Sápmi |

Paleface mielde Ellos Deatnu! -doarjjakonsearttas – "Lea oalle heahpatlaš ášši dákkár riikkas"

Suomas dovddus rap-artista Paleface oassálastá suoidnemánu loahpas Ellos Deatnu! -joavkku doarjjakonsertii, mii lágiduvvo Ohcejoga Busteldearpmis. Paleface lea fuolas sápmelaččaid sajádagas 100-jahkásaš Suomas, ja govvida unnitlogu dili heahpatlažžan muđui ovdánan riikkas.

Paleface, eli Karri Miettinen
Govva: Tiina Jutila / Yle

Ellos Deatnu! -joavku ordne Ohcejoga Busteldearpmis doarjjakonseartta suoidnemánu 25. beaivve.

Joavku lea ceggen siidda Deanu Čearretsullui ja doallá doppe moratorio. Doarjjakonseartta ulbmilin leage oažžut ruđa ovdamearkka dihte lávu oastima várás.

Okta artista, guhte lea boahtimin loaiddastit doarjjakonsertii lea rap-musihkkár Paleface. Son bealušta aktiivvalaččat olmmošvuoigatvuođaid. 

"Mun háliidan addit doarjaga"

Paleface oaivvilda, ahte sápmelaččaid sajádat Suomas lea váttis, iige sápmelaččaid jietna gullo doarvái áššiiguin, main mearridit sápmelaččaide guoskevaš fáttáid birra.

Paleface čalmmustahttá eandaliige mearrádusaid, main lea sáhka eamiálbmoga árbevirolaš ealáhusaide ja eanangeavaheapmái laktáseaddji áššiin. Ovdamearkka dihte dáid sivaid dihte son vuolgá fárrui doarjjakonsertii.

ellos deatnu moratorio teno tenon sopimus
Govva: Ellos Deatnu

– Mun háliidan addit doarjaga sámeservodahkii, buot sápmelaččaide dán áššis.

"Lea oalle heahpatlaš ášši dákkár riikkas"

Ellos Deatnu! -konsearttas skájiha dáiddáriid sáhka dásseárvvu ja vuoiggalašvuođa beales Norggas ja Suomas ja buot sámeguovlluin, muhto maid luonddu ja árbevirolaš kultuvrra seailluheami beales.

Rap-artista Paleface buktá ovdán fuolas unnitloguid sajádagas Suomas. Su mielas sámiid ja ovdamearkka dihtii románaid sajádat lea heajos muđui nu bures ovdánan riikkas.

– Dat muittuha juoidá dehálačča. Olbmot galggašedje áddet, ahte lea oalle heahpatlaš ášši dákkár riikkas, smiehttá Paleface.

– Muhtumin lea váttis oaidnit lahka ja diená min iežamet unnitloguálbmogat sáhttet leat hui váttis dilis, in mun ana dan ollenge buorre áššin.

Deanu soahpamuš, meahciráđđehusláhka ja ILO

Paleface lohká sápmelaččaid dilli Suomas lea mohkkái, nuba son háliida oassálastit Ohcejoga dilálašvuhtii ja loaiddastit sámiid rivttiid beales.

Paleface oaidná Deanu soahpamuša oassin stuorit ollisvuođas, masá gullá ovdamearkka dihte dat, ahte Suopma ii leat ratifiseren ILO-soahpamuša . Ráppár muitala maiddái meahciráđđehuslága birra dán ášši oktavuođas ja lohká dat lea maid oassi ain jođus leahkki váttisvuođain.

Fanas
Govva: Ville-Riiko Fofonoff / Yle

– Mu mielas dat lea kánske oassi dakkár jearggalaš linnjás, mas sápmelaččaid sajádat ain hedjona. Meahciráđđehusláhka lei okta ovdamearkka das, mo sápmelaččaid áššit eai guldaluvvon ja nu ovddos guvlui. Dan dihte orruge hui váivi, ahte go eará Suopma ávvuda 100-jagi doaluid, nu sámiin ii leat gal nu beare olu maid ávvudit.

Rap-artista lasiha, ahte doaibmi demokratiija vuogádagas daid olbmuid, geaid mearrádusat gusket, galggašedje beassat buoret mielde mearrádusaid dahkamii.

"Guoskkaha olles Deanuleagi álbmoga"

Áslat Holmberg gullá Ellos Deatnu! -jovkui. Son jáhkká artisttat geasuhit olbmuid boahtit doarjjakonsertii. Artisttaid lassin goit doarjjakonseartta temá lea dat, mii geasuha olu.

Aslak Holmberg
Aslak Holmberg Govva: Vesa Toppari / Yle

– Mii diehtit, ahte dat guoskkaha olles Deanuleagi álbmoga.

Holmberg muitala, ahte joavkku mihttomearrin livčče oažžut Deanu čázadagaid hálddašeami báikkálaš dássái ja jáhkkáge dása gávdno olu doarjja.

Artisttat eai váldde mávssu

Paleface sávvá konsearta oidno viidát ja eandaliige dan, ahte dat váttisvuođat bohtet oidnosii.

Doarjjakonseartta eará loaiddasteaddjit leat Ailu Valle, Ammon Johnskareng, Amoc, Ánde Somby, Dutta Per Ándde Juhán, Niillas Holmberg, Sara Marielle Gaup Beaska, Wimme, Anna Näkkäläjärvi-Länsman ja Ulla Pirttijärvi.

– Artisttat eai váldde dás mávssu, muhto dat vuoitu mii boahtá, dat boahtá min ášši vuodjimii. Vuosttaš masa mii áigut ruđaid bidjat lea oastit alccemet dakkár stuorat čoahkkinlávu, go dál mii leat luoikkaslávuin doppe Čearretsullos lávostallan.

Doarjjakonseartta ordnejuvvo Ohcejoga Busteldearpmis suoidnemánu 25. beaivve diibmu 17.00

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä