Sápmi |

ON dálkkádatčoahkkin álgá Espánjas – eamiálbmogat čoahkkanedje juo vahkuloahpas

Suoma Sámedikkis Tuomas Aslak Juuso lea oassálastán juo mannan bearjadaga rájes čoahkkimii.

Tuomas Aslak Juuso
Govva: Tuomas Aslak Juuso

Ovttastuvvan našuvnnaid dálkkádatsoahpamuša oassebealit čoahkkanit Madridii, Espánnjai otná vuossárgga rájes. Dát juovlamánu čoahkkin lea maŋimuš, ovdalgo nu gohčoduvvon Pariissa dálkkádatsoahpamuš boahtá fápmui jagis 2020.

ON:a dálkkádatčoahkkin lágiduvvo juohke jagi ja dasa váldet oasi ON:a miellahtoriikkat. Diibmá čoahkkin lágiduvvui Katowices, Polánddas.

Madrida dálkkádatčoahkkin lea hui dehálaš danin, go doppe vuosttas háve guorahallet, mo stáhtat čatnasit dálkkádatrievdama eastadeapmái.

Ovdamearkka dihte stáhtat galggašedje juo fállat čovdosiid dálkkádatrievdama eastadeapmái, dadjá WWF.

Máilmmi ruhtaministarat buktet ovdan sin doaibmaplána dálkkádatrievdama eastadeapmái 9. juovlamánu. Dán ruhtaministariid joavkku nubbi ságadoallin doaibmá Suoma ruhtadoalloministtar Mika Lintilä.

Sápmelaččat fárus ovddideamen álgoálbmogiid oainnu

Suoma Sámedikki nubbi várreságadoalli Tuomas Aslak Juuso mátkkoštii juo mannan duorastaga Madridii.

Álgoálbmogiid forum huksejuvvui dálkkádatsoahpamuša vuogádahkii buktit máilmmi eamiálbmogiid oainnuid boahttevaš dálkkádatsoahpamuša sisdollui.

Álgoálbmogiid forum lea dahkagoahtán oktasaš bargoplána das, mo álgoálbmot mekanisma, nappo organisašuvdna galgá bargat dálkkádatsoahpamuša ovdii.

– Mii bargat dan ovdii, ahte álgoálbmotperspektiiva gullo čoahkkimis. Álgoálbmotforumas boahtá ovdan maiddái sámiid perspektiiva ja mii geahččalit ovddidit dan, ahte álgoálbmogiid sadji, nappo nu gohčoduvvon platforma, ovdána, muitala Juuso.

Vahkuloahpas válmmaštallon, álgoálbmogiid bargoplána ovdanbuktet čuovvovaš guovtti vahkku áigge Madrida dálkkádatčoahkkimis.

– Dat addá konkrehtalaš vejolašvuođa ovdanbuktit álgoálbmogiid perspektiivvaid. Álgoálbmogat besset mielde soahpamušbargui hui vuđolaččat.

Álgoálbmogiid jietna ii leat beassan gullosii doarvái

Tuomas Aslak Juuso muitala, ahte álgoálbmogiid jietna ii leat beassan dán rádjái albmaládje mielde dálkkádatšiehtadussii.

Juuso muittuha, ahte 80 proseantta olles máilmmi biodiversitehtas lea álgoálbmotguovlluin. Dálkkádatrievdama eastadandoaimmat bohtet váikkuhit olles máilmmi álgoálbmogiidda ja stuorra oassái máilmmi luonddu birrasii.

– Álgoálbmotguovllut leat hui guovddážis das, mot seailluhit biodiversitehta ja guoskkatkeahtes luonddu dieinnalágiin, ahte dat eai leat garra váikkuhusaid vuolde.

Dál ulbmilin lea, ahte álgoálbmogiid jietna beassá gullosii.

– Mii boahtit buktit ovdan min álgoálbmogiid perspektiivva ja daid váikkuhusaid, maid mii oaidnit iežamet birrasiin. Dálkkádatrievdama eastadandoaimmat leat muhtin muddui juo lihkostuvvan álgoálbmotguovlluin, dadjá Juuso.

Juuso maiddái muitala, ahte lea dehálaš ovdanbuktit, mo sápmelaččat leat bastán seailluhit ja doalahit sin árbevirolaš ealáhusaid, mat vuođđuduvvet lundui.

Sámis Madridii leat Juuso lassin mátkkoštan Silja Karine Muotka ja Jon Petter Gintal Norgga Sámedikkis. Dán háve Ruoŧa Sámedikkis ii beassan oktage vuolgit.

Olles dálkkádatsoahpamuš ja dan struktuvra lea hui máŋggabealat ja mohkkái oba čilget, dadjá Tuomas Aslak Juuso.

Álgoálbmogiid lassin soahpamušas leat máŋggat oassebealit ja loahpalaš soahpamuša ollašuhttin lea hui viiddis proseassa. Juuso ja eará sámeovddasteaddjit oassálastet dán guovttevahkkosaš čoahkkimii ja čuvvot, mo soahpamušbargu ovdána.

– Sávan, ahte min jietna váldo viimmat vuhtii buot mearrádusaid dahkanproseassain olles dán dálkkádatsoahpamuša struktuvrras. Ja sávan, ahte doppe ipmirdit, ahte álgoálbmotforum lea oassi dán dálkkádadatsoahpamušas.

Varrasamosat: Sápmi

Váldoođđasat

Varrasamosat

Muualla Yle.fi:ssä