Sápmi |

Olgoáššiidministtar Haavisto: Ovttasbargu sámiiguin lea dehálaš Suoma Barentsráđi ságadoallibaji áigge

Olgoáššiidministtar Pekka Haavisto hálida loktet oidnosii erenomážit nuoraid jurdagiid Barentsguovllu ovttasbarggus.

Ulkoministeri Pekka Haavisto puhuu Rovaniemellä
Olgoáššiidministtar Pekka Haavisto lea ovdanbuktán Suoma Barentsráđi ságadoallibaji prográmma otne Roavvenjárggas Arctic Spirit -konferánssas. Govva: Sara Kelemeny / Yle

Guldal dás olgoáššiidministtar Pekka Haavisto olles jearahallama suomagillii. Jietna: Sara Kelemeny / Yle

Suopma lea váldán otne badjelasas Barentsráđi ságadoallibarggu Arctic spirit -konferánssas ja olgoáššiidministtar Pekka Haavisto lea ovdanbuktán ságadoallibaji prográmma. Haavisto mielde lea dehálaš, ahte ovttasbargu maid sámiiguin doaibmá čuovvovaš guovtti jagi bajis, go sámit leat oassin Barents guovllu.

– Suoma ságadoallibaji áigge leat golbma dehálaš tema, biras, dálkkádat, biodiversiteahtta gullá dan vuollái, dasto olbmot. Mii hállat erenomážit nuorain, ja de johtolat, ja johtolatoktavuođat ja buot diet áššit leat maid sámiide dehálaččat, dadjá olgoáššiidministtar Haavisto.

Haavisto mielde álgoálbmogiid oktavuođat leat bures ordnejuvvon Barents guovllus, ja lea dehálaš, ahte dat doibmet rastá riikkarájáid. Son namuha vel sierra sáminuoraid, geat leat mielde nuoraid doaimmain.

– Go mis gieskat leai čoahkkin Tromssas, gos ságadoallibadji molsojuvvui Norggas Supmii, de doppe mii beasaimet erenomážit gullat nuoraid jienaid ja maiddái sáminuorat ledje báikki alde. Gal Suoma ságadoallibaji ulbmilin lea dat, ahte dát nuoraid jienaid ja jurdagiid gullan jotkkojuvvo nu sáminuoraid go earáge sámiid oasil, lohpida Haavisto.

Saamelaiskäräjien puheenjohtaja ja Suomen ulkoministeri konferenssissä Rovaniemellä
Sámedikki ságadoalli Tuomas Aslak Juuso ja Suoma olgoáššiidministtar Pekka Haavisto oassálastiba Arctic Spirit -konferánsii Roavvenjárggas. Govva: Sara Kelemeny / Yle

Sámediggi lea deaivvadan olgoáššiidministtariin Roavvenjárggas

Sámedikki bealis ságadoalli Tuomas Aslak Juuso lea ságastallan otne Roavvenjárggas olgoáššiidministtar Pekka Haavistoin. Ságastallamis Juuso loktii ovdan daid áššiid, mat sámediggái leat dehálaččat dán Suoma ságadoallibaji áigge.

– Dieđusge dat leat dat álgoálbmogiid bargojoavkku vejolašvuođat ja mo álgoálbmogiid beroštumit váldojuvvojit vuhtii. Mis leat stuorra plánat, maid mii leat gávdnan ovttaoaivilvuođain Suomain, ahte mo dan jođihanáigodagas galgá doaibmat, muitala Juuso.

Juuso mielas lea maid dehálaš doallat badjin ságastallamiin dálkkádatáššiid Barents-ovttasbarggus.

– Biras ja dálkkádatrievdan leat hui konkrehtalaš álgoálbmogiidda. Ja dathan leage okta Suoma jođihanáigodaga ulbmil, dadjá Juuso.

Guldal dás Sámedikki ságadoalli Tuomas Aslak Juuso olles jearahallama. Jietna: Sara Kelemeny / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä