Sápmi |

Ovdalaš ságadoalliin guhkes bajit – Sanila-Aikio ii sihkkar álgágo evttohassan čakčat

Pekka Aikio doaimmai sámedikki ságadoallin 12 jagi ja ja Klemetti Näkkäläjärvi badjel 7 jagi. Aikio lei maid Sámi parlameantta ságadoallin guhtta jagi. Tiina Sanila-Aikio ii leat vel sihkkar leago su ulbmilin doaibmat ná guhká sámedikki njunušin.

Tiina Sanila-Aikio
Tiina Sanila-Aikio válljejuvvui sámedikki ságadoallin ovcci mánnui jagis 2015. Govva: Pirita Näkkäläjärvi / Yle

Sámedikki ođđa ságadoalli Tiina Sanila-Aikio doaibmabadji sámedikki ságadoallin lea dušše ovcci mánu.

Ovddeš sámedikki ságadoallit Pekka Aikio ja Klemetti Näkkäläjärvi čohkkájeigga guhkes bajiid: Aikio 12 jagi ja Näkkäläjärvi badjel 7 jagi.

Sámi parlameantta áigge Pekka Aikio gearggai leat jo ságadoallin guhtta jagi.

"Garra golbma jagi leat duohken"

Tiina Sanila-Aikio ii leat vel sihkkar álgágo evttohassan sámedikki válggain čakčat.

– Mun ferten smiehtadit dan. Dat lei stuorra beahttašupmi, ahte mii eat garra barggu maŋŋá ožžon sámediggelága ođasteami ja ILO-soahpamuša ratifiserema čađa. Ja dat ahte, mii duođaid lea min sajádat Suomas, dan ferte guorahallat gal bures, dajai Sanila-Aikio lávvardaga válljema maŋŋá.

– Garra golbma jagi leat duohken. Lean leamašan oahpaheaddjibarggus ja dáppe sámedikkis ja leamašan stuorra láhkapakeahtat barggu vuolde. Lean guktuid garra bargguid bargan oktanaga. Dieđusge dál lea aibbas earálagan dilli, go lean beaivválaš barggus ságajođiheaddjin, ahte ii dárbbaš máŋggaid áššiid bidja oktii. Ja dieđusge seamma áigge leat bearáš ja eaktodáhtolaš barggut. Dán mearrádusa smiehtadeapmi lea leamašan lossat, ferten gal dadjat. Hálidan vuoa guldalit mu bearraša. Mu dehálamoš ašši lea doppe ruovttus, mu nieida ja son boahtá vuostamužžan.

– Mun in dál máhte vástidit dasa, ahte álggango mun evttohassan čuovvovaš válggain vai in. Inhan mun leat dat gii mearrida, ahte mun álggan čuovvovaš sámedikki ságajođiheaddjin. Dat dárbbaša váldegirjji sámeálbmogis ja dasto vel nuppi váldegirjji sámedikki lahtuin.

Sámi parlameantta ságadoallin leamašan nuortalaš, anáraš ja nissonolmmoš

Matti Sverloff
Nuortalaš Matti Sverloff doaimmai Sámi parlameantta ságadoallin jagiid 1975 ja 1977–1979. Govva: Saa'mi Nue'tt
Tiina Sanila-Aikio lea vuosttas nuortalaš ja vuosttas nissonolmmoš ságadoallin namalassii sámedikki áigge.

Sámi parlameantta áigge ságadoallin gal leaba doaibman sihke nuortalaš ja nissonolmmoš.

Nuortalaš Matti Sverloff lei sámi parlameantta ságadoalli njeallje jagi 1975 ja 1977–1979. Irja Seurujärvi-Kari lei sámi parlameantta ságadoalli jagiid 1984–1985.

Sámi parlameanttas leamašan maid anáraš ságadoalli, Matti Morottaja, oktiibuot guhtta jagi 70–90-loguin.

Varrasamosat: Sápmi

Váldoođđasat

Varrasamosat

Muualla Yle.fi:ssä