Sää´mjânnam |

Ortodokslaž papp tääʹvat sieʹbrkååʹddniiʹǩǩid sosiaal media pääiʹǩ

Tän ääiʹjest ij teänab leäkku nok, što papp pâi ukkad ceerkvest, peʹce feʹrttai kulstõõllâd sieʹbrkåʹddniiʹǩǩivuiʹm še ođđäiggsaž vueʹjjivuiʹm. Oummu lie ânnʼjõžääiʹjest Facebookist da Youtubest – da nuʹt lij še eʹčč Rauno.

Video: Ortodoksi pappi isä Rauno tubettaa
Video

Âʹvveeʹl siõm ortodooks ceerkvest rõssâd  eʹčč Rauno kamerain. Linss čuäʹjat vuõiʹǧǧest alttra, koozz eʹčč Rauno šiõttʼtââll jiijjâs kamera ouʹdde.

– Jos Tâʹvv-Lappi pääcc jiijjâs paapptää lij tõt ceerkav jeällma såårmâš, mušttal son kameraaʹje. 

Youtube-fiiʹlmi raajjummuš lij õhtt suu miõllsaž tuâjain. Sosiaal media âânnmõš lij pääccam õhttân ortodokslaž ceerkav tuâjjneävvan.

Ortodoksi pappi isä Rauno tubettaa
Eʹčč Rauno lij tuâjas kaunnâm ođđ vueʹjjid mušttled ceerkavlaž jieʹllmest fiiʹlmi pääiʹǩ Govva: Ville-Riiko Fofonoff / Yle

Eʹčč Rauno leʹbe Rauno Pietarinen lij tuâjas kaunnâm ođđ vueʹjjid mušttled ceerkavlaž jieʹllmest fiiʹlmi pääiʹǩ.

– Kâʹl tõt juʹn leäi õõmâs, što määŋg lie särnnam, što lie ǩiõččâm muu fiiʹlmid, jo-ba sieʹbrkåʹddneeʹǩǩ ǩeäid kuuitâǥ vuäinam täujja. Ǩiõldlaž maacctõõzz illa puettam. Ååskam, što nåkkam oummu jie ǩeâčč täid jos sij jie peerast.

Veeidas tuåimmvuʹvdd älšmâtt ođđnallšem tuâjai årra

Fiiʹlmin son mušttal aaʹššin, mõõk jie čaakkâm suu sluužvi ukkõõzzid. Fiiʹlmin še lij hiâlbb õsttâd sieʹbrkåʹddniiǩǩid pirr veeidas tuåimm vuuʹd.

– Muʹst lij veeidas tuâjjvuʹvdd, jõnn sieʹbrkåʹdd. Ânnʼjõž teknikk raajj tõn vueiʹtlviʹžžen da kâʹl mij  haaʹleep tuejjeed puknallšem aaʹššid, mâiʹd pâi lie lääʹjj mieʹldd mååžna, pååǥǥast Pietarinen.

Nuõrttsäʹmmla lie leämmaž pâʹjjel 500 eeʹǩǩed ortodooks. Tän ääiʹjest ceerkav ij leäkku teänab vueʹss arggpeeiʹv jieʹllem, leâša kuõsttu jeänab jeeʹresnallšem šõddmõõžžin.

Hilkka Fofonoff
Sieʹbrkåʹddneʹǩǩ Hilkka Fofonoff vuäinn, što sosiaaʹl media âânnmõš heiʹvvje puârast še ortodookslai  arggpeeiʹvid.  Govva: Ville-Riiko Fofonoff / Yle

Sieʹbrkåʹddneʹǩǩ Hilkka Fofonoff vuäinn, što sosiaaʹl media âânnmõš heiʹvvje puârast še ortodookslai  arggpeeiʹvid. 

– Kâʹl tõk liâ muu miõlâst tõid vuäitt tok piijjâd. Oummu kook haaʹlee tõid ǩiõččâd, sij vueiʹtte tõid ǩiõččâd. Jiõm mon vueiʹn, što tõt leʹčči samai hueʹnn äʹšš, ko måtamhan liâ ko jie ceerkva peäss. Nuʹt teʹl-han sij vueiʹtte tõid ǩiõččâd še, särnn Hilkka Fofonoff.

Čueʹđi mieʹldd teemm juʹn valmmšen vueiʹvest

Lääʹddjânnam ortodokslaž ceerkav vaʹlljii Lappi sieʹbrkååʹdd eʹčč Rauno tän eeʹjj tuâjjliʹžžen nuʹtt-i täid fiiʹlmi diõtt.

Rauno Pietarinen
Lappi sieʹbrkååʹdd eʹčč Rauno vaʹlljeeš tän eeʹjj tuâjjliʹžžen nuʹtt-i täid fiiʹlmi diõtt. Govva: Ville-Riiko Fofonoff / Yle

Tõt lij älšmâttam suu juäʹtǩǩed õinn fiiʹlmi raajjummuž.

– Muʹst lie čueʹtt teeʹmm miõlâst võl puõʹttivuõʹtte. Täävtõssân leʹčči tuejjeed fiiʹlmid pirr ceerkaveeʹjj da ǩiõttʼtõõllâd jieʹllem jeeʹresnallšem šõddmõõžžid mâʹte vieʹnc da jääʹmmem. Täk lie mättʼtõõzz ceerkavlaž jieʹllmest, nuʹt teolooglaž di konkreettlaž jieʹllmest.

Varrasamosat: Sää´mjânnam

Váldoođđasat

Bivnnuhamosat

Varrasamosat

Muualla Yle.fi:ssä