Sápmi |

Oulu gávpogii evttohit, ahte dat luohpá plánejuvvon sámeluohkás seasttuid dihtii

Gávpot ii dán muttus kommentere evttohusaid seasttuin, maid konsultafitnodat lea čohkken gávpoga ekonomiijaraportii.

Oulun kaupungintalo.
Oulu gávpogis leat ohcamin seasttuid, daningo gávpoga sisaboađut eai govčča goluid. Arkiivagovva Oulu gávpotviesus. Govva: Yle / Risto Degerman

Oulu gávpoga árvalit seastit resurssaid, jus dat luohpá guvlui plánejuvvon suoma-sámegielat luohkás. Oahpahus ii leat vel beassan álgitge.

Oulu gávpot lea diŋgon olggobeale konsultafitnodagas ekonomiijaraportta, mas oktan seastinvuohkin evttohit luohpat sámegielat luohkás. Dainna árvalit seastit 70 000 euro jagiin 2020–2023.

Ekonomiijaraportta lea dahkan Perlacon-konsultafitnodat. Raportii leat čohkken vugiid, mo gávpot sáhtášii seastit ja lasihit sisaboađuid oktiibuot 50 miljon euro ovddas.

Raporttain leat maid háliidan fidnet ollislaš áddejumi gávpoga ekonomiijas. Stuorámus golut šaddet čuvgehus- ja kulturbálvalusain ja buresveadjinbálvalusain.

Maŋŋebárgga almmustahtton raporttas leat badjel 120 evttohusa doaimmain, maiguin Oulu gávpoga ekonomiija sáhtášii buoridit. Raporta gávdno Oulu gávpoga neahttasiiddus.

Sámeluohkás luohpama lassin ovttaskas seastinvuohkin leat evttohan maiddái earret eará ođđa gávpotsihkkeliin luohpama. Perlacon Oy:s dadjet, ahte sámegielat oahpahus ii leat bákkolaš, ja danin dat lea merkejuvvon ovttaskas seastinvuohkin.

Gávpot ii kommentere ovttaskas evttohusaid

Oulu gávpotjođiheaddji Päivi Laajala deattuha, ahte raporta lea sorjjasmeahttun oassebeali iežas evttohus. Seasttuid galget goittot ohcat, daningo gávpoga sisaboađut eai govčča goluid.

– Eat dán muttus kommentere ovttaskas evttohusaid. Oaččuimet loahpparaportta maŋŋebárgga ja mis lea dárkkuhus dál gávpoga beales dasa vuodjut ovttas politihkalaš mearrideaddjiin. Dan maŋŋá gieđahallagoahtit detáljaid.

Joatkkadoaimmain mearridit, go raportta evttohusaid leat dárkilabbot válmmaštallan ja doarvái árvvoštallan. Seasttuin álggahit lagaš áiggiid maiddái oktasašdoaibmameannudeami (su. yt-menettely).

Ain sáhttá almmuhit máná suoma-sámegielluohkkái

Dálá mearrádusaid mielde Oulus álggahit guovttegielat suoma-sámegielluohká čakčat 2020, jus oahpahussii almmuhuvvo guhtta oahppi. Oahpahus lea 1.–2. luohkáide. Oahpahusa leat mearridan geahččalit jagi 2025 rádjái.

Almmuheapmi Oulu suoma-sámegielluohkkái nohká 31.1.2020.

Varrasamosat: Sápmi

Váldoođđasat

Varrasamosat

Muualla Yle.fi:ssä