejogas ođđa skuvllaid huksen vulggii das, go čielggai, man heajos dilis ja fuones sisáibmu boares skuvlaviesuin lei. Seamma ii galgga dáhpáhuvvat ođđa skuvllas.

– Dás leat álggu rájes visot huksenoasit smihttojuvvon nu, ahte seammalágan ii šáhte geavvat, mii lea boares skuvllain. Ovdamearkan láhtiin ii leat betoŋŋa geavahuvvon ollege oppa visttis, earret olggobealde lea geađgejuolgi betoŋŋas, čilge Markku Porsanger.

Ohcejogas ja Gáregasnjárggas besset ođđa visttiide jagi geahčen, Njuorggámis maŋŋelabbos

Ohcejogas ceagganit lagaš jagiid ođđa skuvllat Ohcejotnjálmmi lassin maiddái Gáregasnjárgii ja Njuorggámii.

Ohcejotnjálmmis ja Gáregasnjárggas besset ođđa skuvlavisttiide jo skuvlajagi 2020–2021, Njuorggámis maŋŋelabbos.

– Ohcejogas siskkobealde barggut gárvvásmuvvet geassemánus ja olgobarggut borgemánus 2020, Gáregasnjárgga skuvla maid lea gárvvis borgemánus 2020, dadjá Ville Kettunen Lehto Group -huksenfitnodagas.

Njuorggáma skuvlla tevnnegat leat dál beavddis. Huksenfálaldagaid das gielda bivdá jagi 2020 álggus.

Geahča dán áššis lasi gaskavahku 30.10. Yle Ođđasiin Yle TV1 diibmu 16.45!

Varrasamosat: Sápmi

Váldoođđasat

Varrasamosat

Muualla Yle.fi:ssä