Sápmi |

ON ávžžuha Suoma bidjat leavttu giellaealáskahttinprográmmii ja ILO-ratifisemii

Ovttastuvvan Našuvnnaid nu gohčoduvvon ESK-komitea, mii gohccá ekonomalaš, sosiála- ja kulturrivttiid, attii Supmii ávžžuhusaid gaskavahku. Sámedikki ságadoalli Klemetti Näkkäläjärvi atná ávžžuhusaid hui mearkkašahttin ja dadjá, ahte dat bohtet rivttes áigái.

YK:n päämaja New Yorkissa.
Ovttastuvvan Našuvnnaid vuollásaš nu gohčoduvvon ESK-komitea gohccá ekonomalaš, sosiála- ja kulturrivttiid. Komitea attii Supmii ávžžuhusaid gaskavahku. Govva: Don Emmert / AFP

Ovttastuvvan Našuvnnat ávžžuha Suoma stáhta bidjat leavttu giellaealáskahttinprográmmii ja ILO-ratifiseremii.

Ovttastuvvan Našuvnnaid vuollásaš nu gohčoduvvon ESK-komitea, mii gohccá ekonomalaš, sosiála- ja kulturrivttiid, attii Supmii ávžžuhusaid gaskavahku.

Máŋga ávžžuhusa sámegiela giellaealáskahttinprográmma birra

Komitea atná sámegiela giellaealáskahttinprográmma buorre áššin, muhto ávžžuha Suoma addit dasa doarvái resurssaid ja sihkkarastit dan beaktilis ollašuhttima. Eará ávžžuhusat leat lasihit oahpaheaddjiid meari ja sihkkarastit dan, ahte oahpahusa oažžu sihke sámiid ruovttuguovllus ja dan olggobealde.

Komitea ávžžuha Suoma maid jođálmahttit ILO 169 -soahpamuša ratifiserenproseassa.

Suomas lea vihtta jagi áigi addit TSS-komiteai raportta ekonomalaš, kultur- ja sosiálarivttiid guoski ávžzuhusaid ollašuhttimis.

"Ávžžuhusat bohtet rivttes áigái"

Sámedikki ságadoalli Klemetti Näkkäläjärvi atná ESK-komitea ávžžuhusaid hui mearkkašahttin.

– Ávžžuhusat leat boahtán hui dehálaš ja rievttes áigái sihke Suoma stáhta ja sápmelaččaid dáfus. Lea dehálaš, ahte dáin ávžžuhusain manná diehtu riikkabeivviide, daningo ávžžuhusaid lea dáhálaš váldit vuhtii Ilo 169-soahpamuša ratifiserema olis. Komitea ávžžuhii hui garra deattuin olláhuhttit sámegiela ealáskahttinprográmma ja addit dasa áššáigullevaš resurssaid.

– Ávžžuhusat galget váldojuvvot vuhtii ráđđehusšiehtadallamiin, Näkkäläjärvi dadjá.

Komitea: Sámiin galgá jearrat lobi ovdalgo luondduriggodagat ávkkástallojuvvojit

Komitea giddii fuomášumi maid dálkkadatrievdamii.

– Suopma galgá váldit atnui áššáigulevaš doaibmabijuid, main sáhttá vástidit dálkkadatrievdama buktin negatiiva váikkuhusaide sámeguovllu eatnamiidda ja resurssaide.

Komitea cealká, ahte fitnodagat eai oaččo ávkkástallat sámi ruovttuguovllu luondduresurssaid sámiid lobi haga.

– Suopma galgá figgat oažžut sámiin informerejuvvon, ovddalgihtii miehtama ovdalgo priváhta fitnodagaide addojuvvo vuoigatvuohta ávkkástallat sámiid ruovttuguovllu luondduriggodagaid. Sámiid vuoigatvuohta oamastit eatnama ja ávkkástallan sin luondduresurssaid galgá sihkkarastit doarvái buorre láhkaásahemiin ja hálddahusain, komitea cealká.

Klemetti Näkkäläjärvi čalmmustahtá komitea dálkkádatrievdamii laktaseaddji ávžžuhusaid.

– Lea hui dehálaš, ahte komitea lea gidden earenoamážit fuomášumi dálkkádatrievdamii. Komitea lea vuosttaš ON:a olmmošriekteorgána, mii lea iežas Supmii addin ávžžuhusain čalmmustahttán dálkkádatrievdama ja dan biehtadahkes váikkuhusaid olmmošriektegažaldahkan. ON:a álgoálbmotraporterejeaddji lea almmatge ášši váldán ovdan juo ovdal. Suomashan dálkkádatláhka válmmaštallojuvvui nu ahte Sámediggi ii váldon oassálastit dasa, iige álbmotlaš dálkkádatrievdama vuogáiduvvanstrategiijas leat ordnejuvvon ráđđádallamat sámedikkiin, Näkkäläjärvi dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä