Sápmi |

Rádjegávpejasat ráhkkanan Suoma ja Norgga rájá rahpaseapmái: "Soaitá mealgat hušša"

Norga lea mearridan rahpat rájá Supmii mánnodaga geassemánu 15. beaivvi rájes. Gávpejasat Arto Aurala ja Mikko Rousu leabage vuordán rájáid rahpama jo guhká.

Arto Aurala kaupassaan, joka hiljeni tyystin Norjan ja Suomen välisen rajan mentyä kiinni.
Njuorggánlaš gávpejas Arto Aurala lea ráhkkanan rájáid rahpamii. Govva: Vesa Toppari / Yle

Norga lea maiddái mearridan rahpat rájá Supmii ja eanaš oassái eará davviriikkaid mánnodaga geassemánu 15. beaivvi rájes. Ruoŧa oasil Norga doallá ráddjehusaid dihto eavttuiguin, muhto Gotlándii lea vejolaš mátkkoštit. Áššis muitalii Norgga stáhtaministtar Erna Solberg dieđihandilálašvuođas.

Go ráját manne gitta njukčamánu beallemuttus, dat váikkuhii sakka rádjegávppiid doaimmaide. Njuorggámis ja Gilbbesjávrris gávpejasat muitaledje, ahte juoba 90 proseanta sin vuovdimis boahtá Norgga bealde. Danin lei diehtu rájáid rahpaseamis buresboahtán.

Njuorggánlaš gávpejas Arto Aurala leage ráhkkanan rájáid rahpaseapmái, go Suopmage almmuhii duorastaga mátkkoštanráddjehusaid ložžemis.

– Galhan dán rájáid rahpama leat vuordán jo máŋga mánotbaji. Gal dás leat ráhkkanan ja diŋgon gálvvuid, dadjat logigeardásaš meari, go veardida mannan vahku mánnodahkii.

Son jáhkká ja sávvá, ahte olbmot šávihit rájá nuppe bealde gávppašit, go dat lea fas vejolaš.

– Gal dat veahkeha olles gieldda, gili ja buohkaid. Gávppis dasto barggut joatkašuvvet, dálhan leat leamaš olbmot luopmudahtton. Barggut álget buohkain ja mii oažžut dávviriid johtit, dadjá Aurala.

Sávvá doaibma beassá jorrat dábálaččat boahtte vahkus

Gilbbesjávrris gávpejas Mikko Rousu lea seamma oaivilis Auralain. Maiddái sii leat vuordán golbma mánotbaji dan, goas ráját rahpasit. Gilbbesjávrrisge dasa leat jo ráhkkanan.

– Mii leat bargoveaga álgán jo bivdit ruovttoluotta bargui, sin geat leat leamaš luopmudahtton. Boahtte vahkus jos beasašii jorrat dát vuovdin aivve dábálaš leavttuin, son sávvá.

Mikko Rousu
Mikko Rousu lea gávpejas Gilbbesjávrris. Govva: Yle

Rousu jáhkká vuosttaš vahkkoloahpa soaitá leat mealgat hušša.

– Gal mun jáhkán, ahte olbmot de fitnet muhtin veardde eanet go dábálaččat. Muhto gal dat várra dasto dásáiduvvá seamma dássái go lea mannan jagiid leamaš.

Son muitala, ahte golmma mánotbaji vuovdimat leat leamaš dan veardde go dábálaččat leat guovtti vahkus.

Varrasamosat: Sápmi

Váldoođđasat

Varrasamosat

Muualla Yle.fi:ssä