Sápmi |

Pirita Näkkäläjärvi lea Jagi sápmelaš 2017

Pirita Näkkäläjärvi lea Jagi sápmelaš 2017. Bálkkašupmi juhkojuvvui dál goalmmát háve.

Pirita Näkkäläjärvi
Govva: Vesa Toppari / Yle Sápmi

Jagi sápmelaš -lea bálkkašupmi, man oaivegávpotguovllu sámesearvi City-Sámit juohká.

Näkkäläjärvi orru dál Helssegis, muhto lea eret Anáris. Son lea guhká bargan dan ovdii, vai sápmelaččat oidnošedje medias. Maiddái sámiid rievttit leat leamaš sutnje váimmuášši.

Media- ja ekonomiijabargi, sámeáššit váimmus

Pirita Näkkäläjärvi barggai Yle Sámi hoavdan jagiin 2012-2016. Näkkäläjärvi hoavdabaji áigge Yle Sápmi buvttadišgođii earret eará iežas tv-ođđasiid Yle Ođđasat, nuoraid radioprográmma Sohkaršohka golmma sámegillii, anáraš- ja nuortalašgiel neahttaođđasiid, Sámi válgagalleriija, Dearvva-radiosáddaga ja Sámi Ealli arkiivva. Ovdal válljejuvvui Yle Sámi hoavdan, son lei maid Sámediggeáirras jagis 2012.

Yle Sápmi, Yle Ođđasat, Pirita Näkkäläjärvi
Yle Sámi ovddeš hoavda Pirita Näkkäläjärvi. Govva: Vesa Toppari / Yle Sápmi
Näkkäläjärvi lea álggahan dán čavčča ođđa barggus Helssegis, PwC Strategy& -fitnodagas. Juovlamánus son gárvvásmuvvá London School of Economics -skuvllas, gos son lea čađahan magisttaroahpuid media- ja diehtojuohkinsuorggis MSc Media & Communications -kurssas. Su magisttarloahppabargu gieđahallá sámiid sátnefriijavuođa Suomas.

“Näkkäläjärvi máhttá mediaváikkuheami vugiid"

Jagi sápmelačča doaimmas okta dehálamos ášši lea ovddastit sápmelaččaid almmolašvuođas ja leat muđuige oidnosis. Näkkäläjärvi lea bidjan olu návccaid sámiid áššiid ovdanbuktimii eandalitge sosiála medias, muhto earáge forumain, City-Sámit rs. sátnejođiheaddji Inka Musta muitala válljenákkain.

Jagi sápmelačča dehálaš doaibman lea ovddastit sápmelaččaid almmolašvuođas ja doaibmat min jietnan

– City-Sámit -searvvi ságadoalli Inka Musta

 

Inka Musta Helssegis gáktebeaivve 2015.
City-Sámit -searvvi ságadoalli Inka Musta. / City-Sámit -yhdistyksen puheenjohtaja Inka Musta. Govva: Helga Siljander / Yle

– Jagi sápmelačča dehálaš doaibman lea ovddastit sápmelaččaid almmolašvuođas ja doaibmat min jietnan, muitala City-Sámit -searvvi ságadoalli Inka Musta.

Searvvis jáhkketge, ahte Näkkäläjärvis leat buorre dáiddut ja vejolašvuođat doaibmat Jagi sápmelažžan.

– Pirita Näkkäläjärvi máhttá mediaváikkuheami vugiid ja lea hárjánan leahkit almmolašvuođas ja ovdanbuktit čielgasit ja njuovžilit. Danin mii jáhkkitge, ahte son lea hui buorre olmmoš dán dovddastusa oažžun.

Musta joatká maid, ahte Näkkäläjärvi viiddis fierpmádagat bohtet sihkkarit veahkehit dán doaimmas.

Jagi sápmelaš -bálkkašupmi juhkojuvvui dál goalmmát háve

Jagi sápmelaš -lea bálkkašupmi, man oaivegávpotguovllu sámesearvi City-Sámit rs juohká dál goalmmát háve.

Jagi Sápmelaš Outi Länsman bargá movttain ja addá bargui 110 proseantta.
Outi Länsman, Jagi sápmelaš 2015. / Outi Länsman, Vuoden saamelainen 2015.
Ovttaskas olbmot leat ožžon evttohit Jagi sápmelačča neahttaskoviin.

Bálkkašumiin searvi háliida buktit almmolašvuhtii ámadajut ovddastit sápmelaččaid.

Niillas Holmberg
Niillas Holmberg, Jagi sápmelaš 2016. / Niillas Holmberg, Vuoden saamelainen 2016. Govva: Aslak Paltto / Yle Sápmi
Bálkkašumiin háliidit maid roahkasmahttit sápmelaččaid gáhttet iežaset kultuvrra ja giela, sirdit dan čuovvovaš sohkabuolvvaide ja lasihit váldoálbmoga diđolašvuođa sámiid birra.

Jagi sápmelaš -bálkkašupmi geigejuvvui Helssegis lávvordaga 11.11. Álbmotmuseas Duoji Vuoigŋa -dáhpáhusas.

Vuosttaš Jagi sápmelaš -bálkkašumi oaččui jagis 2015 anárlaš sámegiela lektor Outi Länsman. Jagis 2016 jagi sápmelažžan válljejuvvui ohcejohkalaš dáiddár Niillas Holmberg.

Varrasamosat: Sápmi

Váldoođđasat

Varrasamosat

Muualla Yle.fi:ssä