Sápmi

”Okta buot buoremus márkan, mii gávdno” – Geahča govaid dán jagi Vuonnamárkaniin

Árbevirolaš Vuonnamárkanat ordnejuvvojedje lávvardaga 30.8.2019 Vuonnabađas.


1
Herman, Solveig, Guro Isabell ja Otilia Blien
Govva: Kaija Länsman / Yle

Olles bearaš lei čiŋadan márkaniid várás

Herman, Solveig, Guro Isabell ja Otilia Blien ledje coggan gávtti go sis lei miella vuoitit gáktevuorbádeamis. Vuonnamárkaniin vuorbádit gávttehasaid gaskkas 10 000 ruvnnu bálkkašumi.

2
Britt Rajala
Govva: Kaija Länsman / Yle

Oahpes olbmuid deaivan lea buot somámus

Britt Rajala mielas Vuonnamárkaniin lea olu maid oaidnit. Juohke logát mehteris beassá orustit ja háleštit oahppásiiguin.

3
Nils-Henrik ja Helena Valkeapää
Govva: Kaija Länsman / Yle

Márkaniin lea áli dat márkkandovdu

Nils-Heaika ja Helena Valkeapää Heahtás eaba lean ovdal fitnan Vuonnamárkaniin. Helena Valkeapää vulggii ohcat alcces ođđa silkki, muhto ostiige sistelávkka.

4
Kati Ljetoff, Terhi Harju ja Hanna-Maaria Kiprianoff
Govva: Kaija Länsman / Yle

Hervvošedje ođđa beallječiŋaid

Kati Ljetoff, Terhi Harju ja Hanna-Maaria Kiprianoff ledje nissoniid reaissus. Sáhttá leat, ahte go ollejit ruoktot, de bursa lea guorranan ja lávka dievvan čiŋain, árvala Kiprianoff.

5
Čiŋat Vuonnamárkaniin
Govva: Kaija Länsman / Yle

Márkaniide ii beasa gii beare vuovdin

Ordnejeaddjit gáibidit, ahte duojit ja gálvvut galget leat dakkárat, maid vuovdi lea ieš duddjon. Dán jagi márkaniin ledje sullii 70 vuovdi.

6
Torild Labba
Govva: Kaija Länsman / Yle

Ii oba dieđe galle silkki leaš báhkken fárrui

Torild Labba bođii Gárasavvonis vuovdit dujiidis. Son lea guhkká juo johtán dáid márkaniin vuovdimin ovdamearkka dihte silkkiid. Su mielas Vuonnamárkanat lea okta daid buoremus márkaniin.

7
Áile Aikio
Govva: Kaija Länsman / Yle

Ohcá márkaniin inspirašuvnna

Áile Aikio ii lean máŋgga jahkái fitnan Vuonnamárkaniin. Dál son osttii nuoramus niidii gahpira. Son liiko geahččat earáid dujiid ja ohcat inspirašuvnna.

8
Ragnhild Nilsen
Govva: Kaija Länsman / Yle

Rilláiguin jáddadii gáffegoikku

Go lea olu olmmoš jođus ja gáffebáikái lea guhkes ráidu, de ii boahtán goiku. Ragnhild Nilsen jođii johtti kafeain miehtá márkaniid.

9
Ørjan Trane ja Susanne Sørensensen
Govva: Kaija Länsman / Yle

Mii vel somát go geahččat makkár gávttit earáin leat

Ørjan Trane gávtti lei gorron su oabbá. Soai Susanne Sørensenseniin návddašeigga márkandovddus.

10
Máret-Rávdná Wigelius
Govva: Kaija Länsman / Yle

Jagi buoremus doalut go beassá čiŋadit

Máret-Rávdná Wigelius liiko go beassá deaivat oahpes olbmuid ja vel čiŋadit. Son osttii holberávddaid vai beassá mánáide goarrut ođđa gávttiid.

11
Gávttehasat
Govva: Kaija Länsman / Yle

Gákti dieppe, gákti dáppe

Dán jagi ledje badjel 500 márkanguossi čiŋadan gávttiin. Earenoamážit nissonat čábbájedje.

12
Anu Forselius
Govva: Kaija Länsman / Yle

Jáhkke fasken guosseoláhusa

Silbarávdi Anu Forselius lea okta sis, guhte lea mielde ordnemin márkaniid. Dán jagi guossit ledje badjel 3 600. Diibmá ledje golbma guossi eanet, reašká Forselius.

13
Ellen Cecilie Triumf-Buljo
Govva: Kaija Länsman / Yle

Sus deaivvai lihkku, son vuittii nissoniid gáktevuorbádeami

Buot gávttehasaid gaskkas vuorbádedje ruhtabálkkašumiid. Ellen Cecilie Triumf-Buljos deaivvai lihkku. Son vuittii nissoniid gáktevuorbádeami. Son lea coggan badjelii gávtti, mii lea gorrojuvvon 1850-logu málle mielde.

Logi duhát ruvnnu vuorbevuoittu vuittii fas Martti O. Länsman, muhto son lei geargan jo vuolgit márkaniin eret ovdal vuorbádeami.

Varrasamosat

Muualla Yle.fi:ssä