Sápmi |

Pizzeriaeaiggát lea streassaluvván, go ráđđehus áigu giddet restoráŋŋaid giđđii

Gihttela Levi lea guorranan olbmuin, ja pizzeriaeaiggát Aslak Niittyvuopio smiehtada mo dál birget dás ovddos guvlui.

Aslak-Ilkka Niittyvuopio lea Levis fitnodatdoallin.
Aslak Niittyvuopio lea fitnodatdoallin Gihttela Levis. Govva: Kaija Länsman / Yle

Restoráŋŋasuorggi fitnodatdoallit smihttet birgema, go ráđđehus áigu giddet restoráŋŋaid olles giđđii.

Giddejuvvon čuoiganguovddážis, Levis, pizzeriaeaiggát Aslak Niittyvuopio lea streassaluvvan vaikko vel ráđđehusa dálá evttohusa mielde restoráŋŋat sáhttale ain vuovdit biepmu olggos, muhto olbmot eai oaččoše šat báhcit restoraŋŋii sisa boradit.

– Mis lea gal neahttagávpi ja mis sáhttet viežžat fárrui ja mii sáhttit doalvut borramušaid ruoktut olbmuide. Galhan dat veahkeha dili. Ferte geahččat dalle goabbá gánneha. Bidjat gitta ollásit vai iskat duon láhkai doaibmat, smiehtada Niittyvuopio.

Jaskkodan gilli ja ráđđehusa mearrádusat bidjet lunddolaččat smiehttat dáhpagiid.

– Galhan dieđusge lean smiehttan dáhpagiid. Ferte beare ovddos guvlui iskat smiehtadit. Dat lea buohkain seamma dilli ja ferte beare iskat birget juoga láhkai, jurddaša Niittyvuopio.

Stáhtaministtar ávžžuha fitnodatdoalliid giddet uvssaid

Ráđđehus attii disdateahkedis evttohusa restoráŋŋaid rabasáiggiid ráddjemis. Vuođđoláhkaváljagoddi dohkkehii evttohusa restoráŋŋaid giddemis, muhto evttoha dasa dárkkálmahttimiid.

Riikkabeaivvit adde ikte gaskavahku smiehttamuša ráđđehusa evttohan giddenmearrádusas, iige restoráŋŋaid sáhte bágget giddet uvssaidis vel boahtte vahkkoloahpas. Stáhtaministtar Sanna Marin goittotge ávžžuha fitnodatdoalliid giddet fitnodagaid uvssaid iešdoaimmalaččat. Marin muitala maiddái, ahte ráđđehus lea mieđiheamen lasi ruđa suorggi fitnodatdolliid áigáiboađu várás.

– Daid (smiehttamuša ja gieđahallama) dieđuid vuođul lea čielggas, nuppe láhkai go ráđđehus livččii háliidan, eat dán vahkkoloahpas vel oaččo mearrádusain gitta restoráŋŋaid, dajai Marin ikte gaskavahku ráđđehusa dieđihandilálašvuođas.

Sanna Marin hallituksen tiedotustilaisuudessa.
Stáhtaministtar Sanna Marin ráđđehusa dieđihandilálašvuođas 25.3. Govva: Heikki Saukkomaa / Lehtikuva

Ráđđehus ferte addit vel dievasmahtti ásahusa ja čielggademiid. Marin mielde daid addet nu jođánit go vejolaš.

– Mii goittotge ávžžuhit, ahte juo ovdal mearrádusa fápmuiboahtima restoráŋŋadoallit giddešedje sajiid kundariin. Biepmu sáhttá vuovdit olggos ja dan sáhttá viežžat restoráŋŋas, muhto ahte ieš sajit giddejuvvošedje.

– Dát lea hui dehálaš ja vealtemeahttun danin, ahte virus ii leavašii. Dát lea ráđđehusa oaidnu. Sávan, ahte eat oainnaše dál vahkkoloahpa, gos restoráŋŋat ja bárat leat vel rabas, dajai Marin dieđihandilálašvuođas.

Varrasamosat: Sápmi

Váldoođđasat

Varrasamosat

Muualla Yle.fi:ssä