Sápmi |

Olbmot eai galggaše leat fuolas gili áidna gávppi beales koronadilis – Kesko: "Dasa leat plánat, ahte gávppi sáhttá doallat rabas"

Gávppiin lea dehálaš sadji olbmuid eallimis ja erenoamážit dál spiehkastatáigge, go stuorra oassi eará bálvalusain lea heaittihuvvon. 

K-Market-ketjun johtaja Jesper Åberg
Kesko K-Market-gávppiid jođiheaddji Jesper Åberg muitala, ahte gávpejasat leat ráhkkanan koronadillái. Govva: K-Market-ketju

Muhtin Sámi gilážiin ii leat eambo go okta gávpi. Mo de jus muhtin buohccá korona dihtii? Goittot Kesko gávpejasat leat ráhkkanan dasa, ahte gávpedoaibma joatkašuvvá ain dáid erenoamáš áiggiin.

– Dasa leat plánat, ahte gávppi sáhttá doallat rabas, vaikko gii nu bargiin buohccášiige. Sadjásaš bargit gávdnojit ja dasa gávpejasat leat ráhkkanan, muitala Kesko K-Market-gávppiid jođiheaddji Jesper Åberg.

Keskos leat eanemus nu gohčoduvvon lagašgávppit Suomas ja muhtin Sámi gilážiinge áidna gávpi lea namalassii K-gávpi. Nu lea ovdamearkka dihtii Gáregasnjárggas, Njuorggámis, Vuohčus, Heahtás ja Gilbbesjávrris.

"Jus gii nu buohccá, dieđusge fertešii guldalit dearvvašvuođasuorggi olbmuid"

Gávpejas Seppo Härkönen muitala, ahte su gávppis čuvvot dál dárkilit hygienarávvagiid ja geahpedit njoammunvára buoremus lági mielde vai bargit ja kundarat bissot dearvvasin.

– Mii leat dakkár birrasis, gos leat beare dát min olbmot. Mii hálddašit hirbmat bures dán dili dál. Olggobealde jos boahtá olmmoš, mii mannat vehá guhkkelii. Dieđusge mii bálvalit su, muhto eat luoitte nu lahka.

Kauppias Seppo Härkönen Karigasniemestä.
Seppo Härkönen gávpi lea dán áigge áidna gávpi Gáregasnjárgga márkanis. Govva: Vesa Toppari / Yle

Vuolggasadji lea, ahte oktage ii buohccá, dadjá Härkönen.

– Muhto jus nu geavašii, dieđusge fertešii guldalit dearvvašvuođasuorggi olbmuid, ahte maid galgá bargat ja mo galgá bargat.

Kesko lea addán rávvagiid gávpejasaide

Kesko lea rávven gávpejasaid giddet dál erenoamáš olu fuopmášumi hygienii. Koronadilis leat lasihan čorgema ja gieđaid desinfiserenávdnasat leat fállun sihke kundariidda ja bargiide.

– Vuovdiid leat rávven sihkkarastit ráidduin dorvvolaš gaskkaid ja maiddái dalle, go kundarat leat báhkkemin gálvvuid. Kundariid muittuhit dorvvolašvuođanjuolggadusain maiddái iešguđetlágan dieđuiguin, mat leat gávppiin oidnosis, muitala K-Market-gávppiid jođiheaddji Jesper Åberg.

Varrasamosat: Sápmi

Váldoođđasat

Varrasamosat

Muualla Yle.fi:ssä