Sápmi |

Oulus ii álggege plánejuvvon suoma-sámeluohkká – ovttage oahppi eai almmuhan luohkkái

Plánan lei vuođđudit suoma-sámeluohká goit viđa jahkái, muhto oahppit eai gávdnon, dieđiheamis fuolakeahttá.

Bustávvatávvalat leat almmuhuvvon Sámedikki neahttasiidduin.
Vaikko sámeluohkká ii ollašuvage boahtte čakčii, de Oulu gávpot fállá sámegiela oahpahusa juohke luohkkái guokte diimmu vahkus. Govva: Sámediggi

Oulus ii álggege suoma-sámeluohkká boahtte čavčča, dego ledje plánen. Oulu gávpot lei lohpidan álggahit suoma-sámeluohká vuosttas ja nuppi luohkálaččaide boahtte čavčča.

– Oktage oahppi ii gávdnon, muitala vuođđoskuvlaoahpahusa hoavda Marjut Nurmivuori.

Jurddan lei vuođđudit suoma-sámeluohká goit viđa jahkái Knuutilankangas skuvlii. Luohká leat plánen moadde jagi.

Oulu Sámit searvvi ságadoalli Tiina Mattanen lea behtton.

– Mii buohkat leat behtton, go mii leat garrasit bargan suoma-sámeluohká ovdii maŋimuš jagiid áigge.

Searvvis eai vel dieđe, áigotgo ain ovddidit luohká ceggema.

– Mii eat leat vel searvvis hállan dan birra ollenge, oažžu oaidnit maŋŋelebbos. In dieđe mo dat manná gávpoga bealis, boahtágo šat boahttevuođas oba vejolašvuohtage ovddidit ášši, smiehttá Mattanen.

Almmuhanáigi suoma-sámeluohkkái nogai ođđajagimánu loahpas. Čuvgehusdoaibma vikkai juohkit dieđu luohká birra ovttas Oulu Sámit -servviin, muhto lihkká oahppit eai gávdnon.

Nurmivuori mielde goit boahtte lohkanbaji oasil lea čielggas, ahte suoma-sámeluohkká ii vuođđuduvvo.

– Oulu gávpot fállá sámegiela oahpahusa juohke luohkkái guokte diimmu vahkus. Ammal dat lea vánhemiid mielas doarvái, smiehttá Nurmivuori.

Helssegis álggahuvvui sámeluohkká čakčat 2018. Dat maiddái bálkkašuvvui Sámi gielladahku -bálkkašumiin juovlamánus.

Varrasamosat: Sápmi

Váldoođđasat

Varrasamosat

Muualla Yle.fi:ssä