Säämi |

Poccui hersku tohhee ulmuu taldrikân-uv – Vuosâkiärdálii kannat čuágiškyettiđ taatijn

Loppâkeesi arvaas šooŋâ tiet meecih láá tievâ kuobbârijn. Aanaar kuobârmeeri movtáskit-uv ulmuid miäcán čuággiđ luándu falâlduvvâid.

Video: Anarâšeehid kuobârmokke
Video
Keejâ magarijd saallâsijd ulmuuh ožžuu kuobârmohheest. Video: Yle Areena. Kove: Mikkâl Morottaja

Muádlov olmožid čokkânij Anarist uápásmuđ já nuurrâđ kuobbârijd Säämi máttááttâskuávdáá já Anarâškielâ seervi oovtâst uárnejum anarâšehidist. Kuobârmokke-tábáhtus jođetteijee Kirsi Ukkonen lâi nuurrâm uáinimnáál valjeest kuobbârijd, moh suápih ulmui puurrâmpiävdán.

Ukkonen tiätá, maid kuobbârijd vuosâkiärdálii kannat koorisis čuággiđ.

– Muu mielâst kannat algâttiđ eidu taatijn, ko tot tattijuávkku lii taggaar, ete ij pyevti moonnâđ hirmâd ennuv puástud, sun movtijdit.

Sun muštâl, et láá tuše muáddi tattišlaajâ, moin lii hyenes smakkâ já tuše ohtâ mirhâlâš, mut tohkin iä lah Säämist.

Kirsi Ukkonen lii kuobâräššitodbee
Kirsi Ukkonen tobdá pyereest kuobbârijd. Govva: Mikkâl Morottaja / Yle

Ukkonen mielâst ulmuuh poreh kuobbârijd liijkás uccáá.

– Tääbbin oro, et toh láá uáli távjá poccuu purrâmušah, ete kannattičij kal kevttiđ-uv, sun povvâst.

Meid eres kuobbâreh tohhejii kuobârkoorin

Aanaar markkân alda luándu lii tievâ meid eres purrâmâškuobbârijd. Tiina Lehmuslehti lâi tiävdám kooris soovsâruávskuin.

– Adelâm iäčán. Sun puáhtá rähtiđ saalaat. Alge taid jiešalnees nuurâi. Sun tobdá taan nuuvt pyereest já movtáskii, et tobbeen toh láá já nuurâi. Mun nuurrim talle váhá lase, kerdi sun nuurâi taid aalgâst, sun čielgee.

Tiina Lehmuslehti norá kuobbârijd
Tiina Lehmuslehti nuurâi algeinis soovsâruávskuid. Govva: Mikkâl Morottaja / Yle

Aslak Holmberg lâi puáttâm uuccâđ kuobbârijd já smiettâđ mii jieškote-uv lii. Jieš sun ij laavij taid nuurrâđ, mut porá kal, jis kiinii peri fáálá. Pärnivuođâst sun lii-uv hárjánâm puurrâđ maaŋgâmuđusijd kuobbârijd.

– Eeči lii viehâ viššâl čuággiđ tattijd já soovsâruávskuid. Sun läävee lasettiđ kuobbârijd veikkâ moos, meiddei poccuupiärgumáálán, Holmberg muštâl.

Aslak Holmberg totká kuobbârijd.
Aslak Holmberg poođij anarâšehidân uápásmuđ kuobbârijd. Govva: Mikkâl Morottaja / Yle
Tiina Jäppinen pic lâi čuággâm iänááš juármukuobârijd. Mut taan tove koori siskáldâs ij šoodâ suu páátán.

– Jiem ááigu puurrâđ tääl kuobbârijd, mutâ ááigum skeŋkkiđ taid muu skipárân, sun iätá.

Tiina Jäppinen lii nuurrâm juármukuobârijd.
Tiina Jäppinen čáittá kuobârkooris siskáldâs. Govva: Mikkâl Morottaja / Yle

Tivvum 10.9.2018 tme 16.25: Tiina Lehmuslehti suhânommâ tivvum rievtisnáál.

Varrasamosat: Säämi

Váldoođđasat

Varrasamosat

Muualla Yle.fi:ssä