• 

• 

• 

Sápmi Pride -leavga libardii Sámi allaskuvlla Diehtosiidda šiljus lávvardaga mearkan historjjá golmmát Sápmi Pride -dáhpáhusa lágideamis Guovdageainnus.

Sápmi Pride -leavga lea dego Sámi leavga, muhto dasa leat heivehuvvon pride-leavggas oahpes lila ja oránsa ivnnit.

Olu olbmot mielde ráiddus

Lávvardaga váldodáhpáhus lei ráidovázzin Diehtosiiddas Rema 1000 -gávppi šiljui Guovdageainnu márkanis.

Čoaskka dálkkis fuolakeahtta ráidovázzimii čoahkkanedje máŋga čuođi olbmo.

Mielde ledje ivdnádit čiŋadan prideaktivisttat, gávttehasat, Norgga Sámi njunušpolitihkarat Guovdageainnu suohkanis gitta Stuorradiggái, mánnábearrašat ja áibbas dábálaš olbmot.

"Eallit dakkárin go mii leat"

Leammuid Lemet Ánde hálai Sápmi Pride -lágideaddjiid beales Diehtosiidda šiljus eaŋgasgillii ovdal vázzima ja dajai, ahte sii gáibidit dušše dan rievtti, mii sidjiide gullá.

– Eallit dakkárin go mii leat Sámis.

Ráidovázziin ledje eará Sámi ja pride-leavggat.

Ráiddu njunnožis vázzii dáiddar Mimie Märak ja dalán su maŋis bođii stuorra Sápmi Pride -leavga, man guovddášaktiivat gudde.

– Gieresvuohta, ráhkisvuohta! Mii leat queer ja mii leat dáppe!, gullui go ráidu vázzii čađa márkana ja šalddi badjel borramušgávppi šiljui.

"Oainnatgo man gallis dat leat?"

Máŋgasii lei homoseksualitehta čalmmusteapmi almmolašvuođas Guovdageainnus oalle erenoamaš vásáhus.

Guovdageaidnolaš Aili Skum muitalii NRK Sámi Sáhkaváibmosis-sáddagis bearjadaga, ahte son lea vásihan, ahte lea hui okto Guovdageainnus.

Sápmi Pride -dáhpáhusa njunuš Dávvet Bruun-Solbakk jearaige Skumis ráidovázzimis, ahte makkár sus lea dovdu ja ahte leago son rámis.

Skum njuorrasii ja Leammuid Lemet Ánde vástidii su beales ja dajai, ahte oainnatgo gallis leat searvan ráidui.

"Dathan fertejit leat máŋga čuođi"

Dávvet Bruun-Solbakk dajai ráidovázzima áigge Yle Sápmái, ahte sus lea hui buorre dovdu.

– Nu somá, ahte nu máŋgasat leat boahtán. Dathan fertejit leat máŋga čuođi, Bruun-Solbakk dajai ja vilppastii su maŋis vázzi jovkui.

Ráidovázzin manai oppalohkái hui ráfálaččat. Bolesat ledje márkanis báikki alde čuovvumin ráiddu.

Ovdal Diehtosiidii máhcama Mimie Märak doalai vel gávppi šiljus sáhkavuoru, mas ledje olu dovddut.

– Mii leimmet vuordán dušše moaddelogi olbmo, muhto gehččet man máŋgasat dorjot min, Märak dajai.

Sáhkavuorru dávistii bures olles dáhpáhusa liegga ja rabaslaš vuoiŋŋa ja deattuhii man dehalaš lea doarjut nubbi nuppi.

Suoma bealde unnán olbmot

Suoma bealde eai lean boahtan galle olbmot ja ovdamearkan Sápmi Pride -dáhpáhussii bovdejuvvon Suoma Sámediggi ii lea sádden ovddasteaddji Guovdageaidnui.

Okta Suoma bealde boahtán oasseváldiin lei Anne Olli Avvilis.

– In livčče jáhkkán, ahte ná olu bohtet olbmot. Ráidovázzimis lei hui somá. Lei beare hui galmmas ja biekkai olu, muhto galhan doppe lei liekkas dovdu goittotge, Olli muitala.

Anne Olli lei ovdal váldán oasi Arctic Pridei Roavenjárggas, muhto dát lei su vuosttas Sápmi Pride.

– Dáhpáhusain ii leat stuorra erohus. Dáppe dieđusge gullá iežas eatnigiela, dan gollegiela. Orru eanet ruovttus dáppe duoddariid gaskas. Dat lea gal lea stuorra erohus, go veardida dan gávpotatmosferii, Olli dadjá.

Maid Ruoŧa Sámedikkis ii lean ovddasteaddji Guovdageainnu Sápmi Prides.