Sápmi |

Olles filbma oamastuvvui Giehtaruohttasa boazosámiide

Anára Skábmagovain čájehuvvon Bohccot gullet biggii -dokumeanta guovddážis leat Giehtaruohttasa boazosámit. Filmmas erenoamaš lea, ahte boazosámit luhtte dutkiide nu olu, ahte álge muitalit iežaset áššiid birra kamera ovddas.

Video: Ánneristen Juuso
Video: Sara Wesslin jearahallá Ánne-Risten Juuso.

– Okta vásihan boazoolmmái dajai munnje, ahte presideanta Kekkonen lea maŋimuš guhte lea gullan min, muitala dutki Assi Harkoma.

– Das bođii idea dahkat dákkár dialogadokumeantta, mas Giehtaruohttasa boazosámit sáhttet muitalit áššiin, mat áitet árbevirolas boazodoalu dien guovllus, Harkoma dadjá.

"Dokumeanttas ii álgoálggus lean gárvves giehtačálus"

Árktalaš guovddáža dutkit leatge jagi dutkan Giehtaruohttasa boazosámiid dili.

Assi Harkoma
Assi Harkoma Govva: Vesa Toppari / Yle
Dábálaččat dieđálaš prošeavttaid boađusin lea raporta dahje bábirpunta, muhto dál buvttaduvvui filbma, mii lea oamastuvvon boazosámiid vásihan sisabahkkemiidda.

– Dokumeanttas ii álgoálggus lean gárvves giehtačálus, muhto baicce mii hálideimmet bargat ovttas Giehtaruohttasa sámi servošiin. Mii hálideimmet suokkardallat mo dát prošeakta ja dokumeanta sáhtášedje veahkehit servoša, Harkoma muitala.

Boazosámit muitalit sisabahkkemiid birra

Bohccot gullet biggii -filmmas besset Giehtaruohttasa boazosámit ieža čilget makkár áššit váivvidit sin. Sii namuhit máŋggalágan sisabahkkemiid: ruvke-, ruovdegeaidno-, pumpenfápmorusttet- ja rádárplánaid.

Govva filmmas Bohccot gullet biggii
Govva: Pirita Näkkäläjärvi / Yle

Vuoigatvuođadiehtágiid magisttar ja neavttár Ánne-Risten Juuso vulggii mielde prošektii ja doaimmai oktavuohtaolmmošin dutkkiid ja badjeolbmuid gaskas.

– Dutkit hálidedje namalassii boazoolbmuid, boazosámiid filbmii. Gullat makkár váttisvuođat sis leat birrasa ektui ja birrasa geavtima ektui. Daningo boazuhan dárbbaha hui olu eatnama, nu makkár iežá doaibmit maid hálidit daid seamma eatnamiid, bahkkejit ja figget dieid seamma eatnamiida, ja makkár konflivttat das soitet boahtit, Juuso muitala.

Badjeolbmot luhtte dutkkiide

Filmmas erenoamaš lea, ahte boazosámit luhtte dutkiide nu olu, ahte álge muitalit iežaset áššiid birra kamera ovddas.

– Min olbmot leat nu somát dan beliid, Juuso moddja.

– Dat mii lea vehá moraš lea, ahte olbmot duhtet beare dillái. Dat lea buorre ahte olmmoš duhttá dillái, muhto muhtumin galgá duostat maid bealuštit iežas, Juuso dadjá.

Filbma čájehuvvo bearjadaga Helssegis

Filbma buvttaduvvui Saisiko olla ympäristökonfliktisoppaa -fidnu oktavuođas, mii dutká biraskonflivttaid soabadallama.

Vaikke prošeakta nohká otná loahpahanseminárii Helssegis, nu dutkit áigot ain joatkit ovttasbarggu ja veahkehit Giehtaruohttasa boazosámiid. Seamma dutkijoavku leamašan maiddái erenoamaš aktiivvalaš earret eará meahciráđđehusláhkaevttohusa oktavuođas.

Porot kuuluvat tuulelle -dokumeanta čájehuvvo bearjadaga 22.1.2016 diibmu 19 Kulturguovddáš Caisas Helssegis. Ánne-Risten Juuso lea báikki alde muitaleamen dokumeantta birra.

Ánne-Risten Juuso guhke jearahallan gullo Yle Sámi Radios bearjadaga diibmu 11. Áššis eanet maid bearjadaga tv-ođđasiin!

Varrasamosat: Sápmi

Váldoođđasat

Varrasamosat

Muualla Yle.fi:ssä