Sápmi |

Ovcci olbmo bargagohtet Sámi filbmaofelažžan – dahket rávvagiid sápmelaččaid guoski filbmabuvttademiide

KulturSápmi-konferánssa oktavuođas dán vahkus ásahuvvui ođđa sámefilmma áššedovdijoavku, "Sámi Filbma Ofelaččat".

Ken Are Bongo, Jannie Staffansson, Anne Lajla Utsi, Suvi West, Siljá Somby, Patrica Fjellgren, Oskar Östergren, Amanda Kernell, Lisa Marie Kristensen.
Sámi Filbma Ofelaččat: Ken Are Bongo, Jannie Staffansson, Anne Lajla Utsi, Suvi West, Siljá Somby, Patrica Fjellgren, Oskar Östergren, Amanda Kernell, Lisa Marie Kristensen. Govva: Marie Louise Somby

Internašunála Sámi Filbmainstituhtta (ISFI) ja Sámi Filbmabargiid Searvi leat ásahan ođđa sámefilmma áššedovdijoavkku "Sámi Filbma Ofelaččat".

Joavku ásahuvvui dán vahkkus Gironis KulturSápmi-konferánssa oktavuođas. Konferánsii čoahkkanedje kultur- ja dáiddasuorggi olbmot miehtá Sámi.

Sámi filbmaofelažžan bargagohtet ovcci olbmo: Ken Are Bongo, Jannie Staffansson, Anne Lajla Utsi, Suvi West, Siljá Somby, Patrica Fjellgren, Oskar Östergren, Amanda Kernell ja Lisa Marie Kristensen. Joavkku prošeaktajođiheaddjin bargá Jannie Staffansson.

Joavku hábmegoahtá rávvagiid sámi filbmabuvttademiid váras. Rávvagat leat oaivvilduvvon sihke sámeservodaga olggobeale filbmabuvttadeaddjiide, geat áigot filbmet Sámis, davviriikkaid filmaruhtadeaddjiide ja maiddái sámeservodaga iežas filbmadahkkiide.

Rávvagiid almmustahttin ja filbmakonferánsa giđđat 2020

ISFI direkteavra Anne Lajla Utsi illuda ođđa sámi filbmafágalaš joavkkus ja das, ahte sámi filbmaealáhus dál ieš bidjá eavttuid bargamii.

– Mii vásihit eambbo ja eambbo beroštumi sámi sisdollui olggobeale filbmaealáhusas ja danne oaidnit duohta dárbbu ásahit oktasaš sámi filbmapolicy (sá. doaibmarávvagiid), mii sáhttá láidestit filbmabuvttademiid Sápmái ja duohta ovttasbargui sámi filbmaealáhusain, lohká Utsi.

Anne Lajla Utsi
Internašunála Sámi Filbmainstituhta jođiheaddji Anne Lajla Utsi illuda sámefilmma ofelaččain. Govva: ISFI

Sámi Filbmabargiid Searvvi jođiheaddji Patricia Fjellgren lea fuolas das, go sámefáttáin buvttaduvvojit filmmat, mat eai ane árvvus sámekultuvrra. Danin lea dehálaš, ahte olggobeale buvttadeaddjiide lea ofelaš.

– Dárbbašuvvo guide (sá. ofelaš), mii rávve buvttadeaddjiid, movt sáhttet lahkonit Sámi vai garvet stereotiippalaš govvidemiid, lohká Fjellgren.

Sámi Filbma Ofelaččaid rávvagat almmustahttojit njukčamánus 2020. Boahtte giđa ordnejit maiddái Ofelaš-filbmakonferánssa Guovdageainnus. Konferánsii bovdejit sihke filbmadahkkiid ja ruhtadeaddjiid.

Sámit váldon vuhtii maid Suoma ehtalaš filbmanjuolggadusain

Lappi filbmakomišuvdna almmustahtii jahki dassái Suoma vuosttas ehtalaš njuolggadusaid filbmabuvttadeapmái. Dáid Code of Conduct -rávvagiid addet buot filbmabuvttadusaide, mat bohtet Lappi filbmakomišuvdnii.

Njuolggadusat sisttisdollet osiid maiddái sámekultuvrra gudnejahttimis. Dán oasis njuolggadusaid dahkamis lei áššedovdin Internášunala Sámi Filbmainstituhtta.

Njuolggadusat muitalit, ahte sápmelaččat leat Eurohpa áidna eamiálbmot ja sis lea Suoma vuođđolága suodji. Njuolggadusaid mielde sámekultuvrra govvemiid vuođđun galgá leat rehálašvuohta, duohtavuohta ja heivvolašvuohta. Govvemiid oktavuođas gálgá váldit vuhtii ja gudnejahttit sápmelaččaid oamastanrievtti buot iežaset kultuvrii gullevaš áššiide.

Code of Conduct -njuoggadusaid mielde sámi festiválain ja almmolaš dilálašvuođain govven lea dábálaččat ortnegis. Priváhta doaluin govvemii galgá goittotge álo leat lohpi. Jos govva dahje video lea sápmelaččaid birra, de olbmot dain galget leat sápmelaččat. Dán oktavuođas njuolggadusain čujuhuvvo sámiid govvenrávvagiidda, Sámi Photograhpy Guidelines, mat leat dahkkojuvvon ovttas Sámedikkiin.

Sápmelaččaide galgá Code of Conduct -njuoggadusaid mielde maid addit vejolašvuođa oažžut ávkki sin govaid, muitalusaid ja dieđuid geavaheamis filmmain. Njuolggadusat ávžžuhit bálkáhit sámi filbmadahkkiid guovddáš bargguide filmmaide, mat muitalit sámiid birra. Sámiid bálkáheapmi sihke čájahallin ja eará bargin veahkeha ehtalaš njuolggadusaid čuovvuma sihkkarastimis.

Varrasamosat: Sápmi

Váldoođđasat

Varrasamosat

Muualla Yle.fi:ssä