Sápmi |

Olles bearraša luonddufilbma Ailo-bohcco birra filbmateáhteriidda ovdal juovllaid – filbma govvejuvvon Sámis

Ailo-bohcco lassin filmmas beassat oaidnit maiddái eará eallibearrašiid eallima áibbas ođđa geahččan guovllus, muitala filmma suopmelaš buvttadeaddji Marko Röhr.

ailo poro
Govva: House of Lapland

Olles bearraša luonddufilbma Ailo-bohcco birra boahtá Suomas ealligovvateáhteriidda juovllaid áigge. Filbma muitala Ailo-bohcco vuosttaš jagis. Geahččit besset čuovvut mo Ailo stuorru jagi áigge unna miesážis stuorra čearpmahin.

"Ailo – pienen poron suuri seikkailu" -filbma lea suopmelaš MRP Matila Röhr Production Oy ja fránskalaš Borsalino Productions ja Gaumont -fitnodagaid buvttadan luonddufilbma, mii lea govvejuvvon ollásit Lappis ja Sámis. Olles bearraša luonddufilmma temán leat Lappi luondu ja eatni agálaš ráhkisvuohta.

– Ailo-bohcco lassin filmmas beassat oaidnit maiddái eará eallibearrašiid eallima áibbas ođđa geahččanguovllus, muitala filmma suopmelaš buvttadeaddji Marko Röhr.

Buot sámi eallit mielde filmmas

MRP Matila Röhr Production lea buvttadan máŋggaid luondu- ja čáhcevuolfilmmaid árktalaš guovlluin ja leage beaggán daid ánssus viidát. Fitnodagas leamašan maiddái eanemus riikkaidgaskasaš ovttasbargobuvttadeamit Suomas.

– Ailo-bohcco govvemat čađahuvvojedje beannot jagis. Maiddái dálkkit Sámis ledje govvenáigodagas buorit. Dálvegovvemiin lei hirbmat olu muohta, muhto lihkká govvemat manne giehtačállosa mielde, muitala Röhr.

Kámera ovddas oidnojit bohccuid lassin maiddái davviguovlluid boraspiret; gumppet, guovžžat ja geatkkit. Filmmas leat mielde maiddái earret eará goaskimat, skuolffit, njoammilat ja oarrit. Maiddái áitatvuloš njálla čivggainisguin oidnosta filmmas. Röhr mieđiha, ahte elliid lea hástaleaddji govvet.

– Elliid govvemis dárbbašuvvo lihkku, muhto eandalitge čeahpes ámmátolbmot, deattuha Röhr.

ailo poro
Govva: House of Lapland

Vuosttašeahket ovdal juovllaid

Ailo-filmma giehtačállosa lea čállán fránskalaš luonddufilbmabagadalli Guillaume Maidatchevsky. Maiddái nubbi váldogovvejeddjiin lea fránskalaš. Muđuid filbma lea ráhkaduvvon suopmelaš fámuiguin.

Filbma čájehuvvo viidát miehtá máilmmi. Álgojagis 2019 filbma boahtá ealligovvateáhteriidda measta juohke Eurohpa riikkas ja maŋŋeleappos maiddái Kiinnás, Japánas ja Davvi-Amerihkás.

Filmma máilmmi vuosttašeahket lea Suomas vel dán jagi bealde juovlamánu 21. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä