Sápmi |

Ráđđehusa linnjen 1.–3.-luohkálaččaid lagašoahpahusas ii olus váikkuhan Anára ja Ohcejoga gielddain

Ráđđehusa mearrádus ii leat lasihan lagašoahpahusa oahppiid meari Anáris ja Ohcejogas. Vaikko lagašoahpahusas leat unnán oahppit, Ohcejogas fállagohtet skuvlaborramuša buot oahppiide.

Pirkko Olli
Avvila vuolledási rektor Pirkko Olli muitala, ahte Anára gielddas válde ovtta beaivvi lasseáiggi lagašoahoahusa válmmaštallamii. Govva: Kirsti Länsman / Yle

Suoma ráđđehus rievdadii mannan bearjadaga mearrádusa, ahte buot 1.–3.-luohkálaččaide galgá fállat lagašoahpahusa dán vahku álggu rájes.

Anára gielddas mearridedje, ahte dat rievdadus boahtá fápmui disdaga rájes, go fertejedje ordnet mánáide boradeami, sáhtuid ja jearrat vuos vánhemiin hálu bidjat máná lagašoahpahussii dán koronadilis.

– Anára gielddas válddiimet ovtta beaivvi áigelasi dasa, go eai doppe varra fuomáš dan, ahte borramušat eai leat gárvvisin vuordimin eaige sáhttut ordnejuvvon gos máŋge láhkái gálggašii, muitala Avvila vuolleskuvlla rektor Pirkko Olli.

Olli muitala, ahte Avvila vuolledásis leat badjelaš 20 oahppi lagašoahpahusas.

– Ávžžuhusat leat dán gáiddusoahpahussii liikká, vaikko lohpi lea bidjat skuvllii. Vánhemat leat hui bures váldán dán, lohkomearri ii leat lassánan das, mii mannan vahkus lei. Vánhemat doibmet ávžžuhusaid mielde, muitalii Olli mánnodaga.

Ráđđehusa linjen ii leat lasihan lagašoahpahusa oahppiid meari Anára girkosiidda skuvllasge, muitala Anára skuvlla rektor Marja Seilonen.

– Aivve seamma oahppit, geat álgoálggus almmuhuvvojedje, jotket lagašoahpahusas. Ođđa oahppit eai leat boahtán.

– Dán vahkus leat golbma oahppi, ja sii maiddái oasseáigásaččat. Oahppit eai vealttekeahttá leat juohke beaivve ja sáhttá leat sii leat dušše oasi beaivvis go dahket vehá oanehit beivviid.

Inarin koulun rehtori Marja Seilonen
Anára skuvlla rektor Marja Seilonen muitala, ahte ráđđehusa linnjen ii leat váikkuhan lagašoahpahusa oahppiid mearrái. Govva: Vesa Toppari / Yle

Ohcejogas skuvlaborramuš buohkaide, geat dan leat sávvan

Maid Ohcejogas ráđđehusa mearrádus ii leat olu lasihan lagašoahpahusa oahppiid meari, muitala Ohcejoga sadjásaš čuvgehushoavda-rektor Eila Tapiola.

– Mis lea lagašoahpahus Ohcejohnjálmmi skuvllas. Gáregasnjárggas ja Njuorggámis ii leat. Dát bearjadaga boahtán linnjen ii váikkuhan dan dillái ja dilli seaillui seammán.

Nuba Ohcejogas eai leat dárbbašan smiehttat lagašoahpahusa ordnestallamiid. Muhto skuvlaborramušášši gielddas leat smiehttan, ja Ohcejohka fállagoahtáge dál skuvlaborramuša maid gáiddusoahppiide.

– Mii háliidit doarjut vánhemiid dán dilis, go sis lea juo oahpahus iežas badjelis. Áigut geahpedit fuolaheaddjiid bargonoađi nu, ahte fállat borramuša. Dat koronadillihan sáhttá maiddái buktit nuppástumiid bearrašiid ekonomiijas, de háliidit maiddái doarjut dan beali.

Eila Tapiola
Ohcejoga sadjásaš čuvgehushoavda-rektor Eila Tapiola. Govva: Vesa Toppari / Yle

Ohcejoga gielda fállá biepmu buohkaide gieldda vuođđoskuvlla ja logahaga oahppiide, geat almmuhit dan háliidit.

– Jos oahpis ii leat skuvlasáhttoriekti, de oahppi dahje fuolaheaddji galgá ieš viežžat borramuša juohkinčuoggás. Dat geat leat skuvlasáhtus, dahje jos bearrašis lea ovdamearkka dihte karantenadilli, de dalle jogo min bargi buktá dan borramuša dahje mii jođihit dan táksiin, čilge Tapiola skuvlaborramuša fievrrideamis.

Skuvlaborramuš juhkkojuvvo olgun amas koronavirus leavvat.

– Dat biepmu jođihuvvo oahppi uvssa lusa nu, ahte min jođiheaddji ii doalvvo dan dohko sisa. Dasa lassin dat, geat galget viežžat borramuša doppe juohkinčuoggás, sii eai mana sisa, muhto sii ožžot dan dasa olggos. Min gievkkanbargi juohká dan olgun, čilge Tapiola.

Tapiola muitala, ahte skuvlaborramuš boahtá leat galbma borramuš, vai dan sáhttet addit guovtti beaivái hávil.

– Das lea maiddái unnit riska makkárge borramušmirkkohusaide.

Geavatlaš ordnemiid dihte borramuša juohkin álggahuvvo disdaga 24.3. Njuorggámis ja gaskavahku 25.3. Ohcejohnjálmmis ja Gáregasnjárggas.

Varrasamosat: Sápmi

Váldoođđasat

Varrasamosat

Muualla Yle.fi:ssä