Sápmi |

Peäccam reeis lie õinn tääʹrǩes

Mõõnni neäʹttel looppâst jõnn joukk vueʹlǧǧii reissai Ruõšš jânnma. Miârktõõzzan reeisast leäi tobdstõttat Peäccam vuäʹmm sääʹmvuuʹdid.

Peäccam reeis joouk manaster ooudas
Peäccam reeis joouk manaster ooudas Govva: Anna Lumikivi

Anna Lumikivi suu eeʹjjin smiõtti juʹn teimma, štõ sij leʹčči nuʹtt hääʹsǩ mõõnnâd Peäccma da Boris Gleebje. Seeʹst leäi jurddjan jieʹlled sääʹm vuäʹmm jälstem pääiʹǩin.

– Teʹl ko Facebookkast iʹlmmtem tän ni leʹjje jiânnai oummu ǩeäin ǩiččʼče miõl. Da Irja Jefremooff kõõjjim vuäppsen da õhttseʹžže mij leʹjjiim koummlonellj oummu särnn Lumikivi.

Joouk vueʹlǧǧii Âʹvvlest, sij mõʹnne Čeʹvetjäuʹrr rââst da Taarâst Ruõššjânnma.

– Tõt leäi nåkam reiss, štõ mij jiõʹliim puk täin koumm sääʹm siid vuuʹdin mâiʹd lie tän Peäccam vuuʹdest, mušttal reiss vuäppas Irja Jefremoff.

Sij inste Zapoljarnyi kuäivvas gåårdest da jieʹlle määŋg jeeʹres pääiʹǩin.

Paap Boris Gleb ceerkav sluuʹžbest
Paap Boris Gleb ceerkav sluuʹžbest Govva: Anna Lumikivi

– Mij jiõʹliim Peäccam manastrest tobdstõõttmen da juäʹtǩǩiim Peäccam vuäʹmm täʹlvvsiid pääiʹǩǩe. 6.8. leäi Boris da Gleb prääzkjummuž peiʹvv, tõt leäi mij reiss vueiʹvvtäävtõs ko pieʹssiim jieʹlled toʹben Boris da Gleb ceerkvest.

– Nuʹbb pääiʹǩ Murmansk čuâǥǥas viõstâr årra lij Titovka. Toʹben lij mõõččas tuõddâr vuuʹd koon jeäkkal čuõvvii viõlggeen, ko toʹben ij väinn mâŋŋa leäkku leämman puäʒʒtääll, särnn Jefremoff.

Mååust sij vueʹjje Räjj-Joosep čuâǥǥas mieʹldd da sij võl årste ouddâl rääjj

Mäʹtǩǩ joukk teevai Anton Fofanoff ääuʹd Riist
Mäʹtǩǩ joukk teevai Anton Fofanoff ääuʹd Riist Govva: Anna Lumikivi

– Pueʹđiim juʹn Suõʹnnjel siid vuʹvdde da tõn mâŋŋa vueʹlǧǧiim mååust Âʹvvla. Vuejaim määŋg sooǥǥ vuuʹdi čoođ da võl ouddâl rääjj årstiim tõʹst Fofanoff sooǥǥ vuuʹdest da jieʹliim Ontas Fofanoff ääuʹdest, mušttal Jefremoff

Määŋgid oummuid tõt leäi samai tääʹrǩes mäʹtǩǩ.

Anna Lumikivii luâđđ leäi pukin pueʹrmõs vueʹss reeisast, tääl son tuõđi tieʹđ måkam vuuʹdest suu sooǥǥ lij jeälstam.

Mäʹtǩǩ jäʹrjsteei Anna Lumikivi da suu eeʹjj Erkki Lumisalmi Peäccam vuõnâst
Mäʹtǩǩ jäʹrjsteei Anna Lumikivi da suu eeʹjj Erkki Lumisalmi Peäccam vuõnâst Govva: Anna Lumikivi

– Mon leäm obb ääiʹj leämman nåkam, štõ muu miõl kueʹstelm lij õõl tuõddâr da miârr reedd. Mon jiõm leäkku ni kuäʹss jeälstam nåkam pääiʹǩest leša ååʹn mon hoʹhssjem, štõ tõt lij tõn diõtt ko muu sooǥǥ lij Peäccmest ni tõt lij aivv tõt peäccam vuuʹd muu miõl kueʹstelm, mušttal Lumikivi.

Ååʹn reeisast leʹjje mieʹldd nuõrab-ki oummu, Jefremoff särnn štõ oummu leʹjje nuʹtt miõl ǩiõčči täi vuäʹmm saajjiid.

– Ååskam štõ nuõrab puõlvvõõǥǥâst tõt miõl ǩiõččmõš pâi šorrned da nuõrr oummu vueiʹtte ååʹn tuõsttlõnji mainsted jiõccan sooǥǥ historiast da leeʹd iʹlbbes tõʹst, särnn Jefremoff.

Varrasamosat: Sápmi

Váldoođđasat

Varrasamosat

Muualla Yle.fi:ssä