Säämi |

Puoh evangeliumeh láá tääl jurgâlum anarâškielân já Markus evangelium luhhum jienâkirjen

Evangeliumij jurgâlempargo piištij nelji ive. Tääl Ráámmát teevstâin lii almostum meiddei vuosmuš jienâkirje, mon Petter Morottaja lohá.

raamattu
Evangeliumeh anarâškielân láá teddilum meiddei kirjen já lohe lii ráhtám Inka Kangasniemi. Govva: (c) Suomen Pipliaseura

Suomâ evangellâš-luterilâš kirkko já Suomâ Piplia-servi lává tääl almostittám anarâškielân uđđâ testament evangeliumijd. Tääl puoh nelji, Luukas, Matteus, Markus já Johannes evangeliumeh láá kavnâmist raamattu.fi-siijđost.

Tai lasseen lii anarâškielân almostum jienâkirjen Markus evangelium. Taan lii luuhâm Petter Morottaja. Piplia heiviittâs puáhtá luođiđ jo-uv Google Playst teikkâ Apple Storest já toi peht piäsá kuldâliđ taan evangelium anarâškielân.

Evangeliumij jurgâlempargo piištij nelji ive. Jurgâlempargo porgii Marja-Liisa Olthuis, Mervi Sistonen Ilmari Mattus, já mieldi lâi meid pargojuávkku, mast lijjii mieldi teolog- já kielâmätteeh.

Ráámmát jurgâlempargoost västideijee Marja-Liisa Olthuis tuálá tergâdin tággáár ollâ tääsi eenikielâlâš jurgâlus anarâškielâ kirholii eellim vuáđđun.

– Ovdil lii lam tuše Matteus já Johannes puáris jurgâlus já Piättár 1. kirje já tai lasseen motomeh kirkkoive teevstah, muštâl Olthuis Suomâ Piplia-seervi tiäđáttâsâst.

Tääl almostum teevstah uážžuh joođhâ čohčuv 2023, talle almostuveh lase Uđđâ testament jurgâlusah.

Varrasamosat: Säämi

Váldoođđasat

Varrasamosat

Muualla Yle.fi:ssä