Sápmi |

Petra Laiti jođihišgoahtá Suoma Sámi Nuoraid - dán jagi temán árbevierut

Suoma Sámi Nuorat –searvi čoahkkimastii Vuohču Tankaváris mannan vahkuloahpa ja válljejii ođđa stivrra.

Jietna: petra laiti ssn suoma sámi nuorat
Jietna
Petra Laiti jearahallan álgá áiggis 01.57.00

 

Suoma Sámi Nuorat –searvi čoahkkanii mannan vahkuloahpa jahkečoahkkimii Vuohču Tankavárrái.

Beavddi alde ledje sihke geavatlaš áššit, muhto maiddái ovdamearkka dihte ođđa stivrra válljemat.

Searvi jođihišgoahtá helssetlaš Petra Laiti, guhte doibmii ovdal searvvi čállin.

Laiti lohká alcces hui motiverejuvvon ja illuda ságadoali barggus. 

Ođđa buolva stivrii

Tankaváris searvvi boares stivra doalai vel maŋimuš čoahkkimis.

– Mii álo geahččat maid boares stivra lea bargan olles jagi, ja gehččet vehá ahte mii lea leamaš diekkár stuoramus ášši, muitala ođđa ságadoalli Laiti.

Čoahkkimiid gaskas oasseváldit fitne somá dihte maiddái muohtagápmagiiguin vázzileamin. Dan maŋŋá válljejedje ođđa stivra, masa šadde olu ođđa namat. 

– Boares stivrras lea leamaš dakkár lahttut, geat leat leamaš stivrras oalle guhká earálagan doaimmain. Mis lea dál dakkár oalle buorre combo mu mielas, ahte boares lahttut geat leat leamaš guhká fárus ja dasto ođđa lahttut geat leat beassan áktiveret iežaset, lohká Laiti.

Sáhtáge dadjat, ahte ođđa buolva lea válddán SSN stivrra háldui.

– Dát lea dakkár ođđa, nuorat sohkabuolva, mii lea dasto boahtan fárrui dasa.

Temán árbevierut

Mannan jagi searvi mearridii temán gávpotsápmelaččat, ja geahččaliige dan bokte oaččut ođđa lahttuid gávpotguovlluin. Dán jagi temán šaddai árbevierut, mii lea lunddolaš joatkka, vuoi gávpotnuoratge beassat oahpasmuvvat sámi árbevieruide.

– Árbevieruid áiggut doarjjut dán jagi. Mun jahkan sihkkarit geasset lea dakkár láhttodeaivvadeapmit ja kurssaid árbedihtuin ja árbevieruid birra.

– Geahččalit oaidnit maid olbmot gáibidit ja masa mis lea vejolašvuohta dasto váikkuhit.

SSN áigu maiddái oassálastit Ovttastuvvan Našuvnnaid eamiálbmogiid bissovaš forumii, nu mo juohke jagi.  UNPFII (United Nations Permanent Forum on Indigenous Issues) ordnejuvvo New Yorkkas, Amerihkas.

– Doppe permanent forumis lea dán jagi New Yorkkas temán nuorat, nu SSN sihkkarit áigu oassálastit dakkár internašunala doaimmaide, lohká Laiti.

Laiti oaidná SSN rolla dehálažžan

Laiti mielde SSN lea juo guhká leamašan dehálaš sadji sámenuoraide oaččut jienaset gullosii.

Searvvi bokte beassá oahpasmuvvát eará sámenuoraide, muhto oažžu maiddái doarjaga.

– Okta dehálamos áššiin lea, ahte nuorat dovdet, ahte sis lea muhtin searvi man bokte sii ožžot sin jiena gullosii, ahte mu mielas SSN:s lea leamaš dás juo maŋga jagi hui dehálaš rolla, muhto dušše ovddidit dan rolla ja doallat fuola, ahte nuorat eai vájaldahtte ahte mis oažžu veahki ja doarjaga.

Petra Laiti lei Sohkaršohka jearahallamis duorastaga 9.3. Sohkaršohkka boahtá nuppádassii bearjadaga 10.3. diibmu 17.30 ja dan sáhttá guldalit maid Yle Areenas.

Varrasamosat: Sápmi

Váldoođđasat

Varrasamosat