Sápmi |

Presideanta Halonen: Juohkehaččas galgá leat riekti seammalágan sode-bálvalusaide

Suoma presideanta Tarja Halonen hálai duorastaga 7.9. sosiála- ja dearvvasvuođa čakčabeivviin Levis. Halonen čalmmustahtii bistevaš ovdaneami sosiála- ja dearvvasvuođa suorggis.

Tarja Halonen
Govva: Minna Näkkäläjärvi / Yle Sápmi

Ovddeš presideanta Tarja Halonen oaivvilda, ahte giellaášši galgá duođás váldit vuhtii. Halonen hálai sosiálasuorggi doibmiide Levis ordnejuvvon sode-semináras bistevaš ovddideami geahččanguovllus. 

Sode-ođastus lea stuorra ášši, ja jus das manná mii nu endorii, de dan ii leat nu álki šat maŋŋá divvodit. Áššedovdit háliidit sihkkarastit, ahte mihkkige áššiid ii mana fuonit gulvui, muitala Halonen Yle Sápmái.

– Suopmelaččat lea buresbirgejeaddji servodat vaikko buohkat eai bures birgege. Dat lea demokratiijá maŋŋá vuosttas ášši, masa buot máilmmi servodagat beasaše, lohká presideanta Halonen.

"Giellaášši galgá áibbas duođás váldit vuhtii"

Halonen lea movtta das,  ahte Levii leat čoahkkanan olu olbmot ášši olis. Sápmelaččat leat Eurohpa áidna eamiálbmot ja suopmelaš servodat galggašii doallat dan mielas, lohká Halonen.

– Sápmelaččat leat Eurohpa áidna eamiálbmot ja mii galggašeimmet atnit fuola das, muhto dat ii guoska dušše sápmelaččaid baicce gažaldat lea dás, ahte juohkehaččas galget leat ovttaveardásaččat riekti seammalagan bálvalusaide, oaivvilda Tarja Halonen.

Tarja Halonen
Presideanta Tarja Halonen hálai Lappi sode-beaivvis bistevaš ovddideamis. Govva: Minna Näkkäläjärvi / Yle Sápmi

Maiddái Sámediggi lea vuoruhan sode-ođastusa oktan dán čavčča dehálamos áššin. Stuorámus váttisvuođa sápmelaččaid sosiála- ja dearvvasvuođasuorggis dagaha giellagažaldat.

– Dieđusge, jus ássá boaitobealde dahje stuora gávpogis, de váttisvuođat bálvalusaid fidnemis leat earálaganat. Muhto ovdamearka dihte dat giellagažaldat, leš de gažaldat ruoŧagiellagiin dahje sámegiellagiin, de gal áibbas duođás dan galggašii albmaláhkai váldit vuhtii, deattuha Tarja Halonen.

Dehálamos presideantta mielas goittotge lea, ahte ovttaskas olmmoš oažžu juste dákkár sode-bálvalusaid, maid dárbbaša.

– Galggašii maid duođás smiehttat ovttaskas olbmo bokte, ahte son oažžu bálvalusaid iige nu, ahte leat vehádagat ja eanetlogu olbmot.

Guldal olles jearahallama dás.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä