Sápmi |

Ovttaveardásašvuođaáittardeaddji: Eanodaga árrabajásgeassimis leamaš dilli, mii lea ovttaveardásašvuođalága vuostá

Ovttaveardásašvuođaáittardeaddji lea cealkán Gárasavvona guoski váidagis, man mielde sámegielat mánná ii leat ožžon čakčat 2020 sámegielat árrabajásgeassima nu mo giella- ja ovttaveardásašvuođaláhka geatnegahttá.

Jakobstads stadsdirektör Kristina Stenman.
Kristina Stenman muittuha, ahte vaikko árrabajásgeassima ordnejeaddjis ii leat geatnegasvuohta dahkat ovttaveardásašvuođaplána de liikká dan galgá váldit vuhtii. Govva: Yle/Juha Kemppainen

Ovttaveardásašvuođaáittardeaddji oainnu mielde Eanodaga gielda lea rihkkon ovttaveardásašvuođalága mannan dálvvi. Sáhka lea Gárasavvona dievasmahtti ovdaoahpahusas.

Gárasavvonlaš váhnen ozai iežas mánnái mannan čavčča saji sámegielat mánáidgárdedoibmii eahketbeivviide, go mánná galggai álggahit ovdaskuvlla, muhto Eanodat gielddas ii lean fállat sámegielat dievasmahtti árrabajásgeassindoaimma. Son váiddii ášši ovttaveardásašvuođaáittardeaddjái, go ášši ii čoavdašuvvan gielddain ráđđádallamiin.

Ovttaveardásašvuođaáittardeaddji cealkámuša mielde Eanodaga gieldda doaimmat leat leamašan eahpevuoiggalaččat sámegielat máná ektui ja bargan ovttaveardásašvuođalága 13 paragráfa vuostá.

Gielddat galget maiddái árrabajásgeassinlága mielde ordnet sámegielat mánáide árrabajásgeassima sin eatnigillii buot guovlluin Suomas. Sámi giellaláhkages geatnegahttá eandalit sámeguovllu gielddaid ordnet sámegielat bálvalusaid.

– Dát dilli ii leat leamašan vuoiggalaš. Beaiveruovttus lea leamašan bargi, guhte máhttá muhtin veardde sámegiela, muhto ii goittotge leat leamašan sámegielat olmmoš, muitala ovttaveardásašvuođaáittardeaddji Kristina Stenman ášši duogážis.

Gielddain geatnegasvuohta fuolahit giellalága ollašuvvamis

Ovttaveardásašvuođaáittardeaddji Kristina Stenman muittuha, ahte vuođđooahpahusa oasil lea gielddaid geatnegasvuohtan dahkat ovttaveardásašvuođa várás plána, ja sámegielddain sámegielat gielalašrivttiin ollašuvvan lea dehálaš oassi das.

Maiddái virgeolbmot leat geatnegahtton čuovvut ja ovddidit ovttaveardásašvuođa ollašuvvama.

– Árrabajásgeassima ordnejeaddjis ii leat geatnegasvuohta dahkat ovttaveardásašvuođaplána, muhto liikká ferte ovddidit dan ja fuolahit das, ahte gielalaš rievttit ollašuvvet. Lea dehálaš, ahte gielddat plánejit daid bures, deattuha Stenman.

Dili evttohit čoavdit soabademiin

Eahpevuoiggalaš dilli Gárasavvonin bisttii sullii jahkebeali. Eanodaga gielda ordnii sámegielat dievasmahtti árrabajásgeassima Gárasavvonii easkka giđđat 2021.

Ovttaveardásašvuođaáittardeaddji evttoha Eanodaga gieldda ja guoddaleaddji čoavdit dili soabademiin. Soabadallama oktavuođas Eanodaga gielda galgá čatnasit dasa, ahte ordne sámegielat árrabajásgeassima ovttaveardásaččat suomagielat árrabajásgeassimiin ja čatnasa maiddái čuovvut ovttaveardásašvuođalága vealahangildosa.

Eanodaga gieldda árrabajásgeassinhoavda Sarita Helttunen ii kommentere ášši, ovdalgo gielda lea gieđahallan dan. Helttunen muitala, ahte gielda gieđahallá ášši ovdal skábmamánu loahpa.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä