Sápmi |

ON olmmošvuoigatvuođakomitea moaitá Suoma stáhta sápmelaččaid rivttiid rihkkumis

Ovttastuvvan Našuvnnaid olmmošvuoigatvuođakomitea mielas Suopma lea meannudan boastut, go lea luoitán Sámedikki válgalogahallamii olbmuid Sámedikki dáhtu vuostá.

Saamen lippu
Saamen lippu Govva: Emmi Korhonen / Lehtikuva

ON moaitá Suoma stáhta sápmelaččaid rivttiid loavkašuhttimis. Ovttastuvvan Našuvnnaid olmmošvuoigatvuođakomitea oaivvilda, ahte Suoma alimus hálddahus riekti doaimmai boastut, go dohkkehii Sámedikki válgalogahallamii olbmuid Sámedikki válgalávdegotti ja Sámedikki stivrra dáhtu vuostá.

Komitea moaitámušat gusket alimus hálddahusrievtti mearrádusaid jagi 2015 sámediggeválggaid oktavuođas. Dalle alimus hálddahusriekti dohkkehii válgalogahallamii 93 olbmo, geaid ohcamušaid Sámedikki válgalávdegoddi ja stivra lei hilgon.

AHR jagi 2015 mearrádusain ledje váidalan Sámedikki ságadoalli Tiina Sanila-Aikio ja Klemetti Näkkäläjärvi Sámi Árvvut -searvvis.

Olmmošvuoigatvuođakomitea deattuhii mearrádusastis sápmelaččaid iešmearridanvuoigatvuođa. Komitea geahčai, ahte AHR mearrádusat leat váikkuhan sihke váidaleddjiid ja sámeservoša vuoigatvuhtii oassálastit Sámedikki válggaide ja Sámedikki válljemii. Olmmošvuoigatvuođakomitea maid cealká, ahte Sámediggi lea namalassii dat institušuvdna, mii lea dárkkuhuvvon várjalit sápmelaččaid iešmearridanrievtti ja dorvvastit rievtti sin iežaset gillii ja kultuvrii. Komitea mielas AHR ii lean jagi 2015 mearrádusain vuođđudan mearrádusaidis govttolaš ja objektiivvalaš kriteraide.

Olmmošvuoigatvuođakomitea ávžžuha mearrádusastis maid rievdadit sámediggelága jienastanvuoigatvuohta meroštallama dainna vugiin, ahte dat gudnejahttá sápmelaččaid siskkáldas iešmearridanvuoigatvuođa.

Dasa lassin komitea ávžžuha Suoma ollašuhttit dárbbašlaš doaimmaid eastadan dihte dán sullasaš sivila ja politihkalaš vuoigatvuođaid guoski rihkkumiid boahtte áiggis.

SD ságadoalli: Mearrádus nanne min oainnu

Sámedikki ságadoalli Tiina Sanila-Aikio lei nubbi dain, guhte váidalii AHR jagi 2015 mearrádusas.

Sanila-Aikio atná mearrádusa buorrin, go dat nanne Sámedikki oainnu.

– Dat nanne ON olmmošvuoigatvuođakomitea árvoválddiin dan, maid mii leat oppa áigge dadjan. AHR ii livčče galgan spiehkkasit sámediggelága teavsttas, dasgo dat lea mannan sámiid iešmearridanvuoigatvuođa badjel ja ráhkadan iežas “ollislaš árvvoštallama”. Dat ii lea váldán vuhtii lága sátnehámiid, iige Sámedikki válgalávdegotti fuolalaš barggu juohke ohcamuša árvvoštallamis.

Sámedikki ságadoalli Tiina Sanila-Aikio buktá mediadieđáhusas ovdan, ahte sii fertejit dál gulahallat ja ságastallat das, ahte dahket alimus hálddahusriektái mearrádusaid burginohcamuša.

– Vai oažžut ášši fas ruovttoluotta lágalažžan, cealká Sanila-Aikio.

1.2.2019 dii. 15.05 Lasihuvvon Tiina Sanila-Aikio kommeanta.

Varrasamosat: Sápmi

Váldoođđasat

Varrasamosat

Muualla Yle.fi:ssä