Pedar Jalvvi divttat, muitalusat ja áviisačállosat ovttaid bearpmáid sisa suomagillii
Jorgaleaddji Kaija Anttonen ja girjjálašvuođa professor Vuokko Hirvonen leaba čohkken ja doaimmahan Pedar Jalvvi (1888 – 1916) deavsttaid suomagielat girjin.
Kieletär-fitnodaga oamasteaddji ja goastádusdoaimmaheaddji Kaija Anttonen ja professor Vuokko Hirvonen leaba čohkken Jalvvi suomagielat deavsttaid ja jorgalan sámegielat deavsttaid suomagillii. Dát Pedar Jalvvi divttat, muitalusat ja áviisačállosat almmustuvvet oktan girjin, man namma lea ”Lumihiutaleita ja pieniä pakinoita” (Muohtačalmmit ja smávva čállosat). Girji almmustuvvá skábmamánus dán jagi.
Girjjálašvuođa professor Vuokko Hirvonen lea dahkan girjái Pedar Jalvvi eallingeardemuitalusa.
Jalvvi oainnut ainge áigeguovdilat
Pedar Jalvi lei servvodatberošteaddji. Son čálii sápmelaččaid eallimis ja buvttii ovdan sámiid dili. Jorgaleaddji ja goasttedeaddji Kaija Anttonen lohká, ahte Jalvvi deavsttat leat ainge áigeguovdilat.
– Deavsttat čájehit, ahte Jalvi lei guovttegielat sátnedáiddár ja čeahpes birrasa dárkojeaddji. Son lei oaidni, geas lea dadjamuš maid dálá lohkkiide, badjelaš čuođi jagi čállosiid almmustuvvama maŋŋá.
Maiddái sámegirječálli nuoraidgirjeráidu suomagillii
Kaija Anttonen lea ”Lumihiutaleita ja pieniä pakinoita” –girjji lassin lassin jorgaleamen ja almmustahttimen maid Ann-Helen Laestadiusa nuoraidgirjeráiddu. Ráiddu vuosttas oassi "Terkkuja Sopperosta" (SMS från Soppero) almmustuvvá maiddái Skábmamánus nugo Pedar Jalvvi deavsttain čohkkejuvvon girjige.
