Sápmi |

Ollâopâttâhuáppein lii álgám nettimáttááttâs – “Ij lah tuš taggaar, et kolgâččij ubâ ääigi kuldâliđ”

Marke Laaksonen lii lamaš tuđâvâš nettimáttááttâsân mii aalgij taan ohhoost.

Marke Laaksonen
Marke Laaksonen lohá anarâškielâ. Máttááttâs uárnejuvvoo neetist Adobe Connect -virtuaalluokast. Govva: priváhtagovva, Marke Laaksonen

Meiddei ollâopâttâhuáppeeh láá pääihist porgâmin škovlâpargoid. Suomâ staatâ meridij, ete puoh ollâškoovlâid kalga pieijâđ kiddâ 13.4.2020 räi.

Marke Laaksonen lii ollâopâttâh uáppee Häppilis ollâopâttâh -projektist já sun lohá anarâškielâ. Máttááttâs uárnejuvvoo tääl neetist Adobe Connect -virtuaalluokast.

– Mij moonnâp siisâ jieijâs noomâin já talle tot máttáátteijee sárnu tobbeen video ohtâvuođâ peht, Laaksonen muštâl.

Káidusmáttááttâs lii álgám taan ohhoost já uáppein láá jo lamaš motomeh oppâtijmeh. Sun lii lamaš tuđâvâš káidusmáttááttâsân.

– Moonâihân tot pyereest, mij pyehtip kuittâg sárnuđ oovtâst. Ij lah tuš taggaar, et kolgâččij ubâ ääigi kuldâliđ. Mist láá ennuv jiečânâs pargotijmeh, tot iššeed meid tom, et ij taarbâš ubâ ääigi čokkáđ tiättur paaldâst, sun iätá.

Motomeh uáppeeh láá kolgâm varriđ meddâl Anarist

Marke Laaksonen puáhtá Whatsapp peht leđe ohtâvuođâst skipárijgijn. Puohah suu škovlâskipáreh iä lah peesâm porgâđ škovlâpargoid, ko láá kolgâm varriđ.

– Motomeh láá jo vuálgám Anarist meddâl, ko lâi pággu varriđ meddâl asâttuvvâst. Tothân moonâi nuuvt, ete asâttâh lii kiddâ vaarâ ubâ kiiđâ, sun muštâl.

Laaksonen illood tast, ete uápuid lii liijká máhđulâš čođâldittiđ loopân.

– Lii máhđulâš kuittâg uážžuđ pápárijd já peessâđ ovdâskulij elimist já máhđulávt uážžuđ pargoid-uv, sun illood.

Oulu ollâopâttuvvâst anarâškielâ máttááttâs juátkoo táválávt

Ollâopâttâhmáttáátteijee Marja-Liisa Olthuis máttáát anarâškielâ Oulu ollâopâttuvvâst já Häppilis ollâopâttâh -projektist.

Oulu ollâopâttuvvâst anarâškielâ máttááttâs ij ennuvgis muttoo. Anarâškielâ máttááttâs lii kuhháá lamaš nettimáttááttâs.

– Puoh juátkoo tego táválávt, Olthuis muštâl.

Häppilis ollâopâttâh -projektist kuittâg máttááttâs muttoo ennuv. Nettimáttááttâs várás pargeeh láá kolgâm vuáváđ aaibâs uđđâ siskáldâs. Ohtâ stuorrâ nubástus lii tot, ete aldapeeivih muttojeh nettimáttááttâsân.

– Mist lii maksimaallávt nelji tijme peeivist nettimáttááttâs já loppâ lii jiečânâs pargo, Olthuis iätá.

Häppilis ollâopâttâh uáppeeh iä peesâ kuálástemkuursân

Vala ij lah tiätu tast, mon kuhháá škoovlah láá kiddâ. Máttáátteijeeh láá kuittâg kolgâm väriduđ toos, ete tile juátkoo kuhháá.

– Mij lep tääl vuáváámin tohokulij, et ubâ kiđđâ lii neetist, Olthuis muštâl.

Häppilis ollâopâttâh uápuid kullojeh meid mälistem- já kuálástemkuursah. Tääl uáppeeh iä peesâ olgos hárjuttâllâđ kuálástem.

– Toh iä lah tääl, tom sajan lii nettimáttááttâs, sun muštâl.

Máttáátteijeeh láá kiävttám ennuv ääigi uđđâ máttááttâs vuáváámân.

– Taas lii kolgâm orniđ nettiluoka tääl já teknisijd ravvuid uuccâđ. Oho pargoh taam ohjelm nubástutmist. Luhhoost mist lii lamaš materiaal valmâšin, sun muštâl.

Varrasamosat: Sápmi

Váldoođđasat

Varrasamosat

Muualla Yle.fi:ssä