Sápmi |

Petra Laiti bargagoahtán Suoma sisministara riikkabeaiveahkkebargin: "Dát lea niehkobargu dán eallindilis"

Petra Laiti lea aiddo álggahan Suoma sisministtar Maria Ohisalo veahkkebargin riikkabeivviide.

petra laiti 23.5.2018
Petra Laiti álggahii ođđa barggustis duorastaga geassemánu 27. beaivve. Govva: Ville-Riiko Fofonoff / Yle

Suoma ođđa ráđđehus lea álggahan barggus geassemánu álggus ja dál Suoma sisministtar Maria Ohisalo lea válljen alcces riikkabeaiveahkkebargi riikkabeivviide. Sámenuorra Petra Laiti álggahii sisministara riikkabeaiveahkkebargin Suoma riikkabeivviin ikte duorastaga geassemánu 27. beaivve. Sisministtar Maria Ohisalos barget riikkabeaiveahkkebargi lassin stáhtačálli ja politihkalaš veahkkebargit.

Petra Laiti lea čuvvon Ruoná lihtu ságadoalli ja Suoma sisministtar Maria Ohisalo barggu olu dán giđa, ja dan dihte Laiti mearridii ohcat dán bargui.

– Dathan gal lea dieđusge hirbmat buorre dovdu dál. Mun liikon ollu Maria stiilii ja ledjen guhká jurddašan, ahte jus goas nu vuolggášin politihkkii bargat, de son livččii dakkár olmmoš, geasa háliidivččen bargat. Illá oba jáhkán ahte dat lea dál šaddan nu, muitala Petra Laiti.

Oktavuohta Ohisaloi ovddežis

Petra Laiti lea leamašan sisministtar Maria Ohisaloin oktavuođas árat giđa áigge válgatemáid birra, ja sudnos lei dan bokte oktavuohta. ovddežis.

– Dalle go dát báiki bođii rabas, de ožžon Maria Ohisalos njuolga dieđu, ahte sáhtášin ohcat dan, jus mus lea beroštupmi. Sáddejin sutnje iežan CV ja hálešteimme telefovnnas, ja die dat sullii lei, čilge Laiti.

Petra Laiti vuordá, ahte beassá oahppat olu. Son jáhkká ahte vuosttas mánuid son vuos oahpahallá, mo riikkabeaivvit doaibmá beaivválaččat.

– Sisministarii gullet olu eambbo dakkár barggut, mat eai leat juohke riikkabeaiáirasis, nu ahte mun šattan maid oahppat olu dakkár politihkalaš fáttáid birra, mat eai leat munnje oahppásat vel.

"Niehkobargu dán eallindilis"

Petra Laiti lea leamašan ieš aktiivvalaččat mielde sámepolitihkas. Son lea Suoma Sámi Nuorat -searvvi ságadoalli.

Dajašin nu, ahte dát bargoválljen nanne, ahte beasan dego albma bargun dahkat politihka. Dathan lea dađi bahábut vehá nu, ahte sámepolitihka lea váttis oažžut ámmáhin. Dál mun vehá dego sáhtán jurddašit, ahte sámepolitihka bargan lea maid oassi mu ámmáhis.

Bargu sisministariin lea Petra Laitii niehkobargu dán eallindilis. Son ii goittotge vuos máhte dadjat, leago su boahttevuohta riikkabeivviin ja politihkas.

Varrasamosat: Sápmi

Váldoođđasat

Varrasamosat

Muualla Yle.fi:ssä