Sápmi |

Oktasaš Sámi cealkámus Deanu soahpamušhápmosii – Mielde olbmot ja searvvit goappat beal ráji

Ohcejohkalaš Aslak Holmberg muitala, ahte ođđa Deanu soahpamušhápmosis lea dahkkon oktasaš Sámi cealkámuš, masa gullet olbmot ja searvvit goappat beal ráji. Oktasaš Sámi cealkámuš gáibida ođđa Deanu soahpamuša hilguma. Ođđa Deanu soahpamušhápmosa cealkináigi nogai mannan bearjadaga.

Sámediggi 21.06.2016
Saamelaiskäräjien kulttuurilautakunnan puheenjohtaja Aslak Holmberg Govva: Ville Fofonoff / Yle

Cealkináigi ođđa Deanu soahpamušhápmosis nogai mannan bearjadaga. Eanan- ja meahccedoalloministeriija hálddahus- ja plánenossodaga hoavda Pentti Lähteenoja muitala, ahte eanan- ja meahccedoalloministeriijai bohte 12.8. rádjái 39 cealkámuša.

Okta dain lea oktasaš Sámi cealkámuš, mas leat mielde olbmot ja searvvit sihke Norgga ja Suoma bealde, muitala ohcejohkalaš Aslak Holmberg. Cealkámušas leat mielde Deanu čázádaga luossabreavaeaiggádiid searvi, Deanu čázádaga oaggunsearvi, Badje-Deanu siida, Sámi ealáhussearvi, Deanu sámiid searvi, Deatnogáttesámesearvi ja Goahtegearret, muitala Holmberg.

– Das (cealkámušas) deattuhuvvo garra vuostálastin dan soahpamuššii, go dat gáržžida menddo olu báikkálaččaid bivddu ja čujuhuvvo, ahte vaikko báikkálaš bivdiid vásáhusat bivddu vuođul luossanáli dilis eai leat álot áibbas seammaláganat go maid dutkit čuoččuhit, muitala Holmberg.

Čuohcá garrasepmosit sámi bivdiide

Holmberg muitala, ahte sii čuoččuhit dan, ahte ođđa Deanu soahpamuš čuozalii buot garrasepmosit sámi bivdiide.

–- Dat čuohcá buot garrasepmosit sámi bivdiide ja dat olggobealebivdit leat gieđahallon eanet árbmugasat das, muitala Holmberg.

Oktasaš cealkámušas gáibidit ahte soahpamuš hilgojuvvo.

– Mii dávistit daid gáibádusaid, mat duođai daid Suoma beale osolašgottiin ledje. Namalassii gáibidit dan, ahte soahpamuš hilgojuvvo ja ahte daid olbmuid vuoigatvuođaid, geaiguin leat bivdovuoigatvuođat Deanu čázádagas, ii oaččo heajudit danne go, dat gullet daid dáluid opmodatvuoigatvuođaide ja namalassii dat lea vuođđun daid olbmuid ceavzimii, muitala Holmberg.

Varrasamosat: Sápmi

Váldoođđasat

Varrasamosat

Muualla Yle.fi:ssä