Sápmi |

Protect Sápmi -vuođđudus: Fovsen-duomus leat stuorra váikkuhusat boahtteáigái

Boahttevuođas elrávdnjeindustriija ferte váldit vuhtii sámiid rivttiid, oaivvilda Isak Henrik Eira Protect Sápmi -vuođđudusas.

Tuulivoimaloita pohjois-Norjassa.
Norgga alimus riekti almmuhii vuossárgga mearrádusa, mas celket, ahte bieggafápmomillot rihkkot sámiid vuoigatvuođaid. Govva: Jyrki Lyytikkä / Yle

Vuossárgga boahtán Fovsen-duopmu boahtá váikkuhit garrasit elrávdnjeindustriijai, jáhkká seniorráđđeaddi Isak Henrik Eira Protect Sápmi -vuođđudusas. Duopmu addá garra signála dasa, mo elrávdnjeindustriijasuorgi ferte boahttevuođas váldit vuhtii sámiid rivttiid.

– Sii berrejit loahpahit dien vuogi, mot dán rádjái leat bargan dákkár sisabahkkenáššiiguin boazodoalloguovlluin. Dat leat njulgestaga badjelgeahččanvuođain duolbman sápmelaččaid vuoigatvuođaid, dadjá Eira.

Protect Sápmi lea dássážii bargan iešguđetlágan sisabahkkemiin Norggas ja sii leat veahkehan badjel beali Norgga orohagain. Eira illuđa vuoitus go oaidná, ahte sin váikkuhusárvvoštallamat jagis 2017 leat váldojuvvon vuhtii alimusrievtti duomus.

– Oainnán, ahte duopmu čujuha min bargui, mas mii kártiimet visot sisabahkkemiid, mat dan orohagas ledje. Bohtosat čájehedje, ahte ovdal go bieggamillohuksen álggii de lei jo badjel 80 proseantta orohagas váikkuhuvvon iešguđetlágan sisabahkkemiinguin. Maŋŋel jo dát sisabahkken bođii johtui de šattai badjel 90 proseantta, muitala Eira.

Son oaivvilda, ahte duomus leat ádden dan, ahte ii leat doarvái sisabahkkemiid geahččat dušše dan doaimma bokte, mii galgá huksejuvvot, muhto ferte geahččat maid oppalaččat visot doaimmaid, mat guovllus leat jo ovdalaččas.

Eira joatká, ahte duomus čujuhit maid olmmošriektekomitea mearrádusaide, mat ovdal leat dahkkon. Earet eará áššái, mii leamaš Suoma beale Sámis. Das Áŋŋela guovllu badjeolbmot váide Meahciráđđehusa vuovdečuollamiid.

Loga lasi: Norgga alimus rievtti duopmu: bieggafápmorusttegat rihkkot álgoálbmotvuoigatvuođaid

Fosen-duomus lei sáhka maid Ásllaga Á-studios vuossárgga 11.10.2021. Sáddagis ášši kommenterejit seniorráđđeaddi Isak Henrik Eira Protect Sámis ja guovdageaidnolaš badjeolmmoš Peer Gaup. Jietna: Aslak Paltto / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä