Sápmi |

Olles Sámi joatkkaskuvlla leat bidjan karantenii Kárášjogas – dolle dieđihandilálašvuođa ihkku

Skuvllas galledan Davvi-Romssa joatkkaskuvlla oahppis navdet koronavirusnjoammuma.

Sámi joatkkaskuvla
Sámi joatkkaskuvla Kárášjogas lea giddejuvvon karantena dihtii. Govva: Nils John Porsanger / NRK

Buot Sámi joatkkaskuvlla oahppit Kárášjogas leat biddjon karantenii, mii bistá lávvardahkii, muitala Ávvir-aviisa. Kárášjoga gieldda heahtegearggusvuođajoavku lágidii ovdalaš gaskaija preassakonferánsa Kárášjoga gielddavisttis.

Maŋŋebárgga Sámi joatkkaskuvllas ledje guossit Davvi-Romssa joatkkaskuvllain ja ovtta oahppis ballet dál leat koronavirusa.

Maiddái guosseoahppit leat dál biddjon karantenii. Oktiibuot leat Ávvira dieđuid mielde 30 oahppi ja oahpaheaddji mielde reaissus. Kárášjoga njoammudávddaeastadandoavttir George Nasr muitala Ávvir-aviisii, ahte Davvi-Romssa oahppit leat karantenas Kárášjogas gaskavahkkui, ovdal go fas vulget ruoktot.

Buohccán oahppis lea váldon koronovirusiskkus, masa vurdet bohtosa lávvardaga rádjai. Jus oahppis lea koronavirus, áigot karantena guhkidit guokte vahku.

Oahppis lea ožžon garra gosahaga ja febera, mat vearránedje maŋŋebárgga mielde. Oahppi lea leamaš Frankriikkas ja Davvi-Italia rájá alde ja lei maid johtán togain, mii finada Davvi-Itálias, muitala doavttir Nasr Ávvirii.

Norggas leat jo 277 koronavirusnjoammuma

Vahkuloahpa áigge lei maid okta Sámi joatkkaskuvlla oahpaheaddji biddjon karantenii, go go lea johtán seamma girdiin olbmuin, geas lea koronavirusnjoammun.

Sámi joatkkaskuvla ja boazodoalloskuvla Guovdageainnus ráddje galledemiid dál koronavirusa dihtii. Otná rájes skuvla lea rabas dušše ohppiide ja bargiide.

Norggas leat gávnnahan koronavirusa maŋŋebárgga dieđuid mielde jo 277 olbmos. Norgga dearvvašvuođaeiseválddit ávžžuhitge dál šluhttet dahje sirdit dáhpáhusaid, maidda vurdet badjel 500 oassálasti, čállá VG-aviisa.

Divvojuvvon 11.3. dii 14.41: Sámi joatkkaskuvlla oahppiid karantena bistá vuos goit lávvardahkii. Muitaleimmet álggus, ahte karantena bistá vahku.

Varrasamosat: Sápmi

Váldoođđasat

Varrasamosat

Muualla Yle.fi:ssä