Sápmi |

Olbmuid mielas váttis čuovvut njuolggadusaid rájá rasttildeamis – Norgii lea dušši viggat beassat guolásteami dihte

Koronadilli lea bistán jo badjel jagi, muhto ain lea olbmuid mielas váttis oažžut čielga dieđu njuoggadusain ráji rasttildeamis Norgga ja Suoma ráji alde. Guolásteami dihte lea goit dušši viggat Suomas Norgii.

Oula Kitti
Tuollár Oula Kitti muitala, ahte sii maid galget lohkat neahtas ođđasamos njuolggadusaid Norgga rájá rásttildeamis. Govva: Anneli Lappalainen / Yle

Gáregasnjárgalaš gávpejas Seppo Härkönen lea gávpejas, muhto gártá olu bargat maiddái dego rádjanjuolggadustulkan. Go illá báikki olbmot dihtet mo oažžu johtit, de eará guovllu olbmot easkka leatge jorbbodan.

– Lei dakkár dáhpáhus, ahte finai okta nisu doppe rádjeolbmuid luhtte. Son ii beassan Norgii vaikke ássá Suomas ja Norggas lea ruoktu. Geavai nu, ahte son riŋgii rádječeaffaide ja jearai, ahte mo dat lea go buohkain leat earálágan vástádus go son jearrá, Härkönen čilge.

Suopmelaččat geat vigget Norgii leat váidalan heajos dieđiheami rájirasttildannjuolggadusaid ektui. Guovllu fitnodatdoallit ei ipmir dili. Gávpejas Härkönen mielas orru, ahte ráji rasttildankriterat leat maiddái muhtin veardde das gitta, gii lea barggus ráji alde.

Video: Seppo Härkönen
Ain orru eahpečielggas, gii ja mo Norgii beassá. Video: Anneli Lappalainen / Yle

Go neahtas leat dievva sierralágan rávvagat, de muhtin olbmot leat dulkon, ahte njuolggadusat leat gehppon. Na ii goittotge leat, ja ovdamearkka dihtii astoáigge guolásteami dihte ii leat vejolaš beassat Norgii.

Vel álgovahkus ráva lei, ahte jus áiggožat Norgii, dus ferte leat adreassa Norggas, dahje leat Norgga stáhtaborgár dahje jos barggu dihte lea bággu johtit.

Maid tuollárat gártet lohkat rávvagiid neahtas

Vaikko Norga ja Suopma dahkabage olu ovttasbarggu, de Suoma tuolláriid ja Norgga bolesiid ja ruovttusuodjalusa gaskkas oktavuođa doallan dáhpáhuvvá unnán. Buohkain leat seamma dieđut, dat mat gávdnojit neahtas, tuollár Oula Kitti muitala.

– Na tuollárat dieđusge mii leat dás seamma visttis, de daiguin dat gal lea dieđusge buorre. Muhto boles ja dat geat dan rádjakontrolla doallat doppe, daid mii fitnat vahkus gánske oktii jearahallame. Muđui ferte interneahta bokte geahččat mii dat lea dat maŋimus diehtu, Kitti lohká.

Oula Kitti
Tuollár Oula Kitti lea gullan olbmuid váidaleamen dan, ahte rájirásttildanrávvagat eai leat álot nu čielgasat. Govva: Anneli Lappalainen / Yle
Eandalii olgobáikegotti olbmot imaštallet muhtun veardde ja geahččalit oažžut sis lassedieđuid ráji rasttildeamis.

– Na de goittotge turisttat dat fitnet doppe jearahallame muhtimiid ja soitet boahtit ruovttoluottage doppe, Kitti muitala.

Norgga ráđđehus ráhkkana joatkit rádjegohcima skábmamánu logát beaivve rádjái, jus koronadilli dan gáibida. Norga lea várren ruđa dan várás, ahte dat sáhttá joatkit ain ovdamearkka dihte karanteanahoteallaid geavaheami. Norgii olgoriikkain boahtti olbmot soitetge maid boahttevuođas gártat karanteanahoteallii guovtti vahkkui.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä