Sápmi |

Oktavuohta eatnamii lea boahtte Skábmagovaid temá – guovddážis Sámi ja Mátta-Amerihká filmmat

Eamiálbmogiid ealligovvafestivála Skábmagovat ordnejuvvo Anáris 23.–26.1.2020.

Anni Koivisto, Taru Arrela ja Tiina-Maria Aalto
Skábmagovat-festiválain 2019 barget sihke oahpes ja ođđa olbmot. Gova gurut ravddas lea festivála ođđa veahkkebuvttadeaddji Anni Koivisto, gasku buvttadeaddji Taru Arrela ja olgeš ravddas festiválaassisteanta Tiina-Maria Aalto. Govva: Tomi Lampinen

Jagi 2020 Skábmagovat-ealligovvafestivála temán lea oktavuohta eatnamii.

Prográmmas leat sápmelaš ealligovaid lassin Mátta-Amerihká guovllu filmmat, erenoamážit Peru eamiálbmogiid ealligovat. Festivála čajeha earret eará Peru Oscar-evttohassange leamašan aimaragielat ealligova Wiñaypacha (eang. Eternity), man lea bagadallan Óscar Catacora.

Skábmagovat hálida temáin deattuhit eamiálbmogiid erenoamáš oktavuođa lundui.

– Dávjá dat álbmogat, mat buot eanemus gudnejahttet ja fuolahit birrasis, gártet gillát dan bilideamis, nugo lea dál geavvan ovdamearkka dihtii Amazona arvevuvddiin, muitala festivála dáiddálaš jođiheaddji Jorma Lehtola.

Jorma Lehtola
Skábmagovaid dáiddálaš jođiheaddjin joatká Jorma Lehtola. Govva: Kevin Francett

Skábmagovat devddii diibmá 20 jagi. Ođđa logijagi Skábmagovat ávvuda boahtte jagi nu, ahte dat buktá ealligovvadáidaga báldii dánssa, mii boahtá oidnot sihke ealligovain ja maiddái festivála oalgedáhpáhusain.

Dego ovdalge, festivála fállá maiddái boahtte jagi filbmačájáhusaid lassin máŋggalágan dáhpáhusaid, ovdamearkka dihtii ságastallandilálašvuođa ja festiválaeahkediid Skábmaklubbaid hámis.

Jagi 2019 festiválain barget sihke oahpes ja ođđa olbmot

Skábmagovat-festivála buvttadeaddjin joatká Taru Arrela ja dáiddalaš jođiheaddjin Jorma Lehtola.

Festiválaorganisašuvnna goittotge dievasmahttiba ođđa veahkkebuvttadeaddji Anni Koivisto ja festiválaassisteanta Tiina-Maria Aalto, guhte álggaha barggus skábmamánu loahpas.

Buvttadeaddji Taru Arrela illuda bargat joavkkuin, mas leat sihke nana vásáhus ja ođđa jurdagat.

– Sávan min bastit ordnet dakkár ollisvuođa, mii bálvala sihke ođđa ja boares festiválagussiid. Mii váldit mielas vuostá máhcahaga ja ođđa evttohusaid vai sáhttit fállat máŋggabealat festiválavásáhusaid iešguđetlágan olbmuide.

Lagaš áiggiid Skábmagovain bosodit earáge ođđa biekkat. Festivála fidne loahppajagi áigge ođđa neahttasiiddu ja logo, man ohcan álgá farggabáliid logogilvvuin.

Eamiálbmogiid ealligovvafestivála Skábmagovat ordnejuvvo Anáris 23.-26.1.2020.

Varrasamosat: Sápmi

Váldoođđasat

Varrasamosat

Muualla Yle.fi:ssä