Sápmi |

Pieski dáiddačájáhus áiggil Londonii - "Bargui bođii aibbas erenomaš dilli go leat nu máŋggat duddjomin muinna"

Outi Pieski dáiddaprošeakta lea ollašuvvamin áiggil, go son gávnnai riessunvehkiid iežas prošektii. Son lea ráhkadeamen Londonii stuorra čájáhusa, mii álgá ođđajagimánus.

Outi Pieski dáiddaduodji Risteävät polut
Govva: Kristin Hjellegjerde

Sámedáiddár Outi Pieski lea ráhkadeamen Londonii Nordic Matters -dáhpáhussii stuorra čájáhusa, man várás ozai vehkiid riessut dáiddaduoji. Pieski lohká, ahte lei váttis gávdnat riessunvehkiid oaivegávpotguovllus, muhto poasta mielde fáhtte dál vehkiid miehtá.

– Lei gál váttis gávdnat Helssegis olbmo, gii láve riessut ja geas livččii dilli barggat, ii dálges gávdnon. Muhto de áiggon sáddet poasta fárus materiálaid duohkot deike. Máŋggat ledje beroštuvvan. Njealjis álget muinna bargat, dasto oaččon visot gárvvisin buriin áiggiin vaiko poastasádden váldá álot vehá áiggi, dadjá Pieski.

Pieski mielde sus leat dál oktiibuot guhtta olbmo veahkeheamin, vai sii gerget duddjot máŋggaid čudiid riessunosiid čájáhusa varas. Dan lassin Pieski lea diŋgon liinniid vel moatte olbmos.

"Álgojurdagin leamaš go gávttehasat čoahkkanit oktii ja šaddá ivdnái joavku mii buktá oktiigullavašvuođa"

Southbank Centre Londonis lea diŋgon Pieskis stuorra čájáhusa, mii galgá leat doppe olles jagi 2017. Stuorra čájáhusa várás Pieski riessugoahtá ovttas vehkkiiguin. Son illuda, go beassa ovttas earáiguin duddjot.

– Lean hui ilus! Dál bargui bođii aibbas erenomaš dilli go leat nu máŋggat duddjomin muinna. Dan dáiddaduoji oktan álgojurdagin leamaš go gávttehasat čoahkkanit oktii ja šaddá ivdnái joavku mii buktá oktiigullavašvuođa ja famolašvuođa dovdduid ja dahká buriid.

Dáiddár Outi Pieski muitala, ahte jurdagin lea maiddái čohkket govaid duojáriin ja vehkiin. Govaid bohtet čájehit installašuvnna oktavuođas Londonis.

Varrasamosat: Sápmi

Váldoođđasat

Varrasamosat

Muualla Yle.fi:ssä