Sápmi |

Otne lea maŋimuš ovdajienastanbeaivi gielddaválggain – Guldal dás dovdduid Anára jienastanbáikkis

Yle Sápmi sádde válgaságaid maŋŋebárggas bearjadahkii.

Emma Nokela
Emma Nokela beasai dál vuosttas geardde jienastit Anár gielddas. Govva: Susanna Guttorm / Yle Sápmi

Otne maŋŋebárgga lea maŋimuš beaivi jienastit gielddaválggain ovddalgihtii. Gielddaválggat doaimmahuvvojit sotnabeaivve, ja dalle čielgá, geat mearridit du gieldda áššiin čuovvovaš njeallje jagi.

Anár girkosiidda jienastanbáikkis Sámekulturguovddáš Sajosis lea leamašan hušša. Emma Nokela lea aiddo fárren gildii, ja beasaige dál jienastit vuosttas geardde Anára gielddaválggain.

Sutnje dehálaš áššit leat luonddusuodjaleapmi ja dásseárvu. Sus leat oahpes olbmot maid evttohassan, muhto dán vuoro son gávnnai iežas evttohasa válgamášena bokte.

– Dat evttohas bođii oalle čielgasit válgamášena bokte, moai letne munnje dehálaš áššiin ovttaoaivilis, de dan bokte jienastin su, muitala Nokela.

Guldal Emma Nokela jearahallama dás. Jietna: Susanna Guttorm / Yle

Anárlaš Hannu Kangasniemi ii leat nu áŋgir čuovvut gielddapolitihka, muhto finai goit jienasteamin.

Hannu Kangasniemi
Hannu Kangasniemi ii čuovo nu dárkilit gielddapolitihka. Govva: Susanna Guttorm / Yle Sápmi

Sutnje bellodat ii leat dat dehálamos ášši, go vállje evttohasa.

– Dihto láhkai dat veháš sáhttá gal váikkuhit mu jienasteapmái, muhto mu mielas olmmoš lea dehálaš gielddapolitihkas. Dieđusge, go lean Anáris bajásšaddan, de gal oahpes olbmo jienasta, gean navdá ahte dat sullii guottiha seamma jurdagiid, go mat mus alddán leat, muitala Kangasniemi.

Guldal Hannu Kangasniemi jearahallama dás. Jietna: Susanna Guttorm / Yle

Yle Sápmi sádde válgaságaid maŋŋebárggas bearjadahkii diibmu 15.00–16.00 gaskkas radio njuolggosáddagis.

Evttohasaid oaiviliidda sáhttá oahpásmuvvat Yle válgafálaldagaid bokte

Gielddaválgaevttohasaid oaiviliidda sáhtát oahpásmuvvat Yle válgamášiinna bokte. Válgamašiidna lea fállun suomagillii, ruoŧagillii, eaŋgalsgillii, ruoššagillii ja davvisámegillii. Davvisámegielat gažaldagat leat fállun sámeguovllu gielddain Anáris, Eanodagas, Ohcejogas ja Soađegilis, ja dasa lassin Suoma stuorimus gávpogiin dego Helssegis, Tamperes, Turkus, Jyväskyläs, Oulus ja Roavvenjárggas.

Kuntarundi-nammasaš válgaságastallamiid sáhttá guldalit Yle Areenas. Kuntarundis leat 294 oasi, main beassá vuodjut iešguđet gielddaid politihkalaš gažaldagaide. Juohke oasis leat golbma evttohasa ságastallamin ja ságastallama jođihit Yle guovlodoaimmaheaddjit.

Yle Sápmi lea buvttadan ságastallamiid sámegielddain ja Ohcejoga gieldda oasil ságastallan lea ordnejuvvon sihke davvisáme- ja suomagillii.

Gielddaválggat doaimmahuvvojit geassemánu 13. beaivve.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä