Sápmi |

Pariissa gáhtat leat guorranan olbmuin koronavirusa dihte – "Máilmmi čorgat ja buhtis, ja áibmu nu šearrat go johtolat lea nohkan"

Fránskka oaivegávpot Pariisa dábálaččat duoldá go málesruittu, muhto koronavirus lea jaskkodahttán gávpoga, muitala Pariissa máŋgalogi jági orron Jovnna-Ánde Vest.

Tyhjä aukio Pariisissa.
Place Vendôme -šillju Pariissas lea jaskkodan oalát, go sihke turisttat ja fránskalaččat bissot ruovttuineaset. Govva: AOP

Fránskka oaivegávpogis Pariissas orrot badjel guokte miljovnna olbmo, nuba dábálaččat doppe lea oalle hušša. Dál goittotge gáhtat leat koronavirusdili dihte jaskkodan, muitala Pariissas ássi Jovnna-Ánde Vest.

– Gáhtat gal leat nu ráfálaččat dál, ollu leat ráddjejuvvon johtimat. Eai dáppe gullo olu olbmot.

Vest lea guhká orron Pariissas, ja dadjáge ahte gáhtaid alde ii leat goassige leamaš ná fiinnis.

– Jos dan jurddaša ná, ahte vázzila gáhta ala, iihan dat leat goassige ná fiinnis. Doppe nu hirbmat máilmmi čorgat ja buhtis, ja áibmu nu šearrat go johtolat lea nohkan, eai leat olu biillat.

– Áibmu lea buhtásmuvvan, muhto amashan dat gal orru, go eai leat olbmot olus. Leat gal muhtin olbmot, ii leat ollásit jámas dát gávpot, muhto ovddeža ektui dat lea hui jaskat.

"Virushan sáhttá gos beare"

Johns Hopkins universitehta statistihkaid mielde Fránskkas leat dán rádjái duođaštuvvon 83 080 koronavirusnjoammuma ja 10 887 olbmo leat jápmán dávdda dihte.

Koronavirus leavvá johtilit, ja Vest muitala ahte dat vuhtto gávpogis nu, ahte olbmot ballet.

– Olbmot dieđusge ballet, ahte mo das vel geavvá. Olbmot leat várrugasat, leat muohtosuojit ja gistát gieđain. Ollugat ballet, muhto ollugat viehka ráfálaččatge váldet.

Fránskkasge leat gidden skuvllaid, restoráŋŋat ja kafeat leat giddejuvvon, ja máŋggat gávppit maiddái.

– Boahtá dalle dieđus dávda, muhto boahtá maiddái ekonomalaš roassu, reastaluvvamat. Fáhkkestaga nogai ruhta oba máilmmis.

Jovnna-Ánde Vest muitala, ahte vaikko medias olu muitalitge dili birra, son ii leat dasa nu menddo roahkkasan. Soai ealašeaba guovttá eamidiin várrugasat ja geahččaleaba birgehallat Pariissas. Sudnosge leat goit erohusat, mo jurddašeaba dili birra.

– Moai letne nu earálágánat, eamit lea gávpotolmmoš ja son jurddaša vehá eará láhkai go mun. Son hui dárkilit váldá vuhtii rávvagiid ja buot mo galgá. Mun fas jurddašan ahte iskkan leat várrugas, muhto munhan in dasa veaje maidege, in mun girddi sáhte johtit, ferten guoskkadit juohke sadjái, ja dat virushan sáhttá gos beare.

Jovnna-Ánde West lei mielde Buorre Iđit Sápmi -sáddagis 9.4.2020. Guldal dás su jearahallama. Jietna: Yle Areena

Varrasamosat: Sápmi

Váldoođđasat

Varrasamosat

Muualla Yle.fi:ssä