Sápmi |

Olgešbellodat Kokoomusa ballet gomihit davimus gielddaid báikkálaš ássiid guolástanrivttiid – Ášši čielgá gaskavahko

Oassi olgešbellodat Kokoomusa ovddasteaddjiin vuostálastet guolástanlága rahpama. Anára, Eanodaga ja Ohcejoga kokoomuslaččain goit leat iešguđetlágan oainnut áššis.

Heikki Nikula kalastaa Juutuanjoella Inarissa heinäkuussa 2016.
Anárlaš guolásteaddji Heikki Nikula lea duhtavaš guolástanlága buoridanevttohusaide. Govva: Jarmo Honkanen / Yle

Otne gaskavahko veaigin čielgá, boahtágo Anára, Ohcejoga ja Eanodaga gieldda báikkálaš ássiid guolástanvuoigatvuođaid buorideapmi riikkabeivviid gieđahallamii vel dán válgabajis. Jos evttohus ii mana čađa stáhtaráđis otne, de riikkabeaivvit ii geargga gieđahallat ášši šat dán válgabajis.

Dálá guolástusláhka lea gáržžidan davimus gielddaid báikkálaš olbmuid guolástanrivttiid. Guolástanlága áigo ođasmahttit viidát, das ledje álgoálggus 27 čuoggá mielde. Dál stáhtaráđi otná beaivve gieđahallamii leat dain mannamin guokte ášši, davimus gielddaid báikkálaš olbmuid guolástanvuoigatvuođaid buorideapmi ja oppa Suoma guoski gođđuguliid lobihis goddima čuovvumušmáksu (su. seuraamusmaksu). Ministtar Jari Leppä (guovdd.) lea evttohan dán guovtti čuoggá giehtadallama vel dán ráđđehusbaji. Eará čuoggát gáibidit viidásut válmmaštallama.

Oassi olgešbellodat Kokoomusa ovddasteaddjiin leat vuostálastán guolástanlága rahpama. Kokoomusbellodaga riikkabeaiovddasteaddjiguovttos Markku Eestilä ja Saara-Sofia Sirén leaba oaivvildan guolástanlága rahpama vuostá. Riikkabeaiovddasteaddjiguovttos cuiggodeaba lága rahpama válmmaštallama ja dan, ahte buot canasjoavkkut eai leat válmmaštallanbarggus váldojuvvon vuhtii.

Ministara earenomášveahkki: davimus gielddaid guolástanvuoigatvuođaid divvun lea vuđolaččat válmmaštallojuvvon

Ministtar Jari Leppä earenomášveahkki Teppo Säkkinen mieđiha, ahte oassi 27 čuoggás, mat ledje álgoválmmaštallamis mielde gáibidit viidásut válmmaštallanbarggu eaige geargga gieđahallamii šat dán ráđđehusbajis. Son lohká guittotge davimus gielddaid guolástanvuoigatvuođaid divvuma ja čuovvumušmávssu leamašan vuđolaš válmmaštallamis.

Säkkinen muitala, ahte mannán giđa eana- ja meahccedoalloministeriija virgeolbmot ja dalá ministtar Leppä earenomášveahkki johte golmma davimus gielddain. Sin mátkkiid áigge buot dáid gielddain ordnejuvvojedje almmolaš dilálašvuođat ovttas Meahciráđđehusain ja gielddaiguin. Juvdujoga guollebivdi, anárlaš Heikki Nikula mielas evttohus guolástanlága nuppástusain orui buorre.

– Daid mátkkiid ja dilálašvuođaid vuođul bođii čielggasin, ahte láhkarievdadus dárbbašuvvo, lohká Säkkinen.

Säkkinen lohká, ahte ministeriija lea maid ráđđádallan Sámedikkiin áššis, nugo láhka mearrida. Sámediggi lea cealkán áššis skábmamánu beallemuttus.

Guolástanlága rahpamis addojuvvojedje lagabuid čuođi cealkámuša. Davimus gielddaid báikkálaš olbmuid guolástanvuoigatvuođaid divvuma bealis addojuvvojedje 22 cealkámuša. Guovtti cealkámušas vuostálaste davimus dielddaid báikkálaš ássiid vuoigatvuođaid viiddideami. Čuovvumušmávssu guottihedje 26 cealkámušas ja okta cealkámuš vuostálasttii dan.

Anára, Eanodaga ja Ohcejoga kokoomuslaččain iešguđetlágan oainnut

Avvila Kokoomus-joavkku ságajođiheaddji Jari Huotari muitala, ahte sii leat lága rahpama bealis ja leat maiddái muitalan oaivilaset Kokoomusbellodaga ministariidda ja riikkabeaiovddasteaddjiide.

Eanodaga Kokoomus-ovttastusa ságajođiheaddji Helinä Hautamäki ii loga iežaset gieđahallan ášši sin joavkkus, iige sus leat oaivil davimus gielddaid guoski guolástanlága rahpamis.

Ohcejoga Kokoomus-joavkku ságajođiheaddji Petteri Valle eat leat fáhten ságaide.

Varrasamosat: Sápmi

Váldoođđasat

Varrasamosat