Säämi |

Piäiváást já piegâst uážžu virde pirrâ ive meid tavveen, veik skammâ lii kukke, mut mestâ jo ain piäggá

Piäivášpaaneel já pieggâmillo láá šiev muulsâiävtuh šleeđgâ pyevtitmân.

Veikko Aikio
Veikko Aikio Govva: Anja Kaarret / Yle

Avveellâš Aikio Veikko lii rustám jieijâs astoääigi tupán rustigijd, moin uážžu virde päikkitárboid. Veeiko tupe lii Ijjäävrist, kost ij lah kuássin lamâškin šleđgâ. Luoddâ tohon lii, mut iä toolâ tom tälviv áávus. Sun viáttá ennuv ääigi tobbeen já lii-uv hommám tohon piäivášpanelijd já pieggâmilo. Väärrin lii aggregaat, mut harvii tom kiävttá. Rävŋi sun taarbâš čuovân, radion, tv já puhelin luođiimân.

– Piäivášpaaneel ij skammâäigi luođii, mut ko tot lii jolgâ päikki te, ain tobbeen piäggá, et rävŋi kal lii tuárvi, iätá Aikio.

Aikioi pieggâmillo ij lah styeres. Suájáh láá kulmâ já toi koskâ lii suullân meetterpeeli. Piäivášpaaneel lii ucceeb, tuše 55 waatid, millo 300 wattid. Hadden taas poođij talle suullân muáddi tuhháát eurod, akkuin ohtsis, ko sun oostij tom lovmat ihheed talle. Päikki-uv miilon kavnui älkkest.

Heikka-čeesi kámpá paaldâst lâi taggaar puhelinstuálppu, aigum tom vistig njeidiđ, mut hoksájim, et tom kiäčán piejâm pieggâmilo, muštâl Aikio.

tuulimylly
Veikko Aikio já suu pieggâmillo Ijjäävrist. Govva: Henna Aikio / priivaat kove

Aggregaat etivääri väärrin

Pyereest Veikko lii piergim luándu vuoimijn puáttee ravŋijn, mut moonnâm täälvi kaartâi turvâstiđ etiváárán.

– Uđđâivemáánust lâi vissâ kulmâ oho kuálkki, puolâšeh, talle kaartâi turvâstiđ aggregaatin, tast finnij räävŋi, muštâl Aikio.

Moonnâm keesi, ko lâi lieggâ keessi, piäivášpaaneel lâi pyereeb, mut talle lijjii mudoi-uv aakuh tievâ, ko keessiv ij ennuv moonâ rävŋi.

– Must lii šiev kiällár, te jiem lah viššâm uástiđ šleđgáin tuáimee jieŋâskääpi, tot kal toimâččij pyereest, iätá Aikio já lii tuđâvâš, ko lii skappum piäggâmilo olssis.

Aikio Veeiko sahhiittâllâm kávnoo täst.

Varrasamosat: Säämi

Váldoođđasat

Varrasamosat

Muualla Yle.fi:ssä