Sápmi |

Rádjeáidekommišuvdna ii beassan ovttaoaivilii áidelinnjás – soabadanlávdegoddi veahkkin čoavdit dili

Suopma háliida hukset boazoáiddi Áŋŋelis gitta Boares Gáregasnjárgii geainnu nuorta beallái, muhto Norga ii dohkket dan.

Suoma ja Norgga rádjaáidi
Suoma ovddasvástádussan lea Anárjotleahki ja hukset rádjeáiddi Áŋŋelis gitta Boares Gáregasnjárgga rádjái. Govva: Bálgosiid ovttastus / Paliskuntain yhdistys

Suoma ja Norgga gaskasaš rádjeáidekommišuvdna ii leat beassan ovttaoaivilii ođđa rádjeáiddi huksemis Áŋŋela ja Boares Gáregasnjárgga gaska oasil. Suopma lei evttohan, ahte ođđa áidi huksejuvvošii Áŋŋelis gitta Boares Gáregasnjárgii geainnu nuorta beallái. Norga goit dulko rádjeáidesoahpamuša nu, ahte áidi galgá huksejuvvot nu láhka rájá go vejolaš iige dohkket Suoma evttohusa, muitala rádjeáidekommišuvnna ságadoalli Hannu Linjakumpu.

Go Suopma ja Norga eaba soabat áidelinnjemis, ášši sirdása ođđa orgána gieđahallamii ja veahkkin boahtáge dál sierra soabadanlávdegoddi. Dál sihke Suoma ja Norgga boazodoalloáššiin vástideaddji ministeriijat galget nammadit ovtta áirasa lávdegoddái. Goalmmát áirras ja seammás maiddái lávdegotti ságadoalli fas galgá boahtit man nu eará riikkas, ovdamearkka dihte Ruoŧas. Lávdegotti bargun leage čoavdit rádjeáidesoahpamuša dulkonerohusaid vai rádjeáidekommišuvdna beassá ovddos guvlui áiddi huksemiin.

– Dat lea vuosttaš geardi go soabadanlávdegoddi geavahuvvo čielggadit dulkonerohusaid. Go rádjeáidesoahpamušas lea dákkár vejolašvuohta, de dieđusge mii dan geavahit, dadjá rádjeáidekommišuvnna ságadoalli Hannu Linjakumpu.

Áidebarggut galggašedje álgit boahtte gease

Suopma ja Norga leat ovttas soahpan, man oasil goabbáge riika galgá hukset áiddi. Suoma ovddasvástádussan lea earet eará Anárjotleahki, Áŋŋelis gitta Boares Gáregasnjárgga rádjái. Deanuleagis fas áiddi huksen lea Norgga ovddasvástádussan.

Áiddi huksema sivvan leamaš dat, ahte muhtin jahki dassái Norgga bealde bohte olu bohccot guohtut Suoma beale gittiide, ja dat dagahii váttisvuođaid earet eará Deanuleagis Suoma beale eanadoalliide.

Áiddi huksen galggašii álgit albmaláhkai geassit 2019. Huksema várás lea várrejuvvon 200 000 euro jahkái. Norgga ja Suoma gaskasaš rádjeáidi galggašii gárvánit jagi 2021 lohppii.

Varrasamosat: Sápmi

Váldoođđasat

Varrasamosat

Muualla Yle.fi:ssä