Sää´mjânnam |

Pääʹccam škooulveär ooudči jeänab viõǥǥ nuõri jeäʹǩǩespeeiʹvid – Aanrest smiõttât, mäʹhtt äuʹǩǩed pâʹjjelmeärrsaž veär

Kuʹǩes škooulpeeiʹv lââʹssen mäŋggsin lij ooudâs še taksimäʹtǩǩ dååma da porrmõš njââddče še jeäʹǩǩespeeiʹvin.

Inarin koulussa maistuu kouluruoka

Aanrest lij porrmõʹššân ǩiiuǥanmääʹrf da tät njäʹlste puârast obb škooul mättʼtõõđjid. Täʹst muʹšttal ouddmiârkkân uʹcc bionjeäʹššleʹtt. Škooulpeeiv ääiʹj taʹrjjuum porrmõõžž jieʹt kuâđđjed poorrâǩani.

– Jiõm juʹn kuäʹss kuõđđu porrmõõžž. Pooram puk, mâiʹd vääldam, mušttal 8.klaassneǩ Johanna Kumpuniemi.

Johanna Kumpuniemi
Johanna Kumpuniemi poorr jiijjâs škooulveär juõʹǩǩ peiʹvv. Govva: Vesa Toppari / Yle

Aanar škooulneeʹǩ tieʹtte puârast, mäʹhtt pääʹccam veär ij šâdd.

– Måtmešt kuâđđjam måtam pååttaǩmoʹssjõõzz jos pääcc. Jiõm tuʹǩǩad nuʹt jiânnai vuõivâskaassest. Leâša jiõm vääld nuʹt jiânnai, što õõlǥči kuâđđjed porrmõõžž, smeâtt 7.klaassneǩ Ainomaija Mäenpää.

Ainomaija Mäenpää
7.klaassneǩ Ainomaija Mäenpää mušttad pukid, što veärrtiʹsǩǩe väʹlddet pâi nåkkam mieʹrr porrmõõžž ko vââjj poorrâd. Govva: Sara Wesslin / Yle

Pääʹʒʒam veärast porrmõõžž še jeäʹǩǩespeeiʹvin?

Aivv juõʹǩǩ Lääʹddjânnam škooulâst äʹšš ij kuuitâǥ leäkku nääiʹt puârast.

Škooulporrmõõžž pääcc kõskkmiârsânji jiânnai da tõn juätkkââʹnnmõʹšše koiʹttjed smiõttâd ođđ vueʹjjid. Ouddmiârkkân Joroinen škooul Kõskk-Lääʹddjânnmest lij seeilteškuäʹttam pääʹccam porrmõõžž da sij taʹrjjee peiʹvv-veär še jeäʹǩǩespeeiʹvi ääiʹj

Tän neäʹttlest lij še väʹlddkåʹddsaž Hävikkiviikko, leʹbe pâʹjjelmeärrsaž porrmõõžž neäʹttel, mõin haaleed oummid smiõttâd jeänab porrmõõžž âânnmõõžž. Ouddmiârkkân takai ooumaž âlgg smiõttâd, mõõn jiânnai jiijj porrmõõžžin pääcc njeäʹšš, ij-ǥa veär pääʹcced poorrâdǩani.

Inarin koulussa maistuu kouluruoka
Aanar škooulâst mättʼtõõđi poʹrre puârast porrmõõžž ij-ǥa pâʹjjelmeärrsaž porrmõõžž kuâđđjet. Govva: Vesa Toppari / Yle

Tän peeiʹv škooulniiǩǩin peiʹvv vuäitt võõnnâd kuʹǩǩen jeäʹǩǩäpeivva. Aanar škooulâst päärna da nuõr vuäʒʒa kõskkveär, leâša jõnsab veärr leʹčči šiõǥǥ juʹrdd nuõr miõlâst.

– Kâʹl tõt leʹčči sami šiõǥǥ. Škooul kõskkveär lie måtmešt sami hueʹnn. De škooulpeeiʹv lie kuʹǩǩ da pääcc täujja neäʹlǧǧ. Muʹst lij kuʹǩes taksimäʹtǩǩ dååma da jos ij vuäʒʒ porrmõõžž, de lij iimžõs iʹstted aautost, särnn Ainomaija Mäenpää.

Še Aanar kååʹddest juʹrdded ođđ vueʹjjid ââʹnned auʹǩǩen pâʹjjelmeärrsaž porrmõõžž. Pääʹccam porrmõõžži juätkkâânnmõš iʹlla kuuitâǥ nuʹt õõutǩeârddsaž äʹšš.

Marika Liimatainen Inarin ruokapalvelukeskukselta.
Aanarkååʹdd veärrkääzzkõõzzi jååʹđteei Marika Liimatainen haaʹleči viikkâd ooudâs kååʹdd poorrâmkääzzkõõzzid. Govva: Vesa Toppari / Yle

Aanar kååʹdd veärrkääʹzzkõsjååʹđteei Marika Liimatainen mieʹldd Aanrest jie leäkku mašinaid da resuurs tän ääiʹjest porrmõõžž ođđešt tarjjummša.

– Veärraaunâslääʹǩǩ mieʹldd liõgg porrmõõžž ij vuäitt seillted, ko pâi neellj čiâss. Mij leäʹp smiõttâm, što jos leʹčči ǩii-ne ålggbeäʹlnn, ǩii vuäittči smiõõttâd miʹjjivuiʹm õhttsažtuâj tän ääʹššest, smeâtt Liimatainen.

Inarin keskuskeittiö Ivalossa
Aanar kååʹdd škooulin tarrjet määŋgpeällsaž porrmõõžžid. Govva: Vesa Toppari / Yle

Lääʹddjânnmest porrmõõžži raajjummuž rääjte jiânnai lääʹjj. Ouddmiârkkân liõgg veär feʹrttai čuäckkeed ouddâl, ko tõn taʹrjjeed oʹđđešt. Aanar kååʹddest feʹrttječi še smiõttâd ođđešt, mäʹhtt jååʹđtet porrmõõžžid pääiʹǩest nobba da ǩii väʹldd huõl veär tarjummšest.

Veärrkääzzkõõzzâst haaʹleʹči kuuitâǥ tuejjeed nuõrid näkkam vuäittmõõžž.

– Täʹst lie jiânnai ääʹšš, mõõk feʹrttai selvvted, što vuäʒʒap-a mij riâššad näkkam tarjjõõzz. Tääzz taarbšet še Aanar kååʹdd čuõvtemluʹvddkååʹdd vieʹǩǩ, särnn Marika Liimatainen.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä