Sápmi |

Rádjeguovlosearvi bálkkašii earet eará Johtti Sápmelaččaid, skuvlenčálli Ulla Aikio-Puoskari ja fitnodatdoalli Jan-Erik Paadar ánssolaš doaimmain

Rádjeguovlu-dovddastusaid duohken leat earet eará buresveadjima ovddideapmi ja ruovttuguovllu ealasvuođa bajásdoallan sihke kultuvrra, árbevieruid ja searvvušlašvuođa gáhtten.

Nils-Henrik Valkeapää ja Janne Näkkäläjärvi
Nils-Henrik Valkeapää ja Janne Näkkäläjärvi Johtti Sápmelaččat -searvvis muitaleaba, ahte dovddastus lokte miela. Govva: Inger-Elle Suoninen / Yle

Rádjeguovlosearvi lea bálkkašan Jagi 2020 Rádjeguovlu -dovddastusaiguin aktiivvalaš olbmuid ja servviid, geat leat dorjon searvvušlašvuođa ja buresveadjima.

Dán jagi dovddastusa ožžot ovcci doaibmi, geat leat ánssolaččat bargan rádjeguovllu ja iežaset ruovttuguovllu buorrin. Jagis 2020 Rádjeguovlosearvvi prošeaktaguvlui leat gullán Eanodaga, Anára, Ohcejoga ja Soađegili gielddat.

Dán jagi Rádjeguovlu-dovddastusa oažžut ja ákkat:

Johtti Sápmelaččat rs
Jagis 1969 vuođđuduvvon sámesearvi Eanodagas. Searvi ovddida sámekultuvrra ja sápmelaš eallinvuogi. Searvvis lea servodatlaš ja searvvušlaš doaibma ránnjáriikkaiguin.

Johtti Sámit -searvi oaččui Rádjeguovlu-dovddastusa. Janne Näkkäläjärvi ja Nils-Henrik Valkeapää muitaleaba áššis. Jietna: Inger-Elle Suoninen / Yle

Ulla Aikio-Puoskari
Skuvlenčálli Ulla Aikio-Puoskari hállá sámegielaid ealasvuođa beales. Son lea ovddidan sámegielaid oahpahusa juksama, man ánssus giella sirdása ođđa sohkabuolvvaide hállojuvvon, čállojuvvon ja ovdáneaddji hámis.

Jan-Eerik Paadar
Anárlaš turisma- ja prográmmabálvalussuorggi fitnodatdoalli Jan-Eerik Paadar veahkehii báikkálaš giliid ássiid koronagiđa áigge ovdánan doaibmavugiin ordnemiin čuorvvasgávppiid ruhtačoaggima várás.

Jan-Eerik Paadar muitala dovdduidis Rádjeguovlu-dovddastusas. Jietna: Inger-Elle Suoninen / Yle

Yrjö Portti
Inarin Yritys -valáštallansearvvi čuoiganhárjeheaddji ja fuolaheaddji Yrjö Portti doaibma dahká vejolažžan nuoraid astoáiggedoaimmaid ja gilvomátkkiid iešguđet guovlluide Suomas ja Norggas.

Yrjö Portti Inarin Yritys -searvvis lea okta dain, guhte oaččui jagi Rádjeguovlu-dovddastusa. Jietna: Inger-Elle Suoninen / Yle

Ivalon Palloseura
Suoma davimus spábbačiekčansearvi. Searvi fállá mánáide ja nuoraide astoáiggedoaimma dáidodásis fuolakeahttá.

Tunturi-Kiekko ry
Jiekŋaskearrosearvvi Lappi Liiga speallanmátkkiid lassin spealuid spellet jeavddálaččat davvin ránnjáriikkain. Riikkaidgaskasaš doaibma buktá lasi sisdoalu dán astoáiggedoibmii.

Jatta Kaivosoja
Jatta Kaivosoja lea ordnen Anáris biebmoveahki bearrašiidda koronagiđa áigge ja ožžon fitnodagaid vuolgit fárrui buorre doaimmaide. Kaivosoja hupmá ja doaibmá dehálaš ášši beales.

Helena Määttä
Báhčaveaijoga-Njellima gilisearvvi ságadoalli Helena Määttä lea áigáioažžu gilisearvedoaimma ja searvvušlašvuođa ovddideaddji, guhte oažžu olbmuid movttáskit doaibmat maiddái ránnjáriikkain.

Raattaman Reitit ry
Raattaman Reitit -searvvi Raattama ja Yli-Kyrö giliid birrasis bajásdoallan láhttofierpmádat lea dehálaš giliid ealasvuhtii ja eandalii turismasuorgái. Searvi lea lihkostuvvan čatnat iežas doibmii fárrui friijaáiggi ássiid ja lasihan báikkálaččaid vuorrováikkuhusa.

Rádjeguovlosearvi háliida loktet ovdan mearkkašahtti bargama

Rádjeguovlu-dovddastusain háliidit giitit eaktodáhtolaš barggu dahkan olbmuid ja mearrediđolaččat doaibman servviid ja loktet ovdan mearkkašahtti bargama.

Dovddastusaid duohken lea buresveadjima ovddideapmi, ruovttuguovllu ealasvuođa bajásdoallan, astoáiggedoaimmaid nannen sihke kultuvrra, árbevieruid ja searvvušlašvuođa gáhtten, muitalit Rádjeguovlosearvvis.

– Bálkkašumiiguin háliidit fuomášahttit rádjeguovllu doaibmiid, geain juohkehaš lea guođđán iežas láhkai bissovaš ja nana luotta guovllu eallimii ja buresveadjimii, giitá Rádjeguovlosearvvi doaimmajođiheaddji Elina Nihtilä.

Elina Nihtilä
Rádjeguovlosearvvi doaimmajođiheaddji Elina Nihtilä ovdal bálkkašumiid juohkima Anáris. Govva: Inger-Elle Suoninen / Yle

Bálkkašandilálašvuohta ordnejuvvo Anáris 20.11. diibmu 14.

Rádjeguovlosearvi lea 97 jagi doaibman searvi, man doaibmaguvlui gullet Suoma rádjeeanangottit. Rádjeguovlosearvi juohká earet eará veahkkeruđaid nuppi dási studeanttaide ja doarju doaibmaguovlluset servviid ja eaktodáhtolaš organisašuvnnaid. Prošeaktaguovllut molsašuvvet jahkásaččat.

Varrasamosat: Sápmi

Váldoođđasat

Varrasamosat

Muualla Yle.fi:ssä