Sápmi |

Ole Henrik Magga USA ja ON olmmošvuoigatvuođaáššiid ovttasbarggu boatkaneamis: "Máilbmi lea čoskkiideame eamiálbmogiid áššiid ektui"

Magga navdá, ahte USA ja ON olmmošvuoigatvuođaáššiid ovttasbarggu boatkaneapmi čuohcá olles máilmmi politihkkii.

Jietna: Marit Elin Kemi / NRK
Jietna
Guldal Ole Henrik Magga jearahallama maŋŋebárgga Buorre iđit Sápmi -sáddagis. Anneli Lappalainen jearahallá. Jietna: Yle Areena. Govva: Marit Elin Kemi / NRK

The Guardian -aviisa muitalii mannan vahkus, ahte Ovttastuvvan stáhtaid (USA) presideanta Donald Trump áigge USA lea eastigoahtán Ovttastuvvan Našuvnnaid olmmošvuoigatvuođaáirasiid dárkkistusaid Ovttastuvvan stáhtain.

Ole Henrik Magga, guhte doaimmai Norgga Sámedikki vuosttas presideantan jagiid 1989–1997 ja Ovttastuvvan Našuvnnaid Eamiálbmogiid foruma vuosttas jođiheaddjin jagiid 2002–2004, árvala ahte dákkár dilli lei vuordimis. Son dadjá, ahte Amerihkká lea leamaš oalle loikkas olmmošvuoigatvuođasoahpamušaid ektui ovdalge, muhto Barak Obama presideantaáigodagas dilli goit buorránii sákka.

– Dieđusge lei vuordimis dat, ahte dilli rievdá jur bahá guvlui, go dálá presideanta ii muđuige hálit bargat ovttas eará riikkaiguin eambbo go dihto vugiid mielde maid son ieš dohkkeha.

Dilli sáhttá čuohcat Amerihká eamiálbmogiidda

Ole Henrik Magga navdá, ahte USA ovttasbarggu boatkaneapmi ON:in olmmošvuođaáššiin boahtá váikkuhit Amerihká eamiálbmogiid doaimmaide ja eallimii, danin go eamiálbmogiid vuoigatvuođat leamaš muđuige Amerihká politihkkariidda váttis dohkkehit.

– Amerihkás leat boares šiehtadusat eamiálbmogiiguin ja ollugat ballet, ahte maiddái dat šiehtadusat hilgojuvvojit dahje goit eai čuvvojuvvo nugo galggašii. Dat lea hui heajos ođas gal gullat, muhto váikkuhusaid lea dieđusge váttis vuos diehtit.

Dasa lassin, ahte dilli sáhttá čuohcat eamiálbmogiidda Amerihkás, árvala Magga dan čuohcat maiddái viidásut máilmmis.

– Dieđusge váikkuha hui olu, mo ja maid barget stuorra váikkuheaddji riikkat dego Amerihkká, Kanada, Austrália ja dieđusge Ruošša.

"Politihkalaš dálkkádat sáhttá čoskkiidit"

Vejolaš lea, ahte áiggi mielde dilli čuohcá maiddái sámiide. Magga goit luohttá dasa, ahte Davviriikkat doalahit daid soahpamušaid, maid dat leat máilmmiin dahkan. Son goit ballá, ahte nu mo dálkkádatge rievdá, de rievdá maiddái politihkalaš dálkkádat.

– Go čoskkiida de vehážiid čoskkiida miehtá máilmmi.

USA ja ON olmmošvuoigatvuođaáššiid ovttasbarggu nohkan oidno das, go USA ii leat šat vástidan ovttage ON spesiálaraportevrra diđoštallamii mannan jagi miessemánu rájes. USA:i lea sáddejuvvon aŋkke 13 sierra diđoštallama. Ole Henrik Magga livččii vuordán USA čuovvut ja doarjut raportevrra bargguid, danin go dakkárge riikkat, gos livččii olu maid láitit, lávejit vástidit raportevrra jearaldagaide.

– Diet lea okta dain heajos ovdamearkkain ja mearkkain obanassiige, ahte máilbmi lea čoskkiideame eamiálbmogiid áššiid ektui.

Varrasamosat: Sápmi

Váldoođđasat

Varrasamosat

Muualla Yle.fi:ssä