Säämi

Onnáá peeivi láá finniimist poccui čuálih, kyepireh já kammâseh, veik toid ij jieš peesâgin pygálysijn viežžâđ

Essi Morottaja
Essi Morottja lijkkoo kuárruđ sovskammuid. Kieđâs láá suu nubeh kammuuh, maid lii kuárrum. Govva: Anja Kaarret / Yle

Ärbivuáválij tuojij tuájáreh juátkih tuoijum, veik sist almees iä liččiigin poccuuh.

Poccust puáhtá kevttiđ masa jo puoh. Puurrâđ já tuoijuđ. Taat luhostuvá pyereest, jos alnees láá poccuuh. Talle uážžu mielâs mield ávhástâllâđ ubâ ellein.

Motomin pygálysijn láá puásuiulmui lasseen meid iäráseh peessâm uážžuđ amnâsijd, moh tääl maneh tuuvnán, ovdâmerkkân voorâ, čoolijd já kyepirijd. Onnáá peeivi ko poccuid njyevih njuovvâmsoojijn, kuus olgopiäláseh iä ubâ peesâgin, te amnâsij väldim lii máhđuttem. Tyejiamnâseh láá kuittâg uážžumist, et tuoijum ij toos nuuva.

Tuájár, nuorâ enni, Essi Morottaja lijkkoo tuoijuumist já eromâšávt sovskammui kuárumist. Sun lii kuárrum jo maaŋgâid kammuid, mut tääl sust lii uccâ páárnáš, te kuárrumist lii puddâ.

– Mun lijkkuum tast, taat lii muu mielâhommá, muštâl Morottaja.

Essi Morottaja áásá Aanaar markkânist, iäge sust tâi suu perrust lah alneest poccuuh, mut tyejiamnâsijd sun lii ain uážžum, ko lii taid tarbâšâm.

–Tääbbin láá ennuv ulmuuh kiäin láá poccuuh, ovdâmerkkân mun lâm Erkkii Joovnâst skappum kodorijd, iätá Morottaja.

Tuoijum ij kommáán toos, et iä lah tuoijumamnâseh, toh láá

Onnáá peeivi pygálysáin ij innig uážu kammâsijd nuuvtko tovle. Tääl toid njyevih nuuvt, et toh iä tuhhii kammui kuárrumân. Angel Jovnâ, Jounin Poro irâttâs iššeed, lii hoksám taan já sun lii kuškâdâm já salttim poccuu kammâsijd. Sunjin taat juurdâ, et sist uážžu muide-uv ko tuše piärgu, lâi luándulâš.

– Korrâ hommá tast lii jiemge tieđe kannat-uv taat, mut ko avepeeivi lii taan porgâm já äigi lii, te poorgâm, iätá Angeli.

Ulmuuh koijâdeh enâmustáá čoorvijd, tuoljijd já kammâsijd. Joovnâst lii lâm irâttâs nubáloh ihheed, mut sun ij lah smiettâm et stuárudičij taan, nuuvt et valmâš tävirid álgáččij kavpâšiđ.

– Jiem mun kal äälgi kammuid kuárrud, povvust Jovnâ.

Puoh älkkeemus pargo Angel Joovnâ mielâst lii čoorvijn. Toid ij taarbâš ko sáhháástiđ.

Jouni Angeli
Angel Jovnâ keejâd kamâsijd, maid lii jieš njuovvâm ja kuškâdâm. Govva: Anja Kaarret / Yle

Motomijd amnâsijd lii onnáá peeivi aaibâs muáđhuttem uážžuđ, ovdâmerkkân vyesinäähki. Harvii innig ääiđist vuásud kiđđuv poččuid já talle ko toh šaddeh miäcán, te lii vaigâd kavnâđ jáámmám vyesi, mast uážuččij näähki. Tanenpa taid ij táátu kosten finniđ já toh láá tivrâseh.

Video: Jouni Angeli
Essi Morottaja já Erkkii Jovnâ kejâdává kamâsijd.

Márfumamnâsij, čoolij já voorâ uážžum lii meid onnáápeeivi hástu, jos haalijd jieš porgâđ puoh aalgâ rääjist.

Palgâsijovdâstume Poccuupurâmušravvuuh siijđoin kávnojeh irâttâsah kost uážžu piärgu lasseen muide-uv.

Varrasamosat

Muualla Yle.fi:ssä