Sápmi |

Ráđđehusas vihtta miljovnna euro Eanodaga girdigieddái – Gieldda ovddidanhoavda: Dát lea lávki rivttes guvlui

Ruhta lea oassi ráđđehusa 20 miljovnna euro lasseruhtadeami, mainna ráđđehus doarju guovlluid ealáhuseallima ja nanne guovloekonomiija.

Hetan lentoasema
Eanodaga girdigieddi. Govva: Jorma Korhonen / Yle

Eanodaga girdigietti divvumii lea mieđihuvvon vihtta miljovnna euro.

Suoma ráđđehus mearridii njealját lassebušeahttaárvalusas dán vahku disdaga. Ráđđehus lea otne bearjadaga ovdanbuktán lassebušeahttaárvalusa riikkabeivviide.

Bargo- ja ealáhusministeriija ekonomiijahoavda Mika Niemelä muitala, ahte ráđđehusa lassebušeahttaárvalus sisttisdoallá viđa miljovnna euro lassemearreruđa davvi guovllu turismainfrastruktuvrra bajásdoallamii, nappo Eanodaga girdigietti bajásdoallamii.

"Earenoamáš ođas"

Eanodaga gieldda ovddidanhoavda Hannu Autto illuda ruhtadeamis. Son oaivvilda dán leat earenoamáš ođas olles guvlui.

– Ii dušše Eanodahkii, baicce olles Duottar-Lappii ja Lappi turismii. Lea fiinnis, ahte ná dehálaš krihtalaš infra árvvu oidnet stáhtahálddahusas ja dasa oažžut divodanruđa.

Su mielas ráđđehusas ruhtadeami oažžun lea lávki rivttes guvlui.

– Dál leat mannamen rivttes guvlui, go oaidnit mii eanangoddelaš girdigittiid mearkkašupmi lea báikkálaš guovloekonomiijai ja dan álbmotlaš doalvunindustriijai, mii turisma lea.

Eanodagas eai vel goittotge beasa bosihit girdigietti seailuma oasil, dadjá Autto.

– Bargu joatkašuvvá, ja čuovvovaš vahkuid áigge várra oažžut lasi dieđu dain detáljain, mo dat ruhta geavahuvvo girdigietti divodeapmái.

Ráđđehus gáibida divodeapmái maiddái iešruhtadeami. Autto jáhkká dan maid čielgat lagaš áiggiid, maid iešruhtadeapmi ja dan dikšun geavadis dárkkuhit.

Eanodaga girdigieddi lea dehálaš oassi gieldda ekonomiija ja ealasvuođa, muhto fuolla dan seailumis lea deaddán jo guhká. Girdigieddi buktá 4,2 miljon euro guvlui jahkásaččat.

Varrasamosat: Sápmi

Váldoođđasat

Varrasamosat

Muualla Yle.fi:ssä