Säämi |

Puátteevuođâ oppâmateriaal lii digitaallii häämist

Puátteevuođâst oppâmateriaal ráhtoo ain eenâb já eenâb tuš digitaallii háámán. – Jiem mun tieđe, ete lii-uv tiest innig mihheen jiermijd, ete hárjuttâskirjeh láá kirjehäämist, iätá Petra Kuuva.

Petra Kuuva
– Ko lii uccáá materiaal, te tot puávtáččij leđe taggaar, mon puáhtá älkkeeht hammiđ jieijâs táárbu várás. Digitaallâš materiaalhân lii taggaar, Petra Kuuva muštoot. Govva: Eljas Niskanen / Yle

Sajosist savâstillii koskoho oppâmateriaal pyevtitmist sämitige škovlim- já oppâmateriaaltoimâttuv ornim čuákkimist. Ulmen lâi savâstâllâđ tast, maggaar sämikielâlâš oppâmateriaal annoo puátteevuođâst.

Tääl savâsteleh ennuv ovdâmerkkân tast, ete kannat-uv innig teddiliđ kiirjijd. Taan ááigán kulá jo ennuv tiättur kevttim, te toin puáhtá meid hárjuttâllâđ puohlágánijd aašijd škovlâelimist.

– Jiem mun tieđe, ete lii-uv tiest innig mihheen jiermijd, ete hárjuttâskirjeh láá kirjehäämist. Tááiđuid puáhtá hárjuttâllâđ eres-uv náál ko čälimáin pápárân. Mudoi-uv kolgâččij väldiđ vuotân tom ekologilâš uáinu meid oppâmateriaal rähtimist, iätá Petra Kuuva.

Oppâmateriaal kolgâččij pyehtiđ hammiđ uđđâsist

Máttáátteijeeh uážžuh jieijâh meridiđ, ete moin naalijn addeleh máttááttâs. Tondiet materiaal kolgâččij leđe jieškote-uv táárbun.

– Ko lii uccáá materiaal, te tot puávtáččij leđe taggaar, mon puáhtá älkkeeht hammiđ jieijâs táárbu várás. Digitaallâš materiaalhân lii taggaar, Kuuva muštoot.

Meid puáris oppâmateriaaleh láá vala-uv kiävtust mottoom verd. Taid kuittâg kevttih enâmustáá tondiet, ko taid láá motomin ráhtám.

– Kalhân toh-uv mahtnii tyeimih. Tast lii váhá tot čuolmâ, ete ko toh láá, te šadda váhá taggaar tobdo, ete taid kolgâččij kevttiđ. Mudoi oro, ete tot ruttâ lii moonnâm tušij tiet. Mut lii-uv talle mihheen jiermijd jyehiđ taggaar materiaal, mast tevdih kenski muáddi siijđo, Kuuva koijâd.

"Oppâmateriaal toorjân máttááttâs addelmist"

Kuuva lii ton uáivilist, ete oppâmateriaal ulmen lii tuárjuđ máttáátteijee, ige vaikuttiđ njuolgist toos, maht máttááttâs adeluvvoo.

– Suomâst tot lii moonnâm toos, ete kuástideijeeh rähtih šiev materiaal já máttáátteijeeh väldih tom anon. Tallehân kuittâg kiävá nuuvt, ete máttááttâs mana toi materiaalij mield. Mist láá škovliittum máttáátteijeh kiäin lii tot tiätu já táiđu.  Tot kolgâččij moonnâđ nuuvt, ete materiaal lii tuše toorjân já iššeed ton máttááttâs addelmist, ige nube kulij, Kuuvâ agâstâl.

Čuolmân lii Kuuva mielâst meiddei tot, ete iä lah tuárvi máttáátteijeeh, kiäh kiergâniččii uásálistiđ materiaal rähtimân.

– Tot škovliittum uccâ máttáátteijeejuávkku, mii tääbbin lii, kalga vala materiaal-uv rähtiđ. Älgih leđe nuuvt ennuv pargoh, ete stressi jo šadda, sun šuáhkád.

"Mij ferttip čuávvuđ ääigi"

Sämitige oppâmateriaallävdikode saavâjođetteijee Yrjö Musta lii ton uáivilist, ete tääl lii äigi smiettâđ eenâb digitaallii materiaal rähtim ko teddilum materiaal.

– Masa puoh oppâmateriaalih Suomâst láá tagareh, ete taid puáhtá kevttiđ jo-uv digihäämist teikkâ teddilum version. Škoovlâin-uv láá aainâs Anarist pyereh máhđulâšvuođâh kevttiđ digimateriaal, ko tääbbin láá tiättureh já iPadih. Škovlâ lii taid teehin uástám. Kal mij ferttip čuávvuđ ääigi, Musta iätá.

Musta uáiná tehálâš äššin tom, ete digitaallii materiaal puáhtá peividiđ.

– Talle ko kirje teddil, te tot lii talle tieggáár ko lii. Tiest sättih leđe feeilah, já tohhân kale ain láá. Talle čuávuváá riänttusân taid ferttee ain tivvoođ. Digimateriaal puáhtá táárbu mield tállân peividiđ, sun iätá.

Musta osko, te meiddei teddilum kirjeest-uv lii uásis škovlâelimist vala puátteevuođâst.

– Jiem mun osko, ete toh láá vala lappuumin. Kirje lii kuittâg kirje. Tast lii tiätu árvu. Mut tiäđust-uv hárjuttâskiirjijd ij kal taarbâš ko taid hárjuttâsâid puáhtá čäälliđ veikkâ iPadin teikkâ tiätturáin.

"Nuorttâlâškielâst stuárráámus ruuđâ tárbu"

Musta lii tuđâvâš tast, ete oppâmateriaal rähteeh láá tääl jo váhá eenâb ko ovdil.

– Motomin lâi nuorttâlâškielâ peht nuuvt, ete iä lamaš eenâb ko ohtâ tâi kyehti pargee. Vistig lâi pággu porgâđ jieijâs pargo já talle vala rähtiđ oppâmateriaal. Ijhân kihheen vaje tom, sun iätá.

Ruuđâ jyehim oppâmateriaal pyevtitmist puoh sämikielâi kooskâst ij lah vala čielgâ äšši. Mustâ lii kuittâg ton uáivilist, ete ruuđâ kannat pieijâđ toos, moos lii tárbu.

– Jyehi kielân puátá mottoom tiätu ruttâ, mut ep vala tieđe maht tot mana. Jis nuorttâlâškielân kávnojeh tuárvi pargeeh, te ferttee pieijâđ eenâb ruuđâ nuorttâlâškielân. Toos lii tääl stuárráámus tárbu, Musta iätá.

Varrasamosat: Säämi

Váldoođđasat

Varrasamosat

Muualla Yle.fi:ssä