Sápmi |

Outi Pieskii stuorra bálkkašupmi Suoma kulturfoanddas – giitá gudnis, man lea ožžon

Govvadáiddár oaidná bálkkašumi dovddastussan sihke sámekultuvrii ja sutnje persovnnalaččat.

Outi Pieski
Govvadáiddár Outi Pieski dáidaga temát laktásit máŋgii davvi lundui ja sámi kultuvrii. Govva: Suoma Kulturfoanda

Govvadáiddár Outi Pieski oažžu Suoma Kulturruhtarádjosis 35 000 euro sturrosaš bálkkašumi.

– Bálkkašupmi addojuvvo áiggehis áiggi čuolmmaid čuolmmadeaddjái, davvi luonddu ja olbmo bealušteaddjái sánehis historjjá eallin dahkamis, Suoma Kulturruhtarádjosis dieđihit.

Pieski lea dovddus installašuvnnain, málagovain ja fotogovain, maid temát laktásit davvi lundui ja sámi kultuvrii.

Pieski illuda stuorra bálkkašumi oažžumis ja oaidná dan dovddastussan sihke sámekultuvrii ja sutnje persovnnalaččat.

– Lea earenoamáš fuomášit, ahte sápmelaččaid áššit ja sámiid vuoigatvuođat leat dehálaččat maid váldokultuvrra oainnus. Dán áigge eamiálbmogiid vuoigatvuođat eatnamii, iežas kultuvrii ja birgejupmái leat globála áššit, ja váikkuhit birgemii dálkkádatnuppástusa áigge.

En del av Outi Pieskis verk på Venedigbiennalen 2019.
Outi Pieski dáidda. Govva: Yle/Eva Lamppu

Outi Pieski oaidná bálkkašumi oažžuma earenoamážin maid danin, ahte dan juolludit máŋggalágan kultursuorggiid ovddasteaddjiide.

Jagis 2019 bálkkašumi adde njealji olbmui mearkkašahtti kulturdaguin. Dalle bálkkašumi mieđihedje emeritaprofessor Liisa Keltikangas-Järvinenii, govvadáiddár, girječálli Mauri Kunnasii, riektebátnedoavttir Helena Rantai ja musihkkaráđđeolmmoš Marjukka Riihimäkii.

– Dát ii leat dušše dáiddabálkkašupmi, muhto dat laktása oppalaččat Suoma kultureallimii. Bálkkašumi sáhttet oažžut dáiddáriid lassin maiddái dutkit, čilge Pieski.

Ovttasta dáidagisttis doloža ja dáláža

Govvadáiddár Outi Pieski lea bajásšaddan Helssegis ja válmmaštuvvan Govvadáiddaakademiijas. Son lea stuđeren sámi duoji Sámi oahpahusguovddážis Anáris. Dán áiggi son orru ja bargá sihke Mátta-Suomas ja Ohcejoga Dálvadasas.

Pieski oaččui jagis 2017 Suoma Dáiddaakademiija bálkkašumi ja oassálasttii jagi 2019 Suoma paviljonga dáiddaduoji ollašuhttimii Venezia biennálas.

Dáidagisttis Pieski lea ovttastan sámi duoji dološ ivnniid, hámiid ja vugiid dálá dáidaga árbevieruide. Pieski dáidaga guovddáš fáttat leat sámiid historjá ja boahtteáigi, eamiálbmogiid vuoigatvuođat, oktavuohta lundui, dásseárvu ja bistevaš ovdáneapmi.

Pieskin taideteos.
Outi Pieski dáidda. Govva: Jussi Koivunoro / YLE

– Su málagovain čuovgá davvi čuovga ja daid duogážis leat áigeguovdilis temát, Suoma Kulturruhtarádjosa dieđáhusas čuožžu.

Ovdamearkka dihte Lux Helsinki – čuovgadáiddadáhpáhusas jagis 2017 Helssega duopmogirku lásain čáhcerávdnjin golgan čuovgadáidda čalmmustahtii čázi geavaheami ja luonddu suodjaleami gažaldagaid.

Guldal Outi Pieski jearahallama Yle Sámi iđitsáddagis 28.2.2020.

Varrasamosat: Sápmi

Váldoođđasat

Varrasamosat

Muualla Yle.fi:ssä