Sápmi

Per-Jona Labba váccii rihppaskuvlla gáiddusoktavuođain miessemearkumiid dihte – sotnabeaivve nuorat konfirmerejuvvojit Eanodagas

Per-Jona Labba
Per-Jona Labba vuordá sotnabeaivvi, go šaddá konfirmerejuvvot. Sutnje beaivi lea dehálaš, go dás duohko beassá leat vaikko ristváhnen. Govva: Vesa Toppari / Yle

Konfirmašuvdna sirdašuvai geasis čakčii. Girkus čuodjá sálbma dušše oktii, eaige konfirmašuvdnalávlagiid lávllo ollenge.

Viimmat besset maid Eanodagas guhká vurdojuvvon beaivvi ávvudit, go konfirmašuvdna šaddá duohtan dán vahku sotnabeaivve. Degomat nu máŋggat dáhpáhusat, nu maid konfirmašuvdna ja rihppaskuvla leat duohta earálágánat, go masa leat hárjánan.

Sihke báhppa ja konfirmánta vuordiba goit iluin sotnabeaivve, go konfirmašuvdna ollašuvvá. Konfirmašuvdna galggai vuos geasset, muhto dat sirdašuvai čakčii.

Stuorra feasta, mii ii goassige vajálduva

Gáiddusin rihppaskuvlla sáhttá vázzit measta gos beare. Dan beasai vásihit eanodatlaš konfirmánta Per-Jona Labba, guhte skihpáriinnis váccii rihppaskuvlla gáiddusoktavuođaid bokte, go eaba beassan rihppaskuvlaleirii miessemearkumiid dihte.

– Geassemánu álggus ledje miessemearkumat, muhto lihkus bessen leahkit doppe ja báhppa Heli Kinisjärvi doalai rihppaskuvlla gáiddusin suoidnemánus. Livččiihan dat leairage lean somá, muhto gal mus lei nu suohtas doppe miessemearkumiin, Labba lohká. Oasi gáiddusoahpahusas doalai searvegotti nuoraidbargi juo geassemánus.

Per-Jona Labba
Gelddolaš beaivái galgá bures ráhkkanit, Per-Jona Labba finai vuoktačuohppi Anna Mikko luhte ovdal sotnabeaivvi ávvudoaluid. Govva: Vesa Toppari / Yle

Labbai konfirmašuvdna lea dehálaš ja mearkkašahtti ášši, gažaldat lea goittotge stuorra feasttas, mii ii goassege vajálduva. Son maid illuda das, go dás ovddosguvlui beassá leahkit ristváhnen.

Sus alddis leat gávcci ristváhnema, geain viđas besset sotnabeaivve ávvudit ođđa konfirmántta.

– Livččenhan mun dieđusge bovden buot olbmuid, geaid mun dieđán, muhto dál ii oaččo. Munnje bohtet sullii 15 guossi, Labba lohká.

Video: Hetan kirkko, Hetta, Enontekiö, Heahtá girku, Heahttá, Eanodat
Heahtá girkus konfirmerejuvvojit logi nuora sotnabeaivve. Koronadilli váikkuhii dasage, ahte konfirmašuvnnat leat easkka čakčat. Dat goittot heive bures boazobárdnái. Video: Vesa Toppari / Yle

Juohke konfirmánttas ožžot girkui boahtit logi lagašolbmo

Girkus leat dárkilis rávvagat koronadili ektui, muhto lihkká konfirmánttaid lagamuččat besset konfirmašuvdnii fárrui. Eará fuolkkit ožžot liŋkka, man bokte besset neahttastreama čuovvut.

Juohke konfirmánttas ožžot logi lagašolbmo boahtit girkui, go juohke nubbi beaŋka lea geavahusas ja girkui čáhket dan dihte čuohte olbmo.

Heli Kinisjärvi
Sámegielat searvegoddebáhppa Heli Kinisjärvi doallá rihppaskuvllaid sámegillii, dán háve nu, ahte nuorain lei dasa vejolašvuohta oassálastit duoddaris. Govva: Vesa Toppari / Yle

Konfirmašuvnna ođđa áigetávvalis mearriduvvui juo geasset. Báhppa Heli Kinisjärvii dát lea vuosttaš háve, go doallá konfirmašuvnna čakčat. Koronadilli bágge jurddašit dilálašvuođa ordnema eará láhkai.

– Lea dušše okta sálbma ja konfirmašuvdnalávlagat eai leat dán háve ollenge, báhppa Heli Kinisjärvi muitala.

Geahča áššis lasi bearjadaga 25.9. Yle Ođđasiin TV1:žis diibmu 16.45

Varrasamosat

Muualla Yle.fi:ssä